Jobip Guutimut aalajaannera

ANGUT napparsimasoq una misigeqatigaajuk? Tassaavoq Job, nulialu sanianiippoq. Nulia Jobimut qanoruna oqartoq? ’Guuti perloqquinnaruk toqullutillu.’ Suna pillugu taama oqarpa, sunalu pillugu Job taamatut naalliutsigaa? Tusariartigu.

Job angutaavoq aalajaatsoq Jehovamut naalattoq. Uzip nunaani, Kana’anip nunaata ungasinngitsuaniittumi, najugaqarpoq. Jehovap Job asangaarpaa, arlaannilli uumigineqarpoq. Uumissortaa nalunngiliuk?

Tassa Satan Diaavulu. Eqqaamajuk Satan inngilipiluuvoq Jehovamik uumissuisoq. Adam Evalu Jehovamut naalanngitsunngortissimavai, isumaqarlunilu inuit tamaasa Jehovamut naalanngitsunngortissinnaallugit. Sapinngilaali? Naagga. Angutit arnallu aalajaatsut tusarsimasavut eqqarsaatigeriakkit. Ilaat qassit taasinnaavigit?

Jakob Josefilu Egyptenimi toqoreermata Job inuuvoq nunami tamarmi Jehovamut aalajaannerpaasoq. Jehovap Satan paasitikkumavaa kikkunnilluunniit ajortunngortitsisinnaanngitsoq, taava oqarfigaa: ’Job takuuk. Uannut aalajaassusia.’

’Aap,’ Satan akerliliilluni akivoq, ’pissutaaginnarpoq pilluaqqugakku ajunngitsorpassuarnillu tunillugu. Tamakkuninngali arsaarukku perloqqussagaluarpaatit.’

Taava Jehova oqarpoq: ’Taamaalioruk. Arsaaruk. Job piumasannik ajortumik iliorfigiuk. Takussavarput perloqqussaneraanga. Toqussanngilalli.’

Siullermik Satanip angutit Jobip nersutaataanik qatigattuutaanillu tillitsippai, savaataalu toqorarneqarput. Taava erneri paniilu qulit anorersuarmik toqutippai. Taava Satanip Job maajunnartumik nappaateqalersippaa. Job naallioqaaq. Tamanna pillugu nuliata Job oqarfigaa: ’Guuti perloqquinnaruk toqullutillu.’ Jobili taamaaliorumanngilaq. Aamma ikinngutaanerartut aggerput inuunerlussimanerarlugu appisaluullugu. Jobili aalajaattuarpoq.

Jehovap tamanna nuannaarutigeqaa, kingornagullu Job pilluaqquaa, soorlu assilissami takusinnaagit. Ajorunnaarsippaa. Job aamma qulinik pinnersunik qitornartaaqqippoq, siornagornillu marloriaammik amerlanerusunik nersutaatitaarpoq.

Illit Jobitut Jehovamut aalajaattuaannassavit? Taamaakkuit Guutip illittaaq pilluaqqujumaarpaatit. Naassaanngitsumik inuusinnaassaatit nuna tamarmi Edenip naatsiiviatut alianaatsigilerpat.