Moses qimaasoq

MOSES Egyptenimit qimaasoq takoriaruk. Angutit malersortai takusinnaavigit? Suna pillugu Moses toqunniaraat nalunngiliuk? Paasiniariartigu.

Moses Faraop, Egyptenimut naalakkersuisup, inoqutaani alliartorpoq. Angutinngorpoq silatooq pingaartorlu. Mosesip nalunngilaa Egyptenimiuunani, angajoqqaanilu Israelikkuusut inussiat.

Ullut ilaanni, 40-nik ukioqarluni, Moses aalajangerpoq Israelikkoqatini takusassallugit. Naalliutsitaanerat amiilaarnaqaaq. Egyptenimiup Israelikkut ilaat inussiaq unataraa takuaa. Moses tamanut qinerpoq, isiginnittumillu takusaqannginnami Egyptenimiu unatarpaa, Egyptenimiulu toquvoq. Taava timaa toqungasoq Mosesip sioqqanut matooruppaa.

Aqaguani Mosesip Israelikkoqatini takusaqqippai. Isumaqarpoq ikiorsinnaallugit inussiaajunnaarsillugit. Angutilli Israelikkuusut marluk paasut takugamigit Mosesip pisuusoq oqarfigaa: ’Sooq qatanngutit unatarpiuk?’

Angut oqarpoq: ’Kia uatsinnut naalaganngortikkamisit eqqartuussisunngortillutillu? Uanga toqunniarpinga soorlu Egyptenimiu toqussimagit?’

Taava Moses siooralerpoq. Nalunngilaa inuit paasisimagaat Egyptenimiumut qanoq iliorsimanini. Faraop allaat tusarpaa, aallartitsivorlu Moses toqoqqullugu. Tamanna pillugu Moses Egyptenimit qimaasariaqarpoq.

Egypten qimakkamiuk Moses ungasissorsuarmut Midjanip nunaanut pivoq. Tamaani angut Jetromik atilik ilaqutaalu naapippai, paniisalu ilaat Zippoʹramik atilik nuliartaaraa. Moses savanik paarsisunngorpoq Jetrop savaataanik paarsilluni. Ukiut 40-t Midjanip nunaani najugaqarpoq. Maanna 80-inik ukioqarpoq. Taava ullut ilaanni, Moses Jetrop savaataanik paarsitillugu, tupinnartumik pisoqarpoq Mosesip inuuneranik tamarmik allanngortitsisumik. Quppernermi tullermi tupinnartoq tamanna takoriartigu.