Moses annaanneqartoq

TAKUUK naalungiarsuk qiasoq arnallu tikia tigummigaa. Tassaana Moses. Arnaq pinnersoq kinaasoq nalunngiliuk? Tassaana Egyptenimi kunngip, tassa Faraop, pania.

Mosesip anaanaata naalungiarsuutini toqqorpaa pingasunik qaammateqalernissaata tungaanut, Egyptenimiunit toqunneqaqqunnginnamiuk. Nalunngilaali Moses immaqa nanineqarumaartoq, taamaattumik annaakkumallugu iliuuseqarpoq.

Koori tiguaa ussissarlugulu. Taava Moses tassunga ikivaa koorilu ivikkat takisuut Niilip kuussuata sinaani naasartut akornannut inissillugu. Mosesip aleqaa, Mirjam, peqquaa ungasinngitsuaneeqqullugu qanoq pisoqarnissaa alapernaallugu.

Sivitsunngitsoq Faraop pania Niilip kuussuanukarpoq uffariartorluni. Tassanngaannaq koori ivikkat takisuut akornanniittoq takulerpaa. Arnat kiffami ilaat suaarpaa: ’Koori taanna uannut aggiuguk.’ Kunngip paniata koori ammaramiuk, naalungiarsuk inequnaqisoq takulerpaa! Mosesiaraq qiavoq, kunngillu paniata nalligaa. Toqunneqaqqunngilaa.

Taava Mirjam aggerpoq. Assilissami takusinnaavat. Mirjamip Faraop pania aperaa: ’Israelikkut arnartaasa ilaannik naalungiarsummik milutsitsisussarsiussavakkit?’

’Qaa, taamaaliorniarit,’ kunngip pania oqarpoq.

Taava Mirjamip arpalluni anaanani aavaa. Mosesip anaanaa kunngip panianukarmat kunngip pania oqarpoq: ’Naalungiarsuk una tiguuk uangalu sinnerlunga paaralugu, akilerumaarpakkillu.’

Taamaalilluni Mosesip anaanaata nammineq qitornani paarilerpaa. Kingorna Moses naammattunik utoqqaassuseqalermat Faraop panianut aggiuppaa, taassumalu ernersiartaaraa. Taamaalilluni Moses Faraop inoqutaani alliartorpoq.