Israelimi tillittoqartoq

TAKUKKIT angutip uuma tupermini toqquligai! Qallersaat kusanartoq, kuulti ilivitsukaanngortitaq siilvillu. Illoqarfimmit Jerikomit tigusimavai. Jerikomiittulli qanoq pineqartussaagaluarpat? Eqqaamaviuk?

Suut tamarmik ikuallanneqartussaagaluarput, taavalu kuultit siilvillu Jehovap illernartuutaata erlinnartuusivianut tunniunneqartussaagaluarlutik. Inuilli ukua Guuti naalanngilaat. Guutip pigisaanik tillipput. Angut tassaavoq Akan, ilaalu ilaqutaasa ilagaat. Qanoq pisoqartoq takoriartigu.

Akan tamakkuninnga tillereersoq Josua angutinik aallartitsivoq illoqarfik Aj saassukkiartoqqullugu. Akiuunnermili artorsartitaapput. Ilaat toqutaapput, sinnerilu qimaallutik. Josua aliasoqaaq. Nunamut pallorpoq Jehovalu oqarfigalugu: ’Sooq taamatut pineqartippisigut?’

Jehova akivoq: ’Nikuigit! Israelikkut ajortuliorsimapput. Aserortigassaagaluit imaluunniit Jehovap illernartuutaanut tunniunneqartussaagaluit ilaannik tillissimapput. Qallersaat kusanartoq tillissimavaat toqqorlugulu. Qallersaat ikuallakkukku tillittorlu toqukkukku aatsaat pilluaqqujumaarpassi.’ Jehova neriorsuivoq ajortuliortup kinaaneranik Josua paasitikkumaarlugu.

Taava Josuap inuiaat tamaasa katersortippai, Jehovallu ajortuliortoq Akan toqqarpaa. Akan oqarpoq: ’Ajortuliorpunga. Qallersaat kusanartoq kuultilu ilivitsukaanngortitaq siilvillu takugakkit pilerigeqigakkit tigugakkit. Tuperma ataani toqqorsimasut nanisinnaavasi.’

Nanineqarmata imminullu aanneqarlutik Josua Akanimut oqarpoq: ’Sooq perlussiortippisigut? Maanna Jehovap perlussiortissavaatit!’ Taava inuit tamarmik Akan ilaqutaalu ujaqqanik milloorlugit toquppaat. Tamatuma takutinnginnerpaatigut piginngisatsinnik tigusinngisaannassasugut?

Taava Israelikkut Aj sorsuffigiartoqqippaat. Jehovap ikiorpai, ajugaappullu.