Jehovap aqqa ata naalannangaarmat!
„[Jehova], naalagarput, naalannangaarmat ata aqqit tamarsuarmi nunami!“ — TUSSIAAT 8:1, 9.
1. Suna pissutigalugu Jehovap nuna Kana’animiunik ’oriartortippaa’?
KIISAMI, 1473-imi u.n.a.s., Israelikkut nunami neriorsuutigisamiilerput. Ukiulli Guutip siulersuineratigut sorsuffiusut atugassaraat, nunammi inui ajortunngorsimasut peersittariaqarpaat. Kana’animiut ilumut taama ajortigippat? Ilaanarpat! Guutipilussiornerat kanngunartuliortumillu inooriaasiat Jehovap maajugai, Guutillu innuttaasa aarlerinartorsiutigisinnaassavaat. Taamaattumik Guutip Moses nalunaaqquaa inuiaqatigiissortani iluartut Israelikkut eqqartuussutiminik naammassinninnissaminut sakkugissagini. Taamaasiornikkut Jehovap nuna inuiaqatigiinnik mingunnartunik taakkuninnga ’oriartortissavaa’. — 3 Môrsase 18:1-30; 5 Môrsase 12:29-32.
2. Silarsuarmi upperisarsiornikkut aaqqissuussaanerit qanoq ittunik ’inerititaqartarsimappat’?
2 Ullumikkuttaaq aperisinnaavugut: Silarsuaq manna ima ajortigiva aserortariaqarluni? Silarsuarmi upperisarsiornikkut aaqqissuussaanerit qanoq oqaatigineqarsinnaappat? Ajoraluartumik taakkua Pinngortitsisoq, Jehova Guuti, ataqqinngitsoorpaat. Kristumiuuneraqatigiinni inuit taanna, ’puilasuvimmik puilasoq’, qimappaat, ’puilasuliat imminnut tuggarumallugit, puilasuliat aserukkat imeqarsinnaanngitsut’. (Jerimia 2:13) Upperisarsiornikkut immikkoorniartut upperisaat ’imermik’ sallusuissutaasumik imaqanngillat. Silamiut ilagigaatik ersersippaat silamiut sorsunneri tapersersortarlugit, naalakkersuinerisigut suleqatigisarlugit kinguaassiuutitigullu ileqqui ajorinagit. Soorlu Jesus oqarsimasoq, ’inerititaminnit’ ilisarineqassapput. — Matîuse 7:16, 17; naleqqiuguk Galâsiamiut 6:7, 8.
3. Silarsuarmiut Guutip inatsisaanik unioqqutitsinerisa suut kinguneraat?
3 Silamiummi ileqqui? Ukiuni kingullerni silarsuarmi tamarmi, ingammilli nunani kristumiutut upperisalinni, naartuersinnerit, 20-t inorlugit ukioqartut naartuneri ilaqutariillu avissaartitersimasut amerliartupallalersimapput. Nunat ilaanni aappariit tamarmik affaat avittarput. „Atoqatigiinnerup tungaatigut ileqqut allanngorluinnarnerat“ 1960-ikkunni aallartittoq allanittaaq ajorluinnartunik kinguneqarsimavoq. Tamakkua ilaat The New York Times-imi 13. juni 1986-imi saqqummersumi taaneqarpoq, quppernerani siullermi qulequtaqarluni: „AIDS TOQUSSUTIGALUGU ’91-IP TUNGAANUT TOQUSUT QULERIAAMMIĸ AMERLISSANGATINNARPUT.“ Ilanngutassiami taatsiarneqarpoq 1991-ip tungaanut USA-giinnarmi AIDS-imik (aatsorneqarnissamut akiuussutissanik amigaateqarnerup ilisarnaqutai ataatsikkoortut inunnguutsimit pigisaanngitsut) nappaatillit 100.000-init amerlanerusinnaassasut, nakorsagaanerat ukiut tamaasa dollarit 16 milliardit pallillugit akeqarluni. Nappaat toqussutaasartoq taanna angutit anguteqatiminnik atoqateqarneratigut, ikiaroornartunik atornerluinikkut aamma aalersortinnikkut tunillaattarpoq — tamarmillu Guutip inatsisaanik unioqqutitsinerupput. — 1 Korintumiut 6:9, 10; Galâsiamiut 5:19-21; apustilit suliait 15:19, 20.
4. (a) Uagut sorsunnerput Israelikkut Josuap ulluini sorsunnerannit qanoq allaava? (b) Qanoq annertutigisumik silamiut ilagisassavavut, sunalu pillugu?
4 Josuap ulluini Jehovap inuiaqatigiissortani iluartut aallartippai nuna neriorsuutigisaq eqqortumik oqaatigalugu sorsunnikkut minguiaqqullugu. Ullumikkut uagut anersaakkut sorsuttuuvugut. (2 Korintumiut 10:3, 4) Uagut Nalunaajaasut inuit Guutip oqaasianik sumiginnaasut peersinniarlugit nakuuserneq ajorpugut. Piffissarititani nalliuppat namminerlu periaatsini periaaseralugu Jehovap peersikkumaarpai. (5 Môrsase 32:41, 43) Inuit aalajangersumik pisaaseqanngitsut qanittumik ikinngutigineq ajorpavut, asanninnermilli piviusumik nittaassinnaavavut naalagaaffik pillugu tusagassamik nuannersumik tusarlerlugit. (1 Korintumiut 15:33) Guutip oqaasianik atuaqqissaaqatigisinnaavavut kajumissaarlugillu ’allamik isumataaqqullugit saanniaqqullugillu ajortitillu piiarneqaqqullugit’. — apustilit suliait 3:19; Matîuse 21:31, 32; Lúkarse 5:27-32.
Rahab inoqutaalu
5, 6. (a) Suna siunertaralugu alapernaarsuisuutitat Jerikomukarpat, Rahabillu illuanut pillutik? (b) Ullumikkut, ikioqqulluni qinnutit Jehovap qanoq iliorluni qassiitigut akisarpai? (c) Rahabip ’eqqissinermik pissuseqarnini’ qanoq takutippaa?
5 Israelikkut Jordanip kuussua ikaanngikkallartillugu allaat, Jehovap illoqarfimmik Jerikomik sissueqquai. Josuap alapernaarsuisut marluk, Israelikkunnut tamanut sinniisut, aallartippai oqarfigalugillu: ’Aallaritsi, nuna Jerikolu qimerlooriartorlugit.’ Suna siunertaralugu Jeriko isertortukkut alaatsinaassavaat? Naak illoqarfik Kana’animut aqqusernit pingaarnerit akornanniikkaluarluni, illoqarfiuvoq anginngitsoq Israelikkullu sakkutuuisa saassussineranni soriarfissaqanngilaq. Alapernaarsuisulli tassaniimmata Jerikomiut periarfissaqarsinnaapput Jehovamut atallutik imaluunniit atanatik nalunaarnissaminnut. ’Alapernaarsuisut aallarput taava, arnap akilersilluni atortittartup Rahabimik atillup illuanut pillutik.’ (Jôrsua 2:1-7) Qularnanngitsumik Guutip siulersuineratigut alapernaarsuisut taakku Rahabip illuanukartinneqarput, soorluttaaq ullumikkut inngilit siulersuineratigut Jehovap Nalunaajaasui inunnut anersaakkut ikioqqullutik qinusunut ingerlatinneqartartut! „[Jehovap] isaasa toqqavigaat iluartut, ikioqqullutik nillianerat siutaasa tusartarpaat.“ — Tussiaat 34:16; aamma takukkit nalunaerssûtigdlit áipait 16:9.
6 Suna siunertaralugu alapernaarsuisut arnap akilersilluni atortittartup illuanukassappat? Kanngunartumik siunertaqanngillat, kisianni takunnittut Kana’animiut salloqittarniarsimassavaat. Rahabip alapernaarsuisunut oqaasiisa takutitsiarpaat kanngunartuliorfiginianngikkai. Jehovap kiffarigai nalunnginnamigit, oqarfigisinnaavai Jehovap pallorfiginnittai ilagerusoqigini. Inuunerminik naleqarsinnaasumik allaat angutit illumi qaliani isertorpai. Taassuma assigai „savat“ Jesusip assersuummini eqqartugai, Naalakkap „qatanngutaa“nut avaaginnittut. (Matîuse 25:31-46) Ullumikkut Jehovap Nalunaajaasuisa, naak malunnaarsaaraluarlutik, ’eqqissinermik pissuseqartut’ soqutiginnittut nakimaatsumik pulaartarpaat Bibelimillu atuaqqissaaqatigisarlugit. — Lúkarse 10:5-7.
7. (a) Jehovamut uppersutsi Rahabip qanoq ersersippaa? (b) Ullumikkut ilagiinnut ilannguteqqammersut isuma suna ersersissavaat, qanorlu iliussappat?
7 Jehovap suliai angingaartut Rahabip tusaamavai. Uppersutsi alapernaarsuisunut isertorsimasunut ersersissinnaavaa, oqarluni: ’Ilisimavunga, Jehovap nuna manna ilissinnut tunniukkaa, annilaarnartorsilu uatsinnut tussimasoq, nunallu matuma inui tamarmik ilissinnut naasaangalersut.’ Jehovap suliai angingaartut pillugit nalunaarut tusarsimasani eqqartoreerlugu, Rahab nangilluni oqarpoq: ’Jehova Guutersi taannaavoq qilammi pavani nunamilu samani Guutiusoq. Maannalu uppernarsaaffigisinga-aat Jehova naqqissigalugu, uanga isumagigassi ilississaaq ataatama inoqutai isumagissagisi, qularnaveeqqutaasumillu nalunaaqqutissaqartissinga.’ (Jôrsua 2:9-13) Rahab assigalugu, ullumikkut ilagiinnut ilannguteqqammersut sallusuissummik Guutip pianik ilinniartut eqqartuussut ’Jehovap ullussaani’ naammassineqartussaq pillugu ersisariaarupput. (Sivfânia 1:14-18) Kisianni ileqqut silamiorpaluttut soraaruppaat annanniarlutillu Jehovap Nalunaajaasuisa ikiuinerat piniarlugu. — Tussiaat 3:6-8; ússatit 18:10.
8. (a) Rahabip ’qilerutissamik allunaasamik aappallarissumik’ igalassamut qilerussinera sumut assersuutaava? (b) Suna pissutigalugu Rahab iluartuutinneqarpa, sunalu kinguneraa?
8 Alapernaarsuisut Rahab qularnaveeqqutaasumik nalunaaqqutissaqartippaat ’qilerutissamik allunaasamik aappallarissumik’ igalassamut alapernaarsuisut qimaagamik aniffigisaanut qilerussassaanik. (Jôrsua 2:17-21) Nalunaaqqut taanna takutikkuniuk Rahab inoqutaalu Jerikop piuneerunneqarnerani annatsinneqartussaapput. Ullumikkuttaaq, Rahabimut assersuunneqartut annatsitaanissaminnut tunniulluinnarlutik kuisimallutillu Jehovamik pallorfiginninnertik ilisarnaatigisariaqarpaat. sarĸúmersitat 7:9, 10, 14-imilu allaatigineqarput, tassaasut ’amerlangaartut’ ’atisatik takisuut savaaqqap aavanik erroraat qaqorsarlugillu’. Jesusip aava pilliutitut kuisaq upperfigaat, upperfiginninnertillu takutillugu kristumiutut suliaqarnermikkut. (Rûmamiut 10:9, 10) Jâkup agdlagai 2:24, 25-mi atuarpugut: ’Takuvarsi inuk sulianit iluartuutitaasartoq uppernerinnarmillu pinnani. Aammattaaq Rahab akilersilluni atortittartoq sulianit iluartuutitaannginnerpa, aallartitat ilassigamigit aqqutikkullu allakkut aniguisillugit?’
9. (a) Rahabip ’suliai’ suunuku? (b) Ullumikkut ersisuitsumik nalunaajaanerup suut kingunerai?
9 Rahabip ’suliaasa’ ilagaat alapernaarsuisuutitanik marluusunik illersuinera inunnillu allanik illuminut isertitsinera annannissaannut. Taamatut ’amerlangaartut’ ullumikkut ittut ’inussiamik ilumoorlunilu silatuumik’ tanitaasumik unneqqarillutik tapersersuinertik ulapissutigaat, katersat taakku ’piffissaq eqqortoq nalliuttaraangat anersaakkut nerisassaqartitsisarneratigut’ naalagaaffimmillu silarsuarmi tamarmi oqaluussissutiginninnermik sulinermik nakkutiginninneratigut suleqatigalugit. (Matîuse 24:45-47, NW) Rahabip ersisuilluni ataatami inoqutai nalunaajaaffigai — naalli suliaq taanna aarlerinartorsiortitsisinnaagaluartoq, killuutigineqarsinnaagami. (Naleqqiuguk Matîuse 10:32-36.) Tamatumunnga assingusumik, ullumikkut nunat ilarpassuini malersorneqarfiusuni Jehovap Nalunaajaasui nalunaajaanerminni ersisuitsuusariaqarput. Tamanna amerlasuut katersorneqarsimanerannik kinguneqarsimavoq, qassiitigullu ilaqutariit tamarmiullutik Babylonimit angisuumit anisimapput Jehovamik pallorfiginninneq minguitsoq aalajangerfigilerlugu. — Tussiaat 73:28; 107:21, 22.
Jeriko — taamani maannakkullu
10. Taamani Jeriko qanoq immikkut pineqartussaava?
10 Pisimasut ilungersornartut tamakku allap tungaaniit isigeriartigik. ’Jerikoli matusimavoq parnaarsimallunilu Israelip kinguaanut; anisoqanngilaq isertoqaranilu.’ Kana’animiut illoqarfiisa Jehovap panaanit eqqartuussutaanik naammassinnissutaasumit eqqorneqartut taanna siullersaraat. Taamaakkami, inerittut siulliit Guutimut tunniunneqartussaasut assigalugit, immikkut pineqartussanngorpoq. Josuap tamanna nassuiarpaa: ’Illoqarfillu tassaniittullu tamarmik utertinnaveersagaassapput Jehovamut pigitillugit.’ — Jôrsua 6:1, 17; naleqqiukkit Môrsasip agdlagaisa áipait 22:29; Môrsasip agdlagaisa pingajue 27:26.
11. (a) Ullumikkut pisimasoq suna taassumunnga illua-tungiliuttutut malunnartumik assersuunneqarpa? (b) Babylonip angisuup ’annilaarnera’ ersersillugu suna assersuutigalugu taaneqarsinnaava?
11 Tamanna Babylonimut angisuumut naleqqulluinnarami, Babylon angisooq tassaammat eqqunngitsumik upperisarsiornerup silarsuarmi tamarmi naalagaaffissua ukiut 100-llit 20-ssaanni atukkatsinni toqoraattoqarfiusuni iluaasseruttortoq! Isaaffini matuniaraluarpai Jehovap Nalunaajaasuisa isernissaat pitsaaliniarlugu. Rahabip oqaasia issuarlugu, Guutip innuttaasa ’annilaarnartuat’ taassumunnga tussimavoq. Soorlu assersuutigalugu, aviisi Italiami saqqummersartoq La Repubblica 12. novemberi 1985-imi saqqummersoq imaattumik qulequtaqarpoq: „ILAGIIT KALERRISAARIPPUT JEHOVAP NALUNAAJAASUI ASSORTORLUGIT.“ Ilanngussami nalunaarutigineqarpoq ilagiinni katuullini Romalerisuni kardinalit ilaata Bolognami ataatsimiitsitsinera Jehovap Nalunaajaasuisa „aarlerinartorsiortitsinerat“ akerlilerniarlugu. Paavip kajumissaarilluni tapersersuininilu takutikkumallugu nalunaarasuaammik nassippai. Torlulaatigineqarpoq: „Silarsuarmi tamarmi ujameriareersimapput,“ nalunaarutigineqarlunilu „ilagiit piareerluinnarsarniartut“ „aarlerinartorsiortitsissut“ tamanna akiorniarlugu. Iluatsissanerpaalli? — Jerimia 1:17-19.
12. (a) Babylonimi angisuumi „guuti“ qanoq nassuiarneqartarpa, sallusuissulli naapertorlugu „Guuti“ qanoq nassuiarneqarluni? (b) Suna pillugu Jehova nalunaajaasuni illersorlugit sorsukkumaarpa?
12 Babylonimi angisuumi guuterparujussuit ularunnartumik amerlasuut, kristumiuuneraqatigiit guutianniit paasissaanngitsumiit ataasiullunilu pingasuusumiit nunani kangillerni upperisarsiortut guutiinut millionilippassuarnut. Josua atorfinitsinngikkallaramiuk Moses nalunaarsimavoq: ’Tusarnaarit, Israeli-aa, Jehova Guuterput Jehova ataasiuvoq.’ Ullumikkut Jehovap Nalunaajaasuisa kisimik ’Guuti ataaseq tamarmik ataatagisaat’ taanna naalannarsisippaat. (5 Môrsase 6:4; Evfisumiut 4:6) Jehova illersorluta sorsukkumaarpoq, soorlu Josuap Israelimilu siulersuisut unneqqarissut allat ulluini sorsuttarsimasoq. — 2 nalunaerssûtigdlit 20:15, 17; 32:7, 8; Isaia 54:17.
Eqqartuussutip naammassineqarnera
13. (a) Pisimasut suut Jerikop ungusarineqarnera inerneraat? (b) Tamakkununnga illua-tungiliullugit ullumikkut suut assersuunneqarpat?
13 Josua Jerikop ungusarineqarnissaanut peqqissaartumik piareersaavoq. Angutit puilasuitsumi alliartorsimasut kipineqartinneqarput. Taamaaliornerata assersuuppaa Jehovamut uummatikkut iluunngarluni tunniulluinnarnermut akornutaasinnaasunik tamanik taamaatitsinerat. (5 Môrsase 10:16; 30:5, 6) Poorskisiortaleqqipput. Manna tupinnartuliornikkut pissarsiarineqaraluartoq takkutissaarmat inuit nunap inerititai inuussutigilerpaat. Aammattaaq ’Jehovap katersarsuisa naalagaat’, qularnanngitsumik tassaasimassasoq Logos inuunngikkallarnermini ittoq, Josuamut takutippoq, isumalluarsarlugulu. Taassumalu najuunnera Josuap maniguulluni akueraa. Tamakkununnga tamanut illua-tungiliullugu Jehovap Nalunaajaasuinut ullumikkut pisimasut assersuunneqarput, suliassat naammassineqartariaqartut tamaviaarutigigamikkik misigisimasaannut. Anersaakkut inuussutissavut tamalaajoqalutillu pikkunarsisimapput ’inussiaq ilumoorlunilu silatooq’ Naalakkap Jesus Kristusip siulersuineratigut siumukartuartillugu. — Jôrsua 5:1-15.
14. Jerikop ungusarineqarnissaanut periaatsit eqqumiitsut suut Jehovap atoqquai?
14 Sorsuttoqarfik qiviaruk. Jehovap eqqumiitsumik periaaseqartippai! Ullut arfinillit ullormut ataasiarlutik Israelimi palasit Jeriko kaajallattarpaat, illerfik Jehovap najuunneranut assersuutaasoq ersullugu. Palasit arfineq-marluk savat anguteralaat nassui qarlortaatigalugit qarlortartuarlutik taakkua siornisigut ingerlapput, Israelikkullu sakkutuui siornaniillutik kingornaniillutillu ingerlapput. Ullulli arfineq-aappaanni ’makiaarput qaalersoq nuileraa’ illoqarfillu arfineq-marloriarlugu kaajallallugu. Jerikomiut ila sajussimassusii! — Jôrsua 6:2-15.
15. Tamakkununnga illua-tungiliullugu Jehovap Nalunaajaasuisa ullumikkut suliaat suut assersuunneqarpat?
15 Jehovap Nalunaajaasuisa nunarsuarmi tamarmi qanoq iliornerat tamatumunnga illua-tungiliuttutut malunnartumik assersuunneqarpoq. Ukiuni kingullerni naalagaaffimmut atatillugu sulinerput malunnartumik annertusisimavoq. 1985-ip tungaanut ukiuni tallimani pionerit 134 procentimik amerleriarsimapput. Pionerit amerlangaartuusut naalagaaffimmillu oqaluussisartut aalajaatsut allat eqqortumik oqaatigalugu ’makiaartarput’ aallussilluarlutillu Jehovap eqqartuussutaanik nalunaarutiginnittarlutik. Kristumiuuneraqatigiinni uppeqatigiit siulersuisuisa Nalunaajaasut ’inuiaat amerlasuut artornartuusoraat’. Palaseqatigiit annilaarput malugigamikku sallusuissummik nalunaarutiginninnerup inuit ilumoortumik uummatillit amerlasuut ilagiinnit aniumalersikkai Jehovamillu aalajangerfigisaqarumalersillugit. — Jûîtdle 2:1-3, 6.
16. (a) Jerikop piuneerunneqarnerani tupinnartuliat suut pippat? (b) Rahabip uppersusia qanoq akilerneqarpa?
16 Naggataatigut Josuap inuit inappai: ’Nilleritsi, Jehovap illoqarfik ilissinnut tunniummagu.’ Saassussillutik nipituumik suaarrapput. Nuna sajuppoq — tupinnangaartumillu — Jerikop qarmarsui uppipput. Israelikkut naalallutik pitoraapput uummassusillit illoqarfimmiittut tamaasa piuneerukkiartorlugit. Illoqarfik innermik ikikkarpaat. Ataguli! Qarmarsuit avalliit ilamininnguat uppissimanngilaq, igalaavaniipporlu qilerutissaq allunaasaq aappallarissoq. Rahab ataataatalu inoqutai ajoqusersimanngitsut anisinneqarput. Kingornatigut Rahabip uppersusia akilerneqaqqippoq Israelikkuusut ilaata Salmonip nuliarimmani aamma Jesus Kristusip siuaasaasa arnat ilagimmanni. — Jôrsua 6:16-26; Matîuse 1:5.
17. Tupinnartuliat taakku siumut sumut assersuutaappat?
17 ’Jehovallu Josua najorpaa, nunamilu tamarsuarmi tusaamasaalerpoq.’ Taamatut Jehovap aqqa naalannangaartoq qutsissisinneqassaaq ’annikilliornartussap angisuup’ aallartilernerani Babylon angisooq suujunnaarsinneqarpat pisuussuseerunneqarlunilu alutornassuseerunneqarlunilu. — Jôrsua 6:27; sarĸúmersitat 17:16; 18:9, 10, 15-17; Matîuse 24:21, 22.
Tunussisoq iluatsinngitsoorpoq
18. (a) Suna pissutigalugu ’inuit uummataat naasaangalerpat imertut isillutik’? (b) Ajornartorsiortoqaleruttormat Josua qanoq iliorpa?
18 Jerikomi ajugaarujussuarnerup kinguninnguatigut tupinnartumik pisimasoqarpoq. Saassussiartortut illoqarfik eqqaaniittoq Aj saassukkiartoqqullugu Josuap aallartitai ajugaaffigineqarput! ’Taava inuit uummataat naasaangalerput imertut isillutik.’ Josua paatsiveeruttoq qinulluni nillerpoq: ’Ata Naalagaq Jehova, . . . qanoq iliorumavit aqqit angingaartoq pillugu?’ — Jôrsua 7:2-9.
19, 20. (a) Akanip ’silaarsorluni iliornera’ Jehovap qanoq ililluni atortuujunnaarsippaa, Josualu qanoq qularunnaarsillugu? (b) Tamatumunnga illua-tungiliullugu ullumikkut pisimasoq suna assersuunneqarpa?
19 Taava Jehovap Josua paasitippaa Israelimi ’silaarsorluni iliortoqarsimaneranik’. Akan Judakkunneersoq pisuusutut paasineqarpoq. Jerikomi tiguakkat ilaat atisat Babylonimiut pii pitsaasut aammattaaq kuulti sølvilu tillissimavai. Jehovap Akan ’perlussiuppaa’, taannalu ilaqutaalu ujaqqanik milloorneqarput. Taava taakku pigisaallu innermik ikikkarneqarput. Jehovap eqqartuussutaanik naammassinninneq tamanna ataavartumik nalunaajaatissinniarlugu, Akanip qaanut ujaqqanik nappartitsipput, nunalu ateqartinneqarpoq „Akorip qoorua“-nik, ateq taanna isumaqarmat „Perlussiorneq; Ajornartorsiorneq“. Jehova Josuamut oqaqqippoq: ’Siooranak annilaarnatillu.’ Jehovap aqqa qutsissisinneqarpoq Josua sorsunnermi artorsaqqinngimmat. — Jôrsua 7:10-miit 8:1 ilanngullugu.
20 Akanip ajortuliaanut illua-tungiliuttumik ullumikkut pisimasoq assersuunneqarpa? Aap. Apustilip Paulusip mianersoqqusissutigai ’amaqqut sualuttut’ Guutip aaqqissuussineranik sumiginnaasut namminissarsiortumillu piumasaminnik iliortut. 1919-imiilli piumatuut taamaattut ilaatigut Guutip innuttaasa akornanni takkuttarput. Ungasinngitsukkut pisimasoq assersuutigalugu, 1970-ikkut qeqqanni utoqqaanertat pingaarnerusut ilaat naammagittaalliulerput. Illumit illumut angalaarnikkut nalunaajaaneq, naalagaaffik pillugu tusarliussaq nalunaarutigalugu Jesusip apustiliisa maligassiaat malillugu, imminnut nikanarsaataasutut isigaat. (apustilit suliait 5:42; 20:20, 21, 29, 30) Ajoqersuutinut Babylonimiorpaluttunut uternissartik ajunngissorat. Peqqusersuumik ’ulluni kingullerni’ inuunersugut qularnarsisinniarpaat Jehovallu Nalunaajaasuisa sulinerat akimmisinniarlugu. (2 Pîtruse 3:3, 4) Naggataatigut ilagiinnut ilaasortaajunnaarsinneqartariaqarput. — 2 Juánase 10, 11; naleqqiukkit Filípimiut 1:15-17; Eprîarit 6:4-8.
21. (a) 1970-ikkut naalerneranni sulinerup kigaallisimaneranut pissutaasunut suna ilaagunnarpa? (b) Taamanerniilli sulinerup ’tuaviortinneqarneranut’ suna pissutaasinnaasimassava?
21 The Watchtower-imi 15. juli 1979-imi saqqummersumi illumit illumut angalaarnikkut oqaluussisarnerup pissutigisaa Bibelimiittoq pingaaruteqassusialu nalunanngeqisumik takutinneqarput. 1980-ikkunni Nalunaajaasut unneqqarissut aallussilluarlutik siumukarput! Imaassinnaavoq tunussisorpaalunnguit ilagiinniinnerat pissutaasimassasoq Jehovap suliareqqusaata 1970-ikkut affaanni kingullerni kigaallisimaneranut — ukiunimi taakkunani Jehovap Nalunaajaasuisa oqaluussisartut ukiumut agguaqatigiissillugit amerlinerat procentimut ataatsimit minnerusumut apparsimavoq. Ukiunili tallimaasuni kingullerni ukiumut amerlissutit agguaqatigiissillugu procentinit arfinilinnit annerusarpoq. Naalagaaffimmik oqaluussisartut silarsuarmi tamarmi 1985-imi amerlanersaallutik 3.024.131-nngorput, 1975-imi naleqqiullugu 2.179.256-iullutik. Jehovap suliareqqusani ’tuaviuutigiuarpaa’! — Isaia 54:2, 3; 60:22.
22. Josuap allagai atuaqqitsillugit Jehovap aqqa pillugu suna akuerisariaqarparput?
22 Ilumoorpoq Jehovap aqqa nunarsuarmi tamarmi naalannangaarsisimammat! Allarpassuarnilli oqaluttuuppaatigut Josuap allagaasigut, soorlu takujumaaripput. — Isaia 42:8, 9. (wD 15/12 86)
Josuap allagaani —
□ Ullumikkut silarsuaq sumut assersuunneqarpa?
□ Rahab pillugu oqaluttuaq sumik ilinniarfigisinnaavarput?
□ Sulinitsinnut annertusisitaasunut suut assersuutaappat?
□ Jerikop piuneerunneqarnera siumut sumut assersuutaava?
□ Akanip ajortuliornerata passunneqarnerata suna takutitsiarpaa?