Angut qunusuitsoq

TAKUKKIT inuit angut inuusuttoq una quiassuaatigigaat! Kinaasoq nalunngiliuk? Tassa Jeremias. Guutip pruffiitiisa pingaarnerit ilagaat.

Kunngip Josiasip inuusalianik piiaalernerata kingunitsiannguagut Jehovap Jeremias imminut pruffiitinngoqquaa. Jeremiasili pruffiitiunissaminut inuusuppallaarsorivoq. Jehovali oqarpoq ikiorumaarlugu.

Jeremiasip Israelikkut oqarfigai ajortuliorunnaassasut. ’Guutit inuiaqatigiit allat guutisiorfigisaat guutipiluupput,’ oqarpoq. Israelikkulli ilarpassuisa inuusaliat pallorfigiumaneruaat Guuti ilumoortoq Jehova kiffartuukkumanagu. Jeremiasip nalunaarfigimmatik Guutip pillarumaaraatik ajortulioramik, illaatigiinnarpaat.

Ukiut ingerlapput. Josias toquvoq, qaammatillu pingasut qaangiuttut ernera Jojakim kunnginngorpoq. Jeremiasip inuit oqarfigisarpai: ’Iluarsinngikkussi Jerusalem piuneerukkumaarpoq.’ Palasit Jeremias tiguaat nilliallutillu: ’Taamatut oqalukkavit toqunneqartariaqarputit.’ Taava Israelimi naalagarsuit oqarfigaat: ’Jeremias toqunneqartariaqarpoq illoqarfipput ajoralugu oqalukkami.’

Jeremias qanoq iliorniassava? Qununngilluinnarpoq! Tamaasa oqarfigai: ’Jehovamuna taamatut oqariartoqqugaanga. Inuunerlunnersi allanngortinngikkussiuk Jehovap Jerusalem piuneerutissavaa. Manna qularutigissanngilarsi: toqukkussinga angut eqqunngitsumik iliorsimanngitsoq toqussavarsi.’

Naalagarsuit Jeremias toqunngilaat, Israelikkulli inuunerlunnertik allanngortinngilaat. Kingorna Nebukadnezarip, Babylonip kunngiata, Jerusalem saassukkiartorpaa. Israelikkut tamaasa inussianngortippai. Ilaat tuusintilippassuit Babylonimut aallaruppai. Ilaa qanoq ajoq inunnit takornartanit nunamut takornartamut aallarunneqarluni!