Nukappissat Babylonimi

KUNNGIP Nebukadnezarip Israelikkut pikkorinnersaat tamaasa Babylonimut aallaruppai. Taava kunngip pinnernersiorpai silatunersiorlugillu. Ilaat sisamat tassa nukappissat uani takusatit. Tassa Daniel, ilaallu Babylonimiut taasarpaat Sjadrak, Mesjak Abed-Negolu.

Nebukadnezar pilersaaruteqarpoq inuusuttut sungiusassallugit illussaarsuarmini kiffartornissaannut. Ukiut pingasut sungiusagaareerpata pikkorinnersaat qinerumaarpai siunnersuisunngortillugit. Kunngip nukappissat sungiusarneqarnerminni peqqissooqquai nukittuujoqqullugillu. Taamaattumik peqqussuteqarpoq nerisassanik pitsaasunik viinnimillu kunngikkormiut pisartagaasa assinginik nerisaqartinneqassasut.

Daniel inuusuttoq isigeriariuk. Kunngikkormiuni kiffaanermut Asjepenasimut qanoq oqartoq nalunngiliuk? Danielip oqarfigaa nerisassat mamarunarsaakkat kunngip nerisassaatai neriumanagit. Asjepenasili akunnattoorpoq. ’Kunngip nammineq nerisassasi imigassasilu aalajangersimavai,’ oqarpoq. ’Inuusuttutullu allatut peqqippasitsiginngikkussi immaqa toqussavaanga.’

Taava nakkutilliisoq Asjepenasip Danielimut ikinngutaanullu pingasunut paarsisunngortitaa Danielip ornippaa. ’Ullut qulit misilitsigut,’ oqarpoq. ’Naatitanik nerisassatsinnik imermillu imissatsinnik tunisartigut. Taava inuusuttunut allanut kunngip nerisassaataanik nerisartunut sanilliukkutsigut kikkut peqqippalunnerunersut takussavat.’

Nakkutilliisoq akuersivoq. Ullullu qulit qaangiummata Daniel ikinngutaalu pingasut inuusuttunit allanit tamanit peqqippalunnerupput. Taamaattumik nakkutilliisup nerisassanik naatitanik nerisarnissaannik akuerai kunngip nerisassaatai pinnagit.

Ukiut pingasut qaangiunneranni inuusuttut tamarmik Nebukadnezarimut sassartinneqarput. Tamaasa oqaloqatigereerlugit, kunngip Daniel ikinngutaalu pingasut pikkorinnerpaasut paasivai. Taamaattumik illussaarsuarminiitiinnarpai siunersiortarumallugit. Kunngillu apersoraangatik imaluunniit nalorninartumik paasiniagassaqartikkaangatik, Daniel, Sjadrak, Mesjak Abed-Negolu kunngip palasertaanit ilisimasortaanilluunniit quleriaammik ilisimasaqarnerusarput.