Pallorumanngitsut

INUUSUTTUT pingasut uku eqqaamavigit? Tassa Danielip ikinngutai kunngip nerisassaataanik nerisaqarumanngitsut. Babylonimiut taasarpaat Sjadrak, Mesjak Abed-Negolu. Maannali takoriakkit. Inuusaliarujussuarmut uunga inuit allat tamaasa assigalugit sooq-una pallorumanngitsut? Paasiniariartigu.

Inatsisit Jehovap nammineq allagai inatsisinik qulinik taaneqartut eqqaamavigit? Siulleq imaappoq: ’Allanik guutisiussanngilatit uangaanngitsunik.’ Inuusuttut taakkua inatsit tamanna naalappaat, naak inuunertik navianartorsiortikkaluarlugu.

Nebukadnezarip Babylonip kunngiata anguterpassuit pissaanillit aggeqqusimavai inuusaliaq nappartitani pallorfigiartoqqullugu. Aatsaannguummat tamaasa oqarfigai: ’Qarlortarpalunneq, kukkilattariarpalunneq allanillu nipilersorpalunneq tusalerussigik, pallussaasi inuusaliarlu kuultiusoq una pallorfigalugu. Kinaluunniit pallorumanngitsoq pallorfiginnikkumanngitsorlu ingerlaannaq aatsitsivimmut innerinnaasumut iginneqassaaq.’

Tusaramiuk Sjadrak, Mesjak Abed-Negolu pallorumanngitsut Nebukadnezar kamattorsuanngorpoq. Imminut sassaqquai sulilu periarfisseqqillugit pallornissaannut. Inuusuttulli Jehova tatigaat. ’Guutitta kiffartuussatta annaassinnaavaatigut,’ Nebukadnezar oqarfigaat. ’Annaatinngikkaluarpatigulluunniit inuusaliaatit kuultiusoq pallorfigissanngilarput.’

Tamanna tusaramiuk Nebukadnezar suli kamannerulerpoq. Eqqaani aatsitsiveqarpoq, peqqussuteqarporlu: ’Aatsitsivik kissatsissiuk kissatsittarnerata arfineq-marloriaataanik!’ Taava sakkutuuni nukittunerpaat peqquai Sjadrak, Mesjak Abed-Negolu qilersoqqullugit aatsitsivimmullu igeqqullugit. Aatsitsivik ima kissartigaaq sakkutuut pissarsuit innerup ikualanerinit toqunneqarlutik. Inuusuttummi pingasut taakkua igitaat?

Kunngi aatsitsivimmut qiviarpoq annilaaqalunilu. ’Angutit qilersukkavut aatsitsivimmullu igitavut pingasuinnaagaluarput, ilaa?’ aperaaq.

’Aap,’ kiffaasa akivaat.

’Angutilli sisamat innerup qeqqani ingerlasut takuakka,’ oqarpoq. ’Qilerussaarsimapput, uuneqanngillallu. Sisamaallu guutitut isikkoqarpoq.’ Kunngi aatsitsivimmut qanillivoq suaarlunilu: ’Sjadrak, Mesjak, Abed-Negolu! Guutip qutsinnerussaartup kiffai ukorsii, anillusi qaagitsi!’

Animmata uuneqanngitsut inuit tamarmik takusinnaavaat. Taava kunngi oqarpoq: ’Sjadrakip, Mesjakip Abed-Negollu Guutiat unnersiutigisiuk! Inngilini aallartippaa annaallugillu guutiginngisaminnut pallorumanngimmata.’

Jehovamut aalajaannerat uatsinnut maligassaalluarpoq, ilaa?