Ulloriaq siulersuisoq

ULLORIAQ qinngorsimasoq angutit ilaata tikkuagaa takusinnaaviuk? Ingerlavissaannik innersuuppai Jerusalemimit aallarmata. Angutit kangianit pipput, ulloriarsiortuullutillu. Upperaat ullorissap nutaap pingaartorujussuarmut siulersoraatik.

Jerusalemimut tikikkamik aperipput: ’Meeraq juutit kunngissaat sumiippa?’ „Juutit“ isumaqarpoq Israelikkut. ’Meeqqap ulloriaa pavani takuarput,’ angutit oqarput, ’pallorfigiartorparpullu.’

Herodesip, Jerusalemimi kunngiusup, tamanna tusaramiuk annilaaqaaq. Kunngimit allamit taarserneqarumanngilaq. Taava Herodesip palasiunerit qaaqquai aperalugillu: ’Kunngi neriorsuutigineqartoq sumi inunngussava?’ Akipput: ’Betlehemimi, Biibilimi allassimavoq.’

Taava Herodesip angutit kangianit pisut oqarfigai: ’Aallaritsi meerarlu ujarlugu. Nanigussiuk nalunaarfigigisinga. Uangattaaq pallorfigerusukkakku.’ Herodesilli meeraq naniumavaa toqunniarlugu!

Taava ullorissap angutit Betlehemimut siulersorpai, meeqqallu inaata qulaanut unilluni. Angutit illumut iseramik Maria Jesusinnguarlu nanivaat. Jesus tunissutinik tunivaat. Kingornali sinnattortillugit Jehovap angutit inerterpai Herodesimut uteqqunagit. Taamaattumik aqqutikkut allakkut nunaminnut angerlamut aallarput.

Angutit pavannga kangianit pisut angerlartut tusaramiuk Herodes kamattorsuanngorpoq. Peqqussuteqarpoq Betlehemimi naalungissat nukappiaqqat tamaasa marlunnik ukiullit ilanngullugit toqoqqullugit. Sulili piffissaagallartillugu Jehovap Josef sinnattortillugu mianersoqquaa, Josefilu ilani ilagalugit Egyptenimut aallarpoq. Kingorna tusaramiuk Herodes toqusimasoq, Maria Jesusilu ilagalugit Nazaretimut uterpoq. Tassani Jesus alliartorpoq.

Ullorissamik nutaamik qinngortitsisoq kinaasoraajuk? Eqqaamajuk ullorissap angutit siullermik Jerusalemimut siulersorai. Guutip ernera Satan Diaavulup toqukkumagaluarpaa, nalunngilaalu aamma kunngi Herodesip Jerusalemimiittup toqunniaraa. Taamaattumik ullorissamik qilammi qinngortitsisoq tassaasimassaaq Satan Diaavulu.