Jesusip inuunera ajoqersuineralu

Naakkittaatsumit qimaasut

SOORMI Josefip Maria unnuarsuarmi itersarpaa? ’Jehovap inngiliata aatsaannguaq saqqummerfigaanga,’ Josefip oqaluttuuppaa. ’Oqarporlu illillu meerannguarpullu ilagalusi Ægyptenimut qimaaqqulluta, Herodesip Jesus toqunniarumassammagu.’

Pingasuullutik qimaapput. Piffissaarutilerporlu, Herodesimmi paasilerpaa ulloriarsiortut salloqittarmanni nunalu qimareersimagaat. Eqqaamagunarpat Jesus nanisimagunikku Herodesimut nalunaarutigisimasussaagaluaraat. Maanna Herodes kamattorsuanngorpoq. Jesus toqunniarlugu aallartitsivoq nukappiaqqat tamaasa Betlehemimi eqqaanilu tamaginni ittut marlunnik ukioqartut inortullu toqoqqullugit. Ulloriarsiortut paasissutissiissutaat tunngavigalugit Herodes aalajangerpoq meeqqat marlunnik ukioqartut inortullu toqunneqassasut.

Naalungissat nukappiaqqat tamarmik toqorarneqarnerat takullugu amiilaarnartorujussuuvoq! Herodesip sakkutuuisa illut tulleriiaarlugit persuaalliorlutik iserfigaat. Nukappiaqqamillu naalungiarsummik takusaqaraangamik, anaanaata taliinit nusuttarpaat. Naalungissat toqutaat qanoq amerlatigisimanersut nalunaqaaq, anaanaasali qiangaarnerat Bibelimi siulittuummik pruffiitip Jeremiasip allassimasaanik eqquineruvoq.

Tamanna pitillugu Josef ilaalu Ægyptenimut apuulluarput, tassanilu najugaqalerlutik. Unnualli ilaanni Jehovap inngiliata Josef sinnattortillugu saqqummerfigeqqippaa. ’Makigit, Jesus arnaalu ilagalugit Israelip nunaanut aallarit,’ inngili oqarpoq, ’taassuminngami toqutsiniaraluartut toqupput.’ Taava Bibelimi siulittuutigineqartoq alla, Guutip ernerata Ægyptenimiit qaaqquneqarumaarnissaanik siulittuut, eqquutinneqarpoq ilaqutariit taakku nunavimminnut utermata.

Josef Judæami, Ægyptenimut qimaanngikkallaramik najugarisimasaminni, najugaqalivinniannguatsiaraluarpoq. Tusarpaali Herodesiugaluup ernera ajortoq Arkelaus Judæami kunnginngorsimasoq, sinnattortillugulu Jehovap navianarneranik sioorasaarpaa. Taamaattumik Josef ilaalu avannaaliarput illoqarfimmilu Nazaretimi najugaqalerlutik. Tamaani, juutit upperisarsiornerata qitianit ungasissumi, Jesus alliartorpoq. Mattæus 2:13-23; Jerimia 31:15; Húsia 11:1. (wD 15/7 85)

◆ Ulloriarsiortut utinngitsoormata, amiilaarnartorsuaq suna kunngip Herodesip peqqusissutigaa, Jesusili qanoq sernigineqarpa?

◆ Ægyptenimit uteramik, suna pissutigalugu Josef Betlehemimi najugaqaqqinngila?

◆ Piffissami tassani Bibelimi siulittuutigineqartut suut eqquutinneqarpat?