Jesus ajorunnaarsitsisoq

NUNA angallavigitillugu Jesusip napparsimasut ajorunnaarsittarpai. Tupinnartuliat tamakku illoqarfinni nunaqarfeeqqanilu tamaginni tusarliunneqartarput. Taava inuit iloqiaasut, tappiitsut, tusilartut napparsimasullu allarpassuit taassumunnga aattarpaat. Jesusillu tamaasa ajorunnaarsittarpai.

Johannesip Jesusimik kuisineraniit ukiut pingasut sinnilaarlugit qaangiupput. Jesusillu apustilini oqaluffigai ungasinngitsukkut Jerusalemimukassalluni, tassanilu toqunneqarumaarluni, taavalu toqusunit makikkumaarluni. Tamatumali tungaanut Jesus napparsimasunik ajorunnaarsitsiuartarpoq.

Sapaatit ilaanni Jesus ajoqersuivoq. Sapaat ulloq juutit qasuersaarfigisarpaat. Arnaq uani takusat napparsimasorujussuusimavoq. Ukiuni 18-ini peqingasimavoq, napparissisinnaananilu. Taava Jesusip assamminik attorpaa, erniinnarlu napparissivoq. Ajorunnaarpoq!

Upperisarsiornikkut pisortat tamanna kamaatigeqaat. ’Arfinilinnik ulloqarpoq suliffissatsinnik,’ ilaat inuppassuarnut katersuussimasunut suaarpoq. ’Ulluni taakkunani ajorunnaarsinneqarniarlusi aggertassaasi, sapaammi pinnasi!’

Jesusilli akivai: ’Inuuvusi ajortut. Ilassi kialuunniit siutituujutini sapaammi pituussaartarinnginnerpaa imeriartortillugu. Taava arnaq nallinnartoq una, ukiuni 18-ini napparsimasimasoq, sapaammi ajorunnaarsinneqassannginnerpa?’ Angutit ajortut taakkua Jesusip akissutaa kanngusuutigaat.

Kingornagut Jesus apustiliilu Jerusalemimut ingerlapput. Illoqarfiup Jerikop avatinnguani tappiitsut qinusartut marluk tusarpaat Jesus aggilersoq. Taava suaarput: ’Jesus-iaa, ikiortigut!’

Jesusip angutit tappiitsut imminut aggeqquai, aperalugillu: ’Uannut qanoq iliorfigeqquisi?’ oqarput: ’Naalagaq, isivut uisikkit.’ Jesusip isaasigut attorpai, erniinnarlu tappissipput! Nalunngiliuk suna pillugu Jesusip tupinnartuliat nuanningaartut tamakku tamaasa naammassisarai? Inuit asagamigit imminullu uppeqqullugit. Aamma qularissanngilarput kunngitut naalagaalerpat inuit nunamiittut napparsimaleqqissanngitsut.