Damaskusimut aqqutaani

NUNAMI nalasoq kinaasoq nalunngiliuk? Tassaavoq Saulus. Eqqaamassavat angutit Stefanusimut ujaqqanik milloortut annoraavi qallersaatit Saulusip paarimmagit. Takuuk qaamanersuaq! Susoqartoruna?

Stefanus toqunneqarmat Jesusip ajoqersugai ajoquserniarlugit malersuinermi Saulus siulersuivoq. Illut isaaffigalugit ujarpai uniarlugillu anisillugit parnaarussivimmullu parnaarullugit. Ajoqersukkat ilarpassui illoqarfinnut allanut qimaapput „nutaarsiassarlu nuannersoq“ oqaluussissutigalugu. Saulusili illoqarfinnut allanut aallarpoq Jesusip ajoqersugai ujarlugit. Maanna Damaskusiliarpoq. Aqqutaanili tupannartumik pisoqarpoq.

Tassanngaannaq qaamasup qilammit pisup Saulus avatangerpaa. Nunamut uppippoq, soorlu uani takusinnaagipput. Taava nipi tutsiuppoq: ’Saulus, Saulus-iaa! Sooq malersorpinga?’ Angutit Saulusip ilagisaasa qaamasoq takuaat nipilu tutsiuttoq tusarlugu, oqaasiili paasinagit.

’Kinaavit, Naalagaq?’ Saulus aperaaq.

’Jesusiuvunga malersukkat,’ nipi tutsiuppoq. Jesus taama oqarpoq ajoqersukkanimi Saulusip malersormagit, Jesusip misigaa soorlu nammineq malersugaalluni.

Taava Saulusip aperaa: ’Naalagaq, qanoq iliussaanga?’

’Nikuigit Damaskusimullu iserlutit,’ Jesus oqarpoq. ’Tassani oqarfigineqassaatit qanoq iliornissannik.’ Saulus nikuikkami uillunilu, sumilluunniit isigisaqanngilaq. Tappingersimavoq! Taava angutit ilagisaasa tasissiuppaat Damaskusimullu ingerlallugu.

Taava Jesusip ajoqersukkami ilaat Damaskusimiittoq oqaluffigaa: ’Makigit, Ananias. Aqqusinermut Narlusuumik taaneqartumut ingerlagit. Judasip illuani apeqqutigiuk Saulusimik atilik. Taanna qinigaraara immikkut kiffarissallugu.’

Ananiasip naalappaa. Saulus naapikkamiuk, assamminik attorpaa oqarlunilu: ’Naalakkap aallartippaanga kingumut isigisinnaaleqqullutit anersaamillu illernartumik ilumioqangaaleqqullutit.’ Tattaasannguillusooq isaanit nakkarmata, tappissivoq.

Saulus annertoqisumik atorneqarpoq inuit inuiaqatigiinnit amerlasuuneersut oqaluussiffigineqarneranni. Taagorneqalerpoq apustili Paulus; kingorna taanna pillugu suli amerlasuunik tusassaagut. Tusaqqaariartiguli suna naammasseqqullugu Guutip Peter aallartikkaa.