Ilagiit ‘pissutsit atugaat eqqissisimanarsipput’

1, 2. Saulusi Damaskusimi suniarpa?

ANGUTIT Damaskusiliartut kiinaannit takuneqarsinnaavoq pilersaarutipiloqartut. Jiisusip ilinniartitai angerlarsimaf­fiannit aniseriarlugit qilersor­niarpaat nikanarsarlugillu. Jerusalem­miliaan­niarpaammi juutit eqqartuus­siviisa qullersaannut sassartin­niarlugit.

² Angutit siuttuat Saulusimik ateqarpoq.a Taanna qanittukkut juutit ingasaas­siniartut Jiisusip ilinniar­titaanik aalajaatsumik Steffaanusimik toqutsinerannik akuerin­nillunilu isiginnit­tuusimavoq. (ApS 7:57–8:1) Taava Saulusip kristumiut Jerusalem­mimiittut malersulerpai. Aammali kristumiut illoqarfinni allaniittut malersorumallugit siulliulluni ujalerpai. Taakku ‘Aqqummik’ taaneqartartut ajoqutaasorigamigit nungutil­luinnar­niarpai. – ApS 9:1, 2; takuuk ungalusaq “Saulusip Damaskusimi oqartus­saanera”.

3, 4. (a) Saulusi qanoq misigisaqarpa? (b) Apeqqutit suut sammissavagut?

³ Tassanngaannaq Saulusi qaamanersuarmik qinngor­neqarpoq. Angalaqataasa qinngor­neqartoq takuaat, tupigusungaaramilli oqaaseqan­ngillat. Saulusi isigisaarulluni uppippoq. Nipi qilammit ima oqartoq tusaavaa: “Saulusi, Saulusi, sooq malersorpinga?” Annilaangaarluni Saulusi aperivoq: “Naalagaq, kinaavit?” Akissutaa tupassutigingaarsimassavaa, imami oqarpoq: “Jiisusi, malersukkat.” – ApS 9:3-5; 22:9.

⁴ Jiisusip Saulusimut oqaasii qanoq ilinniarfigaagut? Saulusip kristumiun­ngornerata nalaani pisunik misissuinerput qanoq iluaqutigisin­naavarput? Aamma tamatuma kingorna piffissamik eqqissisimaf­fiusumik kristumiut atorluaanerat qanoq ilinniarfigisin­naavarput?

“Sooq malersorpinga?” (ApS 9:1-5)

5, 6. Jiisusip Saulusimut oqaasiinit suna paasivarput?

⁵ Jiisusip Saulusi Damaskusiliartoq oqaluukkamiuk ima aperinngilaa: “Sooq ilinniar­titakka malersorpigit?” Imali oqarpoq: “Sooq malersorpinga?” (ApS 9:4) Aap, ersarippoq Jiisusip ilinniartitani naalliuk­kaangata misigin­neqatigalugit naallioqatigisarai. – Mat 25:34-40, 45.

⁶ Upperisat pillugu malersor­neqaruit qularis­sanngilat Jehovap Jiisusillu tamanna maluginiartaraat. (Mat 10:22, 28-31) Imaassinnaavoq maannak­korpiaq misilin­neqarnerit peerneqas­sanngitsoq. Eqqaamajummi Steffaanusip toqutaaneranut Saulusip pisooqataanera ilinniar­titanillu aalajaatsunik angerlarsimaf­fiannit anisitsisarnera Jiisusip isigigaa. (ApS 8:3) Ingerlaannarli pisunut akuliutinngilaq. Jehovalli Jiisusi aqqutigalugu Steffaanusi ilinniar­titallu allat aalajaat­tuarsin­naaqqullugit nakussatsippai.

7. Malersor­neqarnermi pinertusaarumallutit qanoq iliorsinnaavit?

⁷ Aamma illit malersor­neqarnermi pinertusaarsin­naavutit ima ilioruit: (1) Qanorluunniit pisoqas­sagaluarpat aalajaat­tuarniarlutit aalajangiusimajuk. (2) Jehovamut ikioqqusarit. (Flp 4:6, 7) (3) Akiniaanissaq Jehovamut isumagitiguk. (Rom 12:17-21) (4) Misilin­neqarun­naarnissavit tungaanut pinertusaarumallutit Jehovamit nakussatsin­neqarnissat upperiuk. – Flp 4:12, 13.

“Qatanngutiga Saulusi, Naalakkap … ilinnukar­tippaanga” (ApS 9:6-17)

8, 9. Anania suliassani pillugu qanoq misigisimassava?

⁸ Imminut ilisaritereerluni Jiisusi Saulusimut ima oqarpoq: ‘Nikueriarlutit illoqarfimmut iserit, tassanilu qanoq iliortariaqarninnik paasitin­neqassaatit.’ (ApS 9:6) Saulusi isigisaqan­ngitsoq tasiortilluni Damaskusiliaan­neqarpoq. Tassanilu ulluni pingasuni nerinanilu imernanilu qinujuarpoq. Tamatuma nalaani Jiisusi kristumiumut Damaskusimiittumut Ananiamik atilimmut Saulusi pillugu oqaluttuarpoq. Anania tassani ‘juutinit tamanit ajunngitsumik tusaamaneqarpoq’. – ApS 22:12.

⁹ Takorlooruk Anania qanoq misigisimassasoq. Ilagiinni niaquusumit, Jiisusimit Kristusimit makititaasimasumit, oqaluun­neqarpoq immikkullu ittumik suliassin­neqarluni. Ataqqinaaterujussuaq! Suliassalli mersernassusia! Anania oqarfigitikkami Saulusi oqaloqatigis­sallugu taanna pillugu ima oqarpoq: “Naalagaq, amerlasuunit tusarpara Jerusalemmimi kiffatit illernartut ajorluin­nartumik pisarai. Maanilu palasinit nuimasunit piginnaatin­neqarpoq illit atinnik tatigin­nittunik tamanik tigusarin­ninnissamut.” – ApS 9:13, 14.

10. Jiisusip oqaasiinit taanna pillugu suna ilikkarparput?

¹⁰ Anania isumakuluutiminik oqaatigin­ninnini pillugu Jiisusimit oqaaqqis­saarneqanngilaq. Jiisusilli ersarissumik ilitsersorlugulu misigin­neqataalluni oqaluttuuppaa sooq taamatut suliassin­neqartoq. Saulusi pillugu Jiisusi ima oqarpoq: ‘Taanna uanga atera pillugu allamiunut, kunnginut Israalillu qitornaanut oqaluus­sisussatut toqqarpara. Aterami pillugu naalliungaar­tariaqar­neranik ersarissumik takutissavara.’ (ApS 9:15, 16) Ananiap ingerlaannaq Jiisusi naalappaa. Saulusi malersuisimasoq ornillugu ima oqarfigaa: “Qatanngutiga Saulusi, Naalakkap Jiisusip maanngar­tillutit aqqummi ilinnut saqqummertup isigisaqaleq­qissinnaaq­qullutit anersaamillu illernartumik peqangaaleq­qullutit ilinnukar­tippaanga.” – ApS 9:17.

11, 12. Saulusip kristumiun­ngornera pillugu oqaluttuamit suut paasivagut?

¹¹ Oqaluttuami matumani Jiisusi, Anania Saulusilu pillugit arlalinnik paasisaqarpugut. Assersuutigalugu paasivarput Jiisusip neriorsuisimanermisut oqaluussineq siulersoraa. (Mat 28:20) Nalitsinni inunnut ataasiakkaanut oqalunneq ajoraluarluni inussiaq aalajaallunilu silatooq aqqutigalugu oqaluus­sinerput siulersortarpaa. (Mat 24:45-47) Oqaluus­sisartut pionerillu siulersuisoqatigiinnit ilitsersor­neqarlutik inuit Jiisusi pillugu paasisaqarusuttut ujartarpaat. Soorlu kapitalip matuma siuliani eqqaaneqartoq, inuit taakkua ilarpassui Guutimit siulersor­neqaqqullutik qinusimapput kinguninngualu Jehovap Nalunaajaasuinit saaffigineqarlutik. – ApS 9:11.

¹² Anania naalalluni Jiisusimit suliassin­neqarnerminik akuersigami pilluaq­quneqarpoq. Illit oqaluus­seqquneqarnerit naalattarpiuk, aamma merserigaluaraangak­kuluunniit? Nalunaajaasut ilaasa illumiit illumut inunnik nalusaminnik oqaloqateqar­nissartik annilaangagisarpaat. Allat suliffeqarfinni, aqqusinermi, oqarasuaatikkut allakkatigul­luunniit oqaluus­sinissartik annilaangagisarpaat. Ananiap annilaanganini qaangeramiuk Saulusi anersaamik illernartumik tunineqar­niassammat ikiorsin­naasimavaa.b Jiisusi tatigigamiuk Saulusilu uppeqatigilersin­naasamisut isigigamiuk suliassani naammassivaa. Uaguttaaq Anania ilaarlugu Jiisusip oqaluus­sinermik siulersuinera upperigutsigu, inuit misigin­neqatigigutsigit aamma allaat inuit siooranartut uppeqatigilersin­naasatsitut isigigutsigit annilaangajun­naarsin­naavugut. – Mat 9:36.

‘Jiisusi pillugu oqaluus­sisalerpoq’ (ApS 9:18-30)

13, 14. Biibilimik misissueqatigineqartaruit sulilu imermut morsutsitaanak Saulusi qanoq ilinniarfigisin­naaviuk?

¹³ Saulusi ilikkakkani maleruarumallugit iliuuseqapallappoq. Isigisaqaleq­qikkami imermut morsutsin­neqarpoq ilinniar­titallu Damaskusimiittut qanimut attaveqarfigilerlugit. Iliuuseqar­neruvorlu. ‘Synagogini Jiisusip Guutimit ernerineqarnera pillugu oqaluus­sisalerpoq.’ – ApS 9:20.

¹⁴ Biibilimik misissueqatigineqartaruit sulili imermut morsutsitaanak Saulusi ilaarlugu paasisatit maleruarlugit iliuuseqapal­lakkusuppit? Immaqali eqqarsarputit Saulusitulli Jiisusip tupinnar­tuliaanik misigisaqarsimanak. Ilumoorpoq Saulusip Jiisusip tupinnar­tuliaasa ilaat nammineq misigisimagaa, tamannalu qularnan­ngitsumik iliuuseqar­nissaminut kajumis­sissutigisimassavaa. Saulusili Jiisusip tupinnar­tuliortar­neranik isiginnit­tutuaasimanngilaq. Assersuutigalugu Jiisusip angut nukillaarsimasumik assalik ajorunnaarsimmagu farisiiarit ilaat isiginnit­tuupput, aamma juuterpassuit nalunngilaat Jiisusip Laazarusi toqusunit makitis­simagaa. Taakkuali ilarpassui iliuuseqar­nissaminnut kajumis­suseqan­ngillat allaallu ilaat akerlilersuillutik. (Mak 3:1-6; Joh 12:9, 10) Saulusili taakku assiginagit inuunerminik allannguil­luinnarpoq. Sooq allat taamaaliun­ngitsut Saulusi kristumiunngorpa? Guuti inunnit mianerinerugamiuk Jiisusimillu nallittor­neqarsimanini qujamasuutigingaarlugu. (Flp 3:8) Illit aamma taamatut iliuuseqaruit oqaluus­seqataanissannut imermullu morsutsitaanissannut piareer­nissannut sunaluunniit akornutaatis­sanngilat.

15, 16. Saulusi synagogini susarpa, aamma juutit Damaskusimiittut qanoq qisuariarpat?

¹⁵ Saulusi Jiisusi pillugu synagogini oqaluus­sisalermat inuit tupigusungaartut kamattullu takorloorsin­naavigit? Ima aperipput: “Taannaan­nginnerpa angut Jerusalemmimi atermik tamatuminnga tatigin­nittunik tamanik saassus­sisartoq?” (ApS 9:21) Saulusip sooq Jiisusi pillugu isiginnit­taatsiminik allannguisimanini nassuiarlugulu ‘Jiisusip Kristusiunera paasiuminartumik uppernarsartarpaa’. (ApS 9:22) Paasiuminar­tumilli nassuiaagaluarluni ileqqutoqqat malillugit inooriaaseqarusuttut makitasuul­luunniit killissin­naasimanngilai. Saulusili oqaluus­siunnaanngilaq.

¹⁶ Ukiut pingasut qaangiun­neranni juutit Damaskusimiittut suli Saulusi akerlilersorpaat. Maannalu toqunniarlugu pilersaarusiorput. (ApS 9:23; Kor 2. 11:32, 33; Gal 1:13-18) Saulusip taakkua pilersaarutipiluat paasigamiuk aalajangerpoq isertortumik illoqarfik qimanniarlugu. Taamaattumik koorimut ikeriarluni qarmarsuup igalaavatigut ammut ningitippoq. Saulusip qimaanerani ikiuisut taassuma ‘ajoqersugaanik’ taaneqarput. (ApS 9:25, Biibili 2000-mi naqitigaq) Taamatut taaneqarmata ilimanarpoq Saulusimut Damaskusimi tusarnaartut ilaat allannguillutik kristumiun­ngortut.

17. (a) Ilumoortut Biibilimeersut inuit qanoq qisuariarfigisarpaat? (b) Qanoq iliortuassaagut, aamma sooq?

¹⁷ Ilikkakkatit nuannersut ilaquttannut, ikinngutinnut allanullu oqaluttuareq­qaarakkit ilimagisimas­sagunaraluarpat ilumoortut Biibilimeersut paasiuminartut akuerissagaat. Immaqa ilaasa akueraat, inuppassuilli taamaan­ngillat. Allaammi immaqa inoqutivit ilaasa akeqqatut pivaatsit. (Mat 10:32-38) Biibilimilli tunngavilersueriaatsit pitsanngorsar­tuarukku pissuserit­tuaruillu ilinnik akerlilersuisut allanngorsin­naapput. – ApS 17:2; Pet 1. 2:12; 3:1, 2, 7.

18, 19. (a) Barnabap Saulusi ikiormagu qanoq kinguneqarpa? (b) Barnaba Saulusilu qanoq ilaarsin­naavagut?

¹⁸ Saulusi Jerusalemmimut pimmat kristumiut tassaniittut kristumiun­ngorsimanera soorunami ingerlaannaq upperin­ngilaat. Barnaballi Saulusip kristumiun­ngorsimanera uppernarsarmagu apustilit akueraat, Saulusilu piffissangaatsiami tassaniippoq. (ApS 9:26-28) Saulusip oqaluus­sinermini mianersoraluarluni nutaarsiassat nuannersut kanngusuutiginngilai. (Rom 1:16) Sapiilluni Jerusalemmimi oqaluussivoq, naak tassanerpiaq siornatigut kristumiunik malersuingaar­nikuugaluarluni. Juutit Jerusalem­mimiittut isumaqarsimagaluarput Saulusi kristumiut nungutin­neqarniar­neranni siuttuussasoq. Paasigamikkuli kristumiun­ngorsimasoq kamangaalerput toqunniaraluarlugulu. Biibilimili ima allassimavoq: ‘Qatanngutit tamanna paasigamikku Cesariiamut ateqatigeriarlugu Taarsusimut aallartippaat.’ (ApS 9:30) Ilagiit aqqutigalugit Jiisusip siulersuinera Saulusip naalappaa. Tamannalu nammineq ilagiin­niittullu iluaqutigaat.

¹⁹ Maluginiaruk Saulusi ikiorniarlugu Barnaba iliuuseqartoq. Ajunngitsuliornera pissutigigunarlugu Jehovamut kiffartortut aallussil­luartut taakku ikinngutigiil­lualerput. Illit Barnaba ilaarlugu oqaluus­sisartun­ngorlaat oqaluus­seqatigisarpigit, kajumil­lutillu anersaakkut ineriar­tornerannik ikiortarlugit? Taamaaliortaruit pilluaq­quneqangaassaatit. Illit oqaluus­sisartun­ngorlaajuguit Saulusi ilaarlugu allanit ikiorneqarumagaangavit akuerisarpiuk? Oqaluus­sisartut misilit­tagaqar­nerusut oqaluus­seqatigisarukkit oqaluus­sillaqqin­nerulissaatit, nuannaar­nerulissaatit inuunivillu sinnerani atasussanik ikinngutitaas­sallutit.

‘Amerlasuut Naalakkamut uppertun­ngorput’ (ApS 9:31-43)

20, 21. Kristumiut siulliit nalaanni nalitsinnilu Guutimut kiffartortut ‘pissutsit atukkatik eqqissisimanarsisarnerat’ qanoq atorluarsimavaat?

²⁰ Saulusip kristumiun­ngornerata Jerusalem­mimiillu ajoqusernani qimagunnerata kingorna ‘Judiiami, Galiliiami Samaariamilu tamarmi ilagiit pissutsit atugaat eqqissisimanarsipput’. (ApS 9:31) Ilinniartitat ullut atugaris­saarfiusut taakku qanoq atorluarpaat? (Tim 2. 4:2) Biibilimi allassimavoq anersaakkut ineriar­tulersut. Ilagiin­niittut “Jehova mianeralugu kiffartorfigaat, anersaamit illernartumit nakussatsin­neqartarput” apustiliniillu ilagiinnilu akisussaaf­filinnit allanit uppernikkut nakussatsin­neqarlutik. Assersuutigalugu Petrusip ilinniartitat Lyddami Saaronnillu narsartaani najugallit nakussatsippai. Taamaaliormat tamatuma eqqaani najugallit amerlasuut “Naalakkamut uppertun­ngorput”. (ApS 9:32-35) Kristumiut nammineq iluaqutissartik piinnarnagu uppeqatiminnik isumagin­nittarlutillu oqaluus­seqatigiittarput. Tamatuma kingunerisaanik ‘amerliar­tortuarput’.

²¹ Kristumiut siulliit pisimaneratulli 1990-ip missaani Jehovap Nalunaajaasuisa nunarpassuarni ‘pissutsit atugaat eqqissisimanarsipput’. Naalakkersuisut taakkuninnga ukiorpassuarni malersuisimasut tassanngaannaq pissaaneerupput, taamaat­tumillu nunani oqaluus­sinermik inerteq­qutaaffiusuni oqaluussineq ajornan­nginnerulerpoq nunallu ilaanni inerteq­qutaajun­naarluni. Nalunaajaasorpassuit tamanut ammasumik oqaluus­sinissaminnut periarfissartik atorluarpaat, inuppassuillu tusarnaarput.

22. Killilersugaan­nginnerit qanoq atorluarsin­naaviuk?

²² Oqaluus­sinermi killilersugaan­nginnerit atorluar­tarpiuk? Nunami upperisarsiornikkut killilersugaaf­fiunngitsumi najugaqaruit Saatanip pisuunngorusun­nissamut usserusus­savaatit, Guutip kunngeqarfia salliutin­nginnias­sagakku. (Mat 13:22) Allamut saasarteqinak. Piffissamik eqqissisimaf­fiusumik maanna atugaqaruit tamanna atorluaruk. Oqaluus­sinissamut ilagiinnilu nakussatsitsinissamut periarfissatut isigiuk. Eqqaamajuk pissutsit atukkatit allanngoriataarsin­naammata.

23, 24. (a) Tabitta pillugu oqaluttuamit suut ilikkarpagut? (b) Suna aalajangiusimas­savarput?

²³ Arnaq kristumiu Tabittamik atilik, aamma Dorkasimik taaneqartartoq, pillugu oqaluttuaq sammeriartigu.c Taanna Lyddap ungasin­ngitsuani illoqarfimmi Jorpami najugaqarpoq. Qatanngutip aalajaatsup taassuma piffissani pigisanilu atorluarpai ‘amerlasuunik ajunngitsulior­tarnermigut piitsunullu tunissuteqar­tarnermigut’. Tassanngaannarli napparsimalerami toquvoq. Alianassusia! Toqunera kristumiut Jorpamiittut, ingammik uillarnerit taassumannga ajunngisaarfigineqarsimasut, aliasuutigingaarpaat. Petrusi qaaqquneqarluni illumut Tabittap timaata ilisaanissamut piareersar­neqarfianut iserpoq. Petrusi qinoriarluni tupinnar­tuliorluni Jiisusip apustiliinit siullersaalluni toqusunit makititsivoq Tabitta uummarteq­qillugu. Takorlooruk Petrusip uillarnerit kristumiullu allat iseqqusaasa Tabitta uummarsimasoq takugamikku qanoq nuannaar­tigisimassasut. Pisut taakku nakussatsis­sutigisimassavaat. Taamaat­tumillu kingusin­nerusukkut ajornar­torsiuleramik pinertusaarsin­naasimapput. Tupinnartuliaq tamanna “Jorpami tamarmi ilisimaneqalerpoq, amerlasuullu Naalakkamut uppertun­ngorput”. – ApS 9:36-42.

²⁴ Tabittamik oqaluttuamit killitsin­nartumit pingaarutilinnik marlunnik ilikkagaqarpugut. (1) Inuunerput allanngoriataarsinnaavoq. Taamaattumik pisinnaagal­lartilluta Guutimit ajunngitsumik tusaamaneqarnissap sulissutiginissaa pingaaruteqarluinnarpoq! (Oqal 7:1) (2) Toqusimasunik makititaasoqarnissaa upperil­luinnarsin­naavarput. Tabittap ajunngitsuliarpassui Jehovap maluginiarsimal­lugillu pilluaqquaa. Aamma uagut Harmagedonni sioqqullugu toqussagaluarutta Jehovap ilungersornerput eqqaamassavaa toqusunillu makitis­salluta. (Hebr 6:10) Taamaattumik erloqinar­torsioraluarutta pissutsil­luunniit atukkagut eqqissisimanaraluarpata Jiisusi pillugu oqaluus­siuarnissarput aalajangiusimatigu! – Tim 2. 4:2.