Anersaat silarsuaanni pikitsitsineq

Anersaat Jehovap pinngortitai tamarmik ajunngitsuupput. Inngilili ataaseq ajortunngorpoq. Taanna tassaavoq Satan Diaavulu. Satanip kissaatigaa inuit nunamiittut Jehova pinnagu nammineq pallorfigissagaanni. Ima pisoqarsimavoq:

Edenip naatsiiviani orpeqaqaaq mamarluinnartunik paarnalinnik. Jehovap Adam nulialu oqarfigai tamakkuninnga nerisinnaasut. Orpilli aalajangersimasoq ataaseq neriffigeqqusaanngilaq. Guuti oqarpoq neriffigigaluarunikku toqussasut. — 1 Moses 2:9, 16, 17.

Ullut ilaanni Eva kisimiitillugu pulateriaarsuup oqaluffigilerpaa. Soorunami pulateriaarsuk nammineq oqalussinnaanngilaq; Satan Diaavulup pulateriaarsuk oqaluttuusaartippaa. Satanip Eva oqaluttuuppaa orpik neriffigeqqusaanngitsoq neriffigigaluaruniuk Guutisut ilisimasaqartigilissasoq. Aamma oqarpoq toqunavianngitsoq. Oqaasii taakku tamarmik salluupput. Evalli Satan upperalugu paarnaq nerivaa. Kingorna Adam tamatuminnga tunivaa, taannattaarlu nerivoq. — 1 Moses 3:1-6.

Oqaluttuap ilumoortup tamatuma takutippaa Satan pikitsitsisuullunilu sallusuusoq. Eva oqarfigaa Guutimut naalanngikkaluaruni toqussanngitsoq. Tamanna salluneruvoq. Adamilu marluullutik toqupput. Satan taamanikkut toqunngikkallarpoq, toqujumaarlunili ajortuliorsimagami. Sulili anersaajuvoq inuillu tammartittarlugit. Suli sallusarpoq inuillu Guutip inatsisaanut unioqqutitsinissaannut kajumissaartarlugit. — Juánase 8:44.

Inngilit allat pikitsitsilerput

Kingorna inngilit allat ajortunngorput. Inngilit taakku nunami arnat pinnersut malugilerpaat kinguaassiuutitigullu atoqatigiumallerlugit. Nunamut pipput angutitullu timeqalerlutik. Taava arnat nulissiuttalerpaat. Taamaaliornerat Guutip siunertaanut naapertuutinngivippoq. — 1 Moses 6:1, 2; Jûtarse 6.

Tamatuma aamma inuit ajornartorsiungaalersippai. Inngilit taakkua nuliaat qitorniorput, qitornaalli nalinginnaanngillat. Alliartoramik inorujussuanngorput nakuuserlutik persuttaasartut. Naggataatigut nunarsuaq ima nakuuserfiutigilerpoq Jehova aalajangerluni inuit ajortut ulersuarmik nungutinniarlugit. Noa naapertuilluartoq ilaqutaalu kisimik ulersuarmit aniguipput. — 1 Moses 6:4, 11; 7:23.

Inngililli ajortut toqunatik anersaat silarsuaannut uteqqipput, pillarneqarlutilli. Guutip ilaqutariissortaanut inngilinut naapertuilluartunut uteqqusaajunnaarput. Aammalu Jehovap inuttut timeqaleqqissinnaajunnaarsippai. Eqqartuutiffissami toqujumaarput. — 2 Pîtruse 2:4; Jûtarse 6.

Satan qilammit igitaavoq

Ukiut hundredellit maanna atuuttut aallartinneranni qilammi sorsuuttoqarsimavoq. Biibilimi sarĸúmersitat-ni pisimasoq tamanna ima oqaluttuarineqarpoq: ‘Qilammilu sorsuuttoqalerpoq: Mikaelip inngiliisalu kuukkooriaasarsuaq sorsulerpaat, aammattaaq kuukkooriaasarsuaq taassumalu inngilii sorsupput. Artorsarpulli, qilammilu najugassarsisinneqarunnaarput. Igitaavorlu kuukkooriaasarsuaq angisooq, pulateriaarsutoqaq Diaavulumik Satanimillu taaneqartoq, inuit najugaanni nunalinnik tamanik tammartitsiniartoq; nunamut igitaavoq, inngiliilu taassumunnga ilanngullugit igitaapput.’

Qanoq kinguneqarpa? Oqaluttuaq nangippoq: ‘Tamanna pillugu qilaat taakkunanilu ineqartusi ukorsii, tipaatsugitsi.’ Inngilit ajunngitsut nuannaarsinnaanngorput Satan inngilipiluillu imaluunniit anersaapiluit qilammiikkunnaarmata. Inuimmi nunamiittut? Biibilimi ima allassimasoqarpoq: ‘Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ — sarĸúmersitat 12:7-9, 12.

Aap, Satan ajortoqataalu nunarsuarmiunik tammartitsisarput naalliuuteqangaartitsillutillu. Inngilit ajortut taakku inngilipilunnik taaneqartarput. Guutimut akeraapput. Tamarmik ajortuupput.