Ajortumit pisut

INNGILIPILUIT inunnut sunniinerat Biibilimi nassuiarneqarmat ajussuseq pillugu apeqqutissat tunngaviunerusut akiuminaakkaluaqisut akineqarluarput. Assersuutigalugu, eqqarsaatigeriakkit International Herald Tribune-mi Balkanimi sorsunneq pillugu allassimasut makku: „EF-imit misissueqatigiit isummersimapput [sakkutuut] arnat niviarsiaqqallu musliimiusut 20.000-t tikillugit pinngitsaalillugit arneriffigisimagaat . . . annilaartinniarlugit, ilatsiinnalersinniarlugit angerlarsimaffiannillu qimaatinniarlugit.“

Atuagassiami Time-mi tamanna ima nassuiarniarneqarpoq: „Sorsunneqartillugu angutit inuusuttut pinngitsaaliillutik arnerisarput sakkutuunut utoqqaanerusunut naalakkaminnullu iluaritinniarlutik, taamaalillutillusooq ’ernertut ataataminnit’ iluarisaajumallutik. Pinngitsaaliilluni arnerineq tassaavoq sakkutooqatigiit peqqarniissusiannut ilaalernermut uppernarsaat. Angut inuusuttoq amiilaarnartunik iliuuseqarsimaguni nammineq nalunngeqatiginnissutsi nigortittarpaa sakkutooqatimi piumasaannut naalatsigitinniarluni. Angutip peqqarniitsuliornermigut ilumoorsutsi uppernarsartarpaa.“

Kisianni suna pillugu ’sakkutooqatigiit piumasaat’ sakkutuut inuttut ataasiakkaat nalunngeqatiginnissusiannit ajortunngornerusarpa? Inuit amerlanersaasa ataasiakkaatut inoqatitik eqqisseqatigerusuttarpaat. Taavali sorsunneqartillugu sooq inuit pinngitsaaliillutik arnerisarpat, anniartitsisarlutik toqutsisarllutillu? Pissutigisat pingaarnerusut ilaat tassa inngilipiluit sunniuteqarnerat.

Inngilipiluit sunniuteqartut paasigutsigu ’upperisarsiornermik ilisimatuut apeqqutigisaannik’ taaneqartunut akissut aamma nassaarisinnaavarput. Apeqqut tamanna tassa qanoq ililluni pingasut makku imminnut naapertuuttunngorsinnaanersut: (1) Guuti ajugaqanngitsuuvoq; (2) Guuti asannittuullunilu ajunngitsuuvoq aamma (3) annilaarnartunik pisoqartarpoq. Ilaat isumaqarput taakkua ilaat marluinnaat imminnut naapertuussinnaasut, tamarmiunngitsulli. Guutip oqaasiani akissutissaqarpoq, akissummullu tamatumunnga anersaat takussaanngitsut, ajortumit pisut, ilaapput.

Pikitsitsisoq siulleq

Biibilimi oqaluttuarineqarpoq Guuti nammineq anersaajusoq. (Juánase 4:24) Taassuma anersaat allat millionikkuutaat, ernerit inngiliusut, pinngortissimavai. Guutip kiffaata Danielip takorluukkami inngilit 100 millionit takusimavai. Guutip pinngortitai anersaajusut tamarmik naapertuilluarlutillu piumasaanut isumaqataapput. — Daniel 7:10; Eprîarit 1:7.

Tamatuma kingorna Guutip ’nunarsuaq tunngavilermagu’ erneri inngiliusut ’tussiaqatigiillutik nipertik illugalugu qiimmattarsimapput’. (Job 38:4-7) Taakuali ilaata ataatsip pallorfiginninneq Pinngortitsisup eqqortumik pisassarisaa namminersuutigalugu tigorusulerpaa. Guutimut pikitsitsigami inngili taanna imminut sataninngortippoq (isumaqartoq „assortuisoq“) diaavulunngortillunilu (isumaqartoq „mamarliisoq“). — Naleqqiuguk Hesekiel 28:13-15.

Edenip naatsiiviani arnaq siulleq pulateriaarsuk aqqutigalugu oqaluffigalugu Satanip kajumissaarpaa Guutip naatsiivimmi orpik aalajangersimasoq neriffigeqqunagu toqqaannartumik peqqussutaa naalaqqunagu. Kingusinnerusukkut uiata ilaaqquffigaa. Taamaalillutik inuit aappariit siulliit inngili taanna Jehovamut pikitsitseqatigisimavaat. — 1 Moses 2:17; 3:1-6.

Edenimi pisimasut naalannissamut ilinniutaannaanngillat, aammali taamanikkut Satan ileqqussanut tunngasutigut marlunnik apersuusiivoq. Siullermik Satanip Jehovap pinngortitaminut naalagaanera naapertuilluartuunersoq taakkununngalu iluaqutaanersoq apeqquserpaa. ’Immaqa ajunnginnerussagaluartoq inuit namminersorpata.’ Aappassaanik Satanip apeqquserpaa pinngortitat silassorissut Jehovamut ilumoortuassanersut naalannertik nunap piinik iluanaarutigissanagu paasigunikku.a

Edenimi apeqqutaalersinneqartut paasilluarutsigik Jehovallu pissusii nalunagit ’upperisarsiornermik ilisimatuut apeqqutigisaat’ akisinnaassavarput, tassa Guutip pissaanera asanninneralu ajussuseqarnermut naapertuuttunngorsarsinnaallugit. Ilumoorpoq Jehova killeqanngitsumik pissaaneqartoq asannilluinnartuullunilu, aammalu ilisimatuullunilu naapertuilluarpoq. Pissutsit taakku sisamat oqimaaqatigiissilluinnarlugit atortarpai. Taamaattumik pissaanini akiugassaanngitsoq atorlugu pikitsitsisut pingasut ingerlaannaq suujunnaarsissimanngilai. Taamaaliorneq naapertuilluassagaluarpoq silatusaarnerunanili asannittuliornerunaniluunniit. Aammalu isumakkeerfiginniinnanngilaq puiguiinnaranilu, taamaaliorneq ilaasa asannittuliornerusorissagaluaraat. Taamaaliornerli silatusaarnerunanilu naapertuilluartuliornerunngilaq.

Satanip apeqqutaalersitai akiniarlugit piffissaq pisariaqarpoq. Piffissaq pisariaqarpoq takutinniarlugu inuit Guutimut atanatik namminersorlutik naalakkersuilluarsinnaanersut. Pikitsitsisut pingasut inuugallartikkamigit, Jehovap aamma pinngortitat periarfissaqartippai atukkani artornartuni Guutimut aalajaallutik kiffartuussinermikkut Satanip oqaatigisaasa ilumuunnginnerannik uppernarsaanissaannut.b

Jehovap Adam Evalu ersarilluinnartumik oqarfigisimavai paarnaq neriffigeqqusaanngitsoq neriffigigaluarunikku toqussasut. Toqusimappullu, naak Satanip Eva neriorsoqqissaarsimagaluaraa toqussanngitsoq. Satanittaaq toqutassaatinneqareerpoq; toqutaanissaminut utaqqinermini inuit tammartinniartarpai. Aap, Biibilimi ima allassimavoq: ’Silarsuaq tamaat ajortup pissaaneqarfigaa.’ — 1 Juánase 5:19, NV; 1 Moses 2:16, 17; 3:4; 5:5.

Inngilit allat pikitsitsipput

Edenimi pisimasut kinguninnguanni inngilit allattaaq Jehovap kisimi oqartussaaneranut pikitsitseqataalerput. Biibilimi ima allassimavoq: „Inuit nunarsuarmi amerliartorlutik panissaartalermata guutit inuit panii isigilerpaat pinnaralugit pileritsaassatillu nulissiuttarlugit.“ Allatut oqaatigissagaanni inngilit taakku ’pissusereqqaagartik aalajangerfiginagu [qilammi] inigisartik qimappaat’, inuttut timeqalerlutik nunamut pillutik arnanillu atoqateqarnissartik nuannaapiluutigalugu. — 1 Moses 6:1, 2; Jûtarse 6.

1 Moses 6:4-mi oqaluttuaq ima nangippoq: „Taamani guutit inuit panii innaattarallarmatigit qitornartaarfigalugillu nunarsuarmi inorujussuaqarpoq. (Kingornalumi aamma inorujussuaqartarpoq.) Tassaapput pissarsuit itsarsuarli tusaamasat.“ Inngilit arnallu erneri taakku pissusissamisuunngitsut ’pissarsuupput’. Inorujussuupput nakuusertut, Nephi·limʹ-imik taaneqarlutik, oqaaseq hebriiarisooq isumaqartoq „allanik nakkartitsisartut“.

Malugineqartariaqarpoq pisimasut taamaattut kingusinnerusukkut inuiaat atugartuussusillit oqaluttualiaataanni eqqartorneqartut. Assersuutigalugu Babylonimiut itsaq pissarsualersaarutaasa ilaanni ukiut 4.000-t matuma siorna allanneqarsimasumi eqqartorneqarpoq Gilgameship, guutiusap pissarsuup nakuusertup, sapiitsuliorneri. Oqaluttuarineqarpoq taassuma ’pilerissusia pisuulluni niviarsiaq kinaluunniit asasaminut qimaannarneqarneq ajortoq’. Aamma eqqartorneqarsinnaavoq griikeritoqqat oqaluttualiaanni pissarsuaq Herkules (imaluunniit Herakles). Guutigisaq Zeus ataatagalugu inullu Alkmene anaanagalugu, taanna niaqulaarluni nuliani qitornanilu toqoriarlugit aallarsimavoq peqqarniitsuliorfissarsiorluni. Naak oqaluttualiat tamakku ukiut ingerlaneranni allanngoriartuaartinneqarsimagaluartut Biibilip Nefilimit taakkualu ataataat inngiliusut pikitsitsisut pillugit oqaluttuaanut naapertuupput.

Ilaatigut inngilit ajortut ernerisalu pissarsuit sunniuteqarnerat pissutigalugu nunarsuaq nakuusernermik ima ulikkaartigilermat Jehova aalajangersimavoq silarsuaq ulersuarmi aserussallugu. Nefilimit inuit guutiitsut tamaasa ilagalugit nungussimapput; Noa naapertuilluartoq ilaqutaalu kisimik aniguisimapput. — 1 Moses 6:11; 7:23.

Inngililli ajortut toqusimanngillat. Inuttut timitik iperarpaat anersaallu silarsuaannut uterlutik. Naalannginnertilli pissutigalugu Guutip inngilinik naapertuilluartunik ilaqutarissortaanut utersinnaanngillat; aamma Noap nalaanisut inuttut timeqaleqqinnissaminnut periarfissaarupput. Sulili inuiaat ajunaarutaasumik sunnertarpaat ’anersaapiluit naalagaata’ Satan Diaavulup siulersuineratigut. — Matîuse 9:34; 2 Pîtruse 2:4; Jûtarse 6.

Inuiannut akeraasut

Satan inngilipiluilu naakkittaallutillu toqutsisuujuaannarsimapput. Jobip, angutip ’assuarnaallunilu peqqusersuitsup Guutimillu mianerinnittup ajortumik iliuuseqarnaveersaartup’, nersutaatai kiffaalu Satanip toqutissimavai. Kingornalu Jobip qitornai qulit toquppai ’anorersuaq’ atorlugu illu isersimaffigisaat aserorlugu. Taavalu Satanip Job naalliutsippaa ’perlutsillugu ajuarsuarnik aluinit kasseranut’. — Job 1:7-19; 2:3, 7.

Inngilipiluit aamma taama ajortigipput. Jesusip nalaani inuit oqajuitsunngortittarlugillu tappiillisittarsimavaat. Angut ataaseq ujaqqanik imminut tilluartissimavaat. Nukappiaraq nunamut ’noqartissimavaat uppitillugu’. — Lúkarse 9:42; Matîuse 9:32, 33; 12:22; Mákorse 5:5.

Silarsuaq tamakkerlugu nalunaarutit taakkua naakkittaassusiannut uppernarsaataapput. Inuit ilaat nappaatinik naalliutsittarpaat. Allat unnuakkut oqimangertittarpaat, sinissaarutsittarlugit imaluunniit sinnattupilutsittarlugit. Allat kinguaassiuutitigut atornerluttarpaat. Aammaattaaq niaqulaalersittarpaat, toqutsisittarlugit imaluunniit imminortittarlugit.

Suli qanoq sivisutigisumik akuerineqassappat?

Satan inngilipiluilu soraajuitsumik akuerisaassanngillat. Pissutissaqarluarluni Jehovap ulloq manna tikillugu piunerat akuerisimavaa, maannakkulli piffissaarutilerput. Ukiut hundredellit maanna atuuttut aallartinneranni taakkua iliuuseqarfigisinnaasaat annertuumik killilerneqarsimavoq. Biibilimi sarĸúmersitat-ni ima nassuiarneqarpoq: ’Qilammilu sorsuuttoqalerpoq: Mikaelip [Jesus Kristusip makissimasup] inngiliisalu kuukkooriaasarsuaq [Satan] sorsulerpaat, aammattaaq kuukkooriaasarsuaq taassumalu inngilii sorsupput. Artorsarpulli qilammilu najugassarsisinneqarunnaarput. Igitaavorlu kuukkooriaasarsuaq angisooq, pulateriaarsutoqaq Diaavulumik Satanimillu taaneqartoq, inuit najugaanni nunalinnik tamanik tammartitsiniartoq; nunamut igitaavoq, inngiliilu taassumunnga ilanngullugit igitaapput.’ — sarĸúmersitat 12:7-9.

Suna kinguneralugu? Oqaluttuaq ima nangippoq: ’Tamanna pillugu qilaat taakkunanilu ineqartusi ukorsii, tipaatsugitsi.’ Inngilit naapertuilluartut tipaatsussinnaapput Satan inngilipiluilu qilammiikkunnaarmata. Inuilli nunamiut? Biibilimi ima allassimavoq: ’Eqqanaq nuna imarlu, Diaavulu ilissinnut aqqarmat kamattorsuulluni, piffissakissutsi nalunnginnamiuk.’ — sarĸúmersitat 12:12.

Unitsinneqartinnatik Satan inngilipiluilu kamallutik sapinngisamik ajoqusiiniarput. Ukiuni hundredelinni makkunani sorsunnersuit marluk pisimapput sorsunnersuullu kingulliup kingorna 150-it sinnerlugit sorsunneqarsimavoq. Oqaatsit nutaanerusut ersersippaat nakuusernersuaq qanoq ittoq inuuffigisatsinni pisartoq: „bakteriat atorlugit sorsunneq“, „Holocaust“ (sorsunnersuup aappaani juutinik allanillu toqoraanersuaq), „toqoraaffissuit“, „katersuutsitsiviit pinngitsaaliilluni arnerisarfiit“, „toqoraasartut“ aamma „qaartartut atomitortut“. Nutaarsiassani eqqartorneqartarput ikiaroornartut, toqutsinerit, qaartartunik eqqaassinerit, niaqulaartut inuttuumasut, kaannersuaq anniartitsingaarnerillu.

Qujanartumik tamakku tamarmik ataavartussaanngillat. Erniinnaq Guutip Satan inngilipiluilu iliuuseqarfigissavai. Apustili Johannesip takorluukkersaarnini Guutimeersoq ima allaatigaa: ’Inngili takuara qilammit aqqartoq, taassuma itinersuarmut matuersaataasoq pigigaa, kalunnersuillu tigumiarigai. Kuukkooriaasarsuarlu tiguaa, taanna pulateriaarsutoqaq, tamassalu Diaavulu Satanilu; qilersorpaalu ukiut tuusintillit qilersugaaqqullugu; itinersuarmullu igippaa matullugulu qulaagullu naqissuserlugu, inuiaqatigiit taassumunnga tammartissaaqqullugit ukiut taakku tuusintillit naammatsitserlugit.’ — sarĸúmersitat 20:1-3.

Tamatuma kingorna Diaavulu inngilipiluilu ’sivikitsumik qilerussaarneqassapput’ taavalu naassaanngitsumik suujunnaarsitaassapput. (sarĸúmersitat 20:3, 10) Taamanikkussaq ila nuannissusissaa! Satan inngilipiluilu peerneqarluinnarpata Jehova ’tamani tamarsuussaaq’. Inuusut tamarmik ’pilluangaarlutik inuussapput’. — 1 Korintumiut 15:28; Tussiaat 37:11. (wD 1/2 94)

[Quppernerup ataani ilanngussat]

[Qupp. 7-mi assiliartaq]

Inuit kisimik tamakkununnga akisussaappat, imaluunniit pissaaneq takussaanngitsoq amiilaarnartoq akisussaaqataanerpa?

[Suminngaanneernera]

1991-imi Kuwaitimi uuliasiorfiit ikuallatsitat: Chamussy/Sipa Press

[Qupp. 7-mi assiliartaq]

Inngilipiluit inuiannik ajoqusiisinnaajunnaarpata nuannissaqaaq!