Inngilipiluit toqutsisuupput!
Satan inngilipiluilu naakkittaatsuujuarsimapput navianartuullutillu. Itsaq Satanip Jobip aalajaatsup kiffai nersuutaataalu toqussimavai. Taavalu anorersuartitsilluni illu Jobip meeraasa qulit isersimaffigisaat uppitillugu tamaasa toquppai. Kingornalu Satanip Job ‘perlutsippaa ajuarsuarnik aluinit kasseranut’. — Job 1:7-19; 2:7.
Jesusip nalaani inngilipiluit inuit ilaannik oqajuitsunngortitsisarput tappiillisitsisarlutillu. (Matîuse 9:32, 33; 12:22) Angut ataaseq anniartissimavaat ‘ujaqqanillu imminut tilluartillugu’. (Mákorse 5:5) Aamma nukappiaraq nilliatissimavaat nunamullu orlutittarlugu ‘noqartillugulu’. — Lúkarse 9:42.
Itsarli inngilipiluit inuit ilaannik nappaateqartitsisarsimapput allanillu noqartitsisarsimallutik
Ullumikkut Satan inngilipiluillu aatsaat taama ajortigilersimapput. Tassami qilammit igitaasimaneranniit ajortuliornerat ingasannerulersimavoq. Silarsuaq tamakkerlugu nalunaarutit taakkua naakkittaassusiannut uppernarsaataapput. Inuit ilaat nappaatinik naalliutsittarpaat. Allat unnuakkut oqimangertittarpaat, sinissaarutsittarlugit imaluunniit sinnattupilutsittarlugit. Allat kinguaassiuutitigut atornerluttarpaat. Aamma allat niaqulaalersittarpaat, toqutsisittarlugit imaluunniit imminortittarlugit.
Ullumikkut inngilipiluit inuit ilaannik pinerluttunngortitsisarput; ilaat unnuakkut erloqisittarpaat sinnattupilutsittarlugit
Lintina, Surinamimi najugaqartoq, oqaluttuarpoq inngilipiluup, tassa anersaapiluup, ilaquttami ilaat 16-it toqussimagai ukiunilu 18-ini timikkut eqqarsartaatsikkullu naalliutsissimagaani. Nammineq misigisimasani tunngavigalugit oqaluttuarpoq inngilipiluit ‘inunnik piumanngitsunik toqunissaat tikillugu naalliutsitsinissartik nuannaapiluutigisaraat.’
Jehovalli kiffani Satanip saassussineranit sernissorsinnaavai. — Ussatit 18:10.