Inoqutissi annannissaat ilungersorlusi sulissutigisiuk

’Paariniarsigik perorsarlugit inertertarlugillu Jehovamit.’ — EVFISUMIUT 6:4.

1, 2. Unamminiarnartunik sunik ullumikkut angajoqqaajusut naapitassaqartarpat?

ATUAGASSIAT ilaanni allanngornersuarmik taaneqarpoq. Ilanngutassiami innersuussutigineqarput ukiuni kingullerni ilaqutariit iluini allanngornerit tupaallannartut. Tamakku tassaanerarneqarsimapput „averarnersuit, kateqqerarnersuit, aveqqerarnersuit aappariinnerullu avataani meeqqiornersuit, kiisalu ilaqutariinni ataavartuni annikilliornartut nutaat kinguneri“. Tatineqarnerit annikilliornerillu taama ittut ilimagisaareerput, Biibilimimi siulittuutigineqareersimavoq ’ullussani kingullerni’ makkunani inuit pissutsinik ’ajornartunik’ atugaqarumaartut. — 2 Timûtiuse 3:1-5.

² Taamaattumik ullumikkut angajoqqaajusut unamminiarnartunik, siornatigut kinguaariit nalusaannik, naapitaqartarput. Angajoqqaarpassuit akornatsinniittut meeqqaminnik ’naalungiarsuuneranniilli’ Guutip aqqutaasigut perorsaasimapput, taamaattoq aamma ilaqutariippassuaqarpoq qanittukkut aatsaat ’sallussuissut eqqorlugu saqilersimasunik’. (2 Timûtiuse 3:15, NV; 3 Juánase 4) Meeqqatik allereersut aatsaat Guutip aqqutaanik ilinnialersimapput. Kiisalu angajoqqaat kisimiittut ilaqutassariillu akornatsinni amerliartorsimapput. Qanorluunniit atugaqaraluarussi apustilip Paulusip oqaaqqissaarutaa atuuppoq: ’Paariniarsigik perorsarlugit inertertarlugillu Jehovamit.’ — Evfisumiut 6:4.

Angajoqqaat kristumiut inissisimaffiilu

3, 4. (a) Suut pissutaallutik ataataasut inissisimaffiat pingaannginnerusutut isigineqalersimava? (b) Sooq kristumiut ataataasut pilersuisuinnaasussaanngillat?

³ Malugiuk Paulusip Evfisumiut 6:4-mi oqaatsimini Ny Verden-nutsigaq naapertorlugu ataataasut saaffigigai. Atuakkiortoq nassuiaasimavoq siornatigut kinguaariinni inissisimaffiit pillugit „ataataasut meeqqamik ileqqussatigut anersaakkullu perorsarnissaannut akisussaasimasut; ataataasut meeqqamik ilinniagaqarnissaannut akisussaasimasut. . . . Nioqqutissiornikkulli allanngornersuup qanimut attaveqarneq tamanna kipitissimagaa; ataataasut nunaatitik niuertarfiutitillu qimappaat, angerlarsimaffitik qimallugit suliffissuarni kingornalu allaffinni sulilerlutik. Ataataasut siornatigut akisussaaffigisimagalui anaanaasut tigummilerpaat. Ataataassuseq taaguutaannanngoriartuaarsimavoq.“

⁴ Kristumiut uiusut: Ilaqutariinnik pilersuisuunissaannaq nammageqinasiuk, meeqqanik ilinniartitsineq perorsaanerlu tamaat nuliassinnut tunniunnagu. Ussatit 24:27-mi itsaq ataataasut ima kajumissaarneqarput: „Silami suliatit naammassereerukkit narsaativillu suliarinera isumannaareerlugu taava aatsaat [inoqutitit ineriartortissinnaalissavatit, NV].“ Ullumikkuttaaq angutit sulisut inuussutissarsiorniarlutik sivisuumik artornartumillu sulisariaqartarput. (1 Timûtiuse 5:8) Taamaakkaluartorli ’inoqutivit ineriartortinnissaannut piffissaqarniartarniarit.

5. Kristumiut nuliaasut qanoq ilillutik inoqutimik annannissaannut sulissuteqarsinnaappat?

⁵ Kristumiut nuliaasut: Illittaaq inoqutivit annannissaat ilungersorlutit sulissutigisariaqarpat. Ussatit 14:1-imi allassimavoq: „Arnat ilisimassuseqartut angerlarsimaffik sanasarpaat.“ Kinguaassinnik ilinniartitsinissaq aappariittut katissimasutut uiillu marluullusi akisussaaffigisariaqarparsi. (Ussatit 22:6; Malaki 2:14) Akisussaaffimmut ilaapput meeqqanik perorsaatissiisarneq, kristumiut ataatsimiinnissaannut oqaluussiartornissamullu piareersarneq, imaluunniit uiit pisinnaanngikkaangat ilaqutariit atuaqqissaaqatigiinnerannik aqutsineq. Aamma meeqqavit illumi suliassanik, ileqqorissaarnissamik, timikkut eqqiluisaarnissamik iluaqutaasunillu allarpassuarnik ilinniartinnissaannut iliuuseqarsinnaasorujussuuvutit. (Títuse 2:5) Uiusoq nuliaasorlu tamakkunuunatigut suleqatigiikkaangamik meeqqamik pisariaqartitaannik matussutissiisinnaanerusarput. Meeqqat pisariaqartitaat sorpiaappat?

Misigissutsikkut pisariaqartitaannik isumaginninneq

6. Meeqqat misigissutsikkut ineriartorneranni anaanaasut ataataasullu tamarmik immikkut qanoq pingaaruteqarpat?

⁶ Meeqqat anaanaminnit isumassorluarneqartut toqqissisimasarput asaneqartutullu misigalutik. (1 Tásalûníkamiut 2:7; Tussiaat 22:9) Meeqqanik naammattorsuarmik isumassueqqusilluni kajumissaarineq anaanat ikittuinnaat pinaaserfigisinnaavaat. Pruffiiti Esaja ima aperisimavoq: „Arnap puiortarnerpaa qitornani milutsitani, anaanalluunniit erniarisani?“ (Jesaja 49:15) Taamaattumik anaanat meeqqat misigissutsikkut ineriartornerannut pingaaruteqartorujussuupput. Aammali ataataasut tamatumani pingaartumik inissisimaffeqarput. Ilaqutariinnut tunngasunik paasisimasalik Paul Lewis ima oqarsimavoq: „Suliassanik ingerlatsisartumik meeqqamik [pinerluuteqarsimasumik] ataataminut pitsaasumik attaveqarnerartumik sullissisumik naapitaqarsimanngisaannarpunga. Meeqqat hundredelikkuutaat akornanni ataatsimilluunniit naami.“

7, 8. (a) Jehova Guutip Jesus Kristusillu akornanni nukittuumik nimeqarneranut sumik takussutissaqarpa? (b) Ataataasut qanoq ilillutik meeqqaminnut asannittumik attaveqalerniarsinnaappat?

⁷ Taamaattumik pingaaruteqarluinnarpoq kristumiut ataataasut meeqqaminnut asannittumik attaveqalerniarsarinissaat. Assersuutigalugu Jehova Jesus Kristusilu eqqarsaatigeriakkit. Jesusip kuisinnerani Jehova ima nalunaarsimavoq: ’Illit tassa ernera asanartoq, illit nuannaaraakkit.’ (Lúkarse 3:22) Oqaatsit ikittunnguit imalerujussuilli! Jehovap (1) ernini iluaraa, (2) Jesusimut asanninnini ammasumik oqaatigalugu kiisalu (3) Jesusimik iluarinninnini ilisimaneqalersillugu. Tamannali Jehovap ernerminut asanninnerminik ersersitsinerisa kisiartarinngilaat. Kingusinnerusukkut Jesus Ataataminut ima oqarsimavoq: ’Silarsuaq tunngavilerneqanngikkallarmat asavarma.’ (Juánase 17:24) Ernerimmi paniillu naalattut tamarmik ataataminnit akuerineqarnissartik, asaneqarnissartik iluarineqarnissartillu pisariaqartittannginnerpaat?

⁸ Ataataaguit meeqqatit timikkut oqaatsikkullu asanninnermik ersersitsivigisarnerisigut taakkununnga asanninnerup nimianik pilersitsiniarlutit qularnanngitsumik iliuuseqarsinnaasorujussuuvutit. Ilumoorpoq tunniusimanermik ersersitsinissaq angutit ilaannut ajornakusoorsinnaasarmat, ingammik namminneq ataataminnit ammasumik tunniusimaffigineqarsimanngikkunik. Allaalli qusagaluarlutit meeqqannut asanninnermik ersersitsiniarsariguit sakkortuumik sunniuteqarsinnaavoq. Tassami ’asanninneq ineriartuutaasarpoq’. (1 Korintumiut 8:1) Meeqqatit ataatatut asanninnerit pissutigalugu toqqissisimasutut misigigunik ’qitornaalluarniassapput’ ilinnillu ammaffiginninnissartik ajornannginnerutissallugu. — Ussatit 4:3.

Anersaakkut pisariaqartitaannik isumaginninneq

9. (a) Angajoqqaat Israelikkuusut Guutimik mianerinnittut ilaquttamik anersaakkut pisariaqartitaannik qanoq pilersuisussaasimappat? (b) Sukkulluunniit meeqqaminnik ilinniartitsinissaminnut kristumiut sunik periarfissaqarpat?

⁹ Aamma meeqqat anersaakkut pisariaqartitaqarput. (Matîuse 5:3) Mosesip angajoqqaat Israelikkuusut ima oqaassimavai: „Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ (5 Moses 6:6, 7) Angajoqqaajuguit kristumiu sukkulluunniit „angalaartaraangavit“ meeqqatit ilinniartinniarlugit iliuuseqarsinnaasorujussuuvutit. Ilaqutariittut biilertilluni, pisiniariartortilluni imaluunniit meeqqatit illumiit illumut oqaluussiartoqatigitillugit eqqissisimasumik ilinniartitsiffissaqqissuuvoq. Ingammik neriffiit ilaqutariittut oqaloqatigiinnissamut periarfissaalluarput. „Nerinitsinni ullormut pisimasut eqqartortarpavut,“ angajoqqaaq nassuiaavoq.

10. Sooq ilaqutariittut atuaqqissaarniarneq ilaannikkut unamminiarnartuusinnaava, angajoqqaallu qanoq aalajangertariaqarpat?

¹⁰ Aammali Biibilimik atuaqqissaaqatiginerisigut meeqqat piareersarsimasumik ilinniartinnissaat pingaartorujussuuvoq. Miserratissaanngilaq meeqqat ’sianiissusermik pigisaqartut’. (Ussatit 22:15) Angajoqqaat ilaat oqartarput ilaqutariittut atuaqqissaaqatigiinnerminni meeqqatik akornusersuigajuttartut. Qanoq ilillutik? Eqqissiveqaratik pikkunaaginnerpalullutillu, uuminartumik akornusersuillutik (soorlu qatanngutitik kamaateqqajaallugit) imaluunniit Biibilimi ajoqersuutit ilumoortut tunngaviusut suusupagisarlugit. Tamatumani piumasat aporaannerat pineqarpoq, angajoqqaallu piumasaat nukittunersaasariaqarpoq. Angajoqqaat kristumiut nakkaannartariaqanngillat meeqqallu angerlarsimaffimmi naalagaatinnagit. — Naleqqiuguk Galâsiamiut 6:9.

11. Qanoq ililluni ilaqutariittut atuaqqissaaqatigiinneq nuannernerulersinneqarsinnaava?

¹¹ Ilaqutariittut atuaqqissaartarnersi meeqqassi nuannarinngippassuk immaqa arlaatigut allannguisariaqarpusi. Assersuutigalugu, atuaqqissaarnersi meeqqat kukkuluttornerinik kingullernik kingumut eqqartueqqiffigisarpisiuk? Immaqa tamakku meeraq kisimeeqatigalugu eqqartussallugit pitsaaneruvoq. Aalajangersimasumik atuaqqissaarfeqarpisi? Tv-mi nuannersumik isiginnaagassaqarnera timersornikkulluunniit unammisoqarniarnera pissutigiinnarlugit atuaqqissaarnissarsi taamaatiinnartarussiuk meeqqassi pingaartutut isigilernavianngilaat. Atuaqqissaarnermik aqutsigaangavit unneqqarillutillu angorniussuseqartarpit? (Rûmamiut 12:8) Aap, atuaqqissaarneq nuannersuutittariaqarpoq. Meeqqat tamaasa ilaatinniartakkit. Isumalluartumik ineriartornartumillu pissuseqarit, meeqqallu peqataanerannik asannittumik nersualaartakkit. Soorunami atuagassat atuaannartariaqanngilatit, aammali uummatit anguniartakkit. — Ussatit 23:15.

Naapertuilluartumik perorsaatissiineq

12. Sooq perorsaatissiineq timikkut annersitsinerinnaanngila?

¹² Meeqqat aamma perorsaatissinneqartarnissartik assut pisariaqartippaat. Angajoqqaatut killilersortariaqarpasi. Ussatit 13:24-mi ima allassimavoq: „Unataammik atuiumanngitsup ernini uumigaa, ernerminilli asannittup meerannguuneraniilli sukannersumik perorsartarpaa.“ Biibilimili pineqanngilaq tamatigut timikkut perorsaatissiisarnissaq. ússatit 8:33-mi allassimavoq: ’Perorsaat tusarniarsiuk.’ (nutsigaq pisoqaq) Aamma Ussatit 17:10-mi allassimavoq: „Sianisooq appisaluunneqartoq annermik killinneqartarpoq silaatsumit hundrederiarluni unatartittumit.“

13. Qanoq periaaseqarluni meeqqanik perorsaatissiisariaqarpa?

¹³ Timikkut perorsaatissiineq ilaannikkut pisariaqartarpoq. Kamannikkulli tunniunneqaruni qularnanngitsumik ingasappallaassaaq sunniuteqassananilu. Biibilimi ima mianersoqqussuteqarpoq: ’Angajoqqaat ukorsii, qitornasi uumitsatseqinasigik anusinngoqqunagit.’ (Kulorsamiut 3:21) Tassami ’qunusiarinnittoq imminut sianiitsunngortittarpoq’. (Nalunaajaasup oqaasii 7:7) Meeraq narrutsatsitaasartoq allaat najoqqutassanut naapertuilluartunut naalanngisaartunngorsinnaavoq. Taamaattumik angajoqqaat Biibili atortariaqarpaat meeqqatik aalajangersimasumik oqimaaqatigiissumillu periaaseqarlutik naapertuilluartumik perorsaatissikkumallugit. (2 Timûtiuse 3:16) Guuti asannittumik saamasumillu perorsaatissiisarpoq. — Naleqqiuguk 2 Timûtiuse 2:24, 25.

14. Kamattooqqajaaginnarunik angajoqqaat qanoq iliortariaqarpat?

¹⁴ Soorunami ’tamatta qassiinik naakkiuttarpugut’. (Jâko 3:2) Allaat angajoqqaat pissusissamisoortumik asannittut kamaammertoorsinnaasarput nuanniitsumillu oqartoorlutik. (Kulorsamiut 3:8) Taamaappat seqernup tarrinnginnerani meeqqavit narrujuummisimanera namminerlu kamannerit aaqqinniapallattakkit. (Evfisumiut 4:26, 27) Meeqqallu akunissinni pissutsit aaqqinniakkit, utoqqatserfigalugulu taamaaliornissaq naleqquttutut ippat. (Naleqqiuguk Matîuse 5:23, 24.) Maniguuttumik taamatut iliuuseqaruit meeqqallu immissinnut qaninnerulissaasi. Misigiguit kamaqqajaallutit kamaammerujussuartarnitillu aqussinnaanagit ilagiinni utoqqaanertanik toqqakkanik ikiortissarsiorsinnaavutit.

Angajoqqaat kisimiittut ilaqutassariillu

15. Meeqqat ataasiinnarmik pilersuisullit qanoq ikiorneqarsinnaappat?

¹⁵ Meeqqalli tamakkeratik angajoqqaanik marlunnik tapersersortissaqarput. USA-mi meeqqat sisamaappata ataaseq ataasiinnarmik angajoqqaaqarluni peroriartorsimavoq. Biibilip nalaani „iliarsuit“ nalinginnaasimapput, taakkuninngalu isumaginninnermut tunngasut Biibilimi eqqaaneqartuartarput. (2 Moses 22:22) Ullumikkuttaaq inoqutigiit kristumiut ataasiinnarmik pilersuisullit pissutsinik ajornakusoortunik naapitassaqartarput, tuppallersaatigisarpaalli nalunnginnamikku Jehova tassaasoq „iliarsuit ataataat uillarnerillu sernissortaat“. (Tussiaat 68:6) Kristumiut kajumissaarneqarput ’iliarsuit uillarnerillu naalliunneranni takusartaqqullugit’. (Jâko 1:27) Uppeqatit ilaqutariinnik ataasiinnarmik pilersuisulinnik ikuilluarsinnaapput.a

16. (a) Angajoqqaat kisimiittut inoqutiminnut ajunngitsussamut qanoq iliortariaqarpat? (b) Sooq perorsaatissiiniarneq ajornakusoorsinnaava, soorli pisariaqarpa?

¹⁶ Angajoqqaajuguit kisimiittoq, inoqutivit iluaqutissaannut qanoq iliuuseqarsinnaavit? Ilaqutariittut Biibilimik atuaqqissaarneq, ataatsimiigiartarneq oqaluussiartortarnerlu peqqissaaruttariaqarpatit. Perorsaaniarnerli unamminiarnartuusinnaavoq oqimaatsoq. Immaqa aappat asasat toqukkut annaasimasat suli aliasuutigaat. Immaqaluunniit aappariinnissi aserorsimaneranut pisuusutut misiginerit kamannerillu artorsaatigaatit. Immaqa aapparisimasallu meeqqassinnut naligiimmik oqartussaaffiligaavusi, immaqalu ersissutigaat meeqqavit aapparisimasannut averusersimasannut avissimasannulluunniit nuukkumallernissaa. Pissutsit taama ittut oqimaaqatigiissumik perorsaatissiinissaq misigissutsikkut artornarsisittarpaat. Biibilimili eqqaasinneqarpugut ’meeqqap isumamineersitap anaanani kanngusuutissiortaraa’. (Ussatit 29:15) Taamaattumik aapparisimasavit pisuusutut misigititsineranut, ilerasutsitsineranut misigissutsikkulluunniit tatisimanninneranut nakkaannaqinak. Piviusorsiortunik aalajangersimalluinnartunillu najoqqutassiorit. Biibilip najoqqutassiai sumiginnarnaveersaakkit. — Ussatit 13:24.

17. Ilaqutariinni ataasiinnarmik pilersuisulinni ilaasortaasut inissisimaffii qanoq ilillutik paatsiveerutsittoorneqarsinnaappat, tamannalu pinngitsoortinniarlugu qanoq iliortoqarsinnaava?

¹⁷ Ajornartorsiutilli takkussinnaapput anaanaasup kisimiittup ernini uigisimasamisut — illumi ittutut — pilerpagu, imaluunniit panini ikinngutimisut inersimasutut pilerpagu, nammineq ajornartorsiutiminik artukkersorlugu. Taamaaliorneq naleqqutinngilaq meeqqamullu paatsiveerussaataalluni. Angajoqqaap meeqqallu immikkut inissisimaffii nalorninarsippata perorsaatissiiniarneq ajornarsisinnaavoq. Paasitiguk illit angajoqqaajunerit. Anaanaaguit Biibili tunngavigalugu siunnersorneqarnissannik pisariaqartitsisoq utoqqaanertamut saaffiginnigit imaluunniit qatanngummut arnamut utoqqasaamut inersimalluartumut. — Naleqqiuguk Títuse 2:3-5.

18, 19. (a) Ilaqutassariinni suut unamminiarnartuusinnaappat? (b) Ilaqutassariinni angajoqqaat meeqqallu qanoq ilillutik ilisimassusermik siuneqarnermillu ersersitsisinnaappat?

¹⁸ Aamma ilaqutassariit unamminiarnartunik naapitassaqartarput. Angajoqqaassat nalunngilaat meerassamik erniinnaq asalerneq ajoraatik. Assersuutigalugu meerassaasut malussariffigisartorujussuuaat angajoqqaassami meeravimminik salliutitsisarnera. (Naleqqiuguk 1 Moses 37:3, 4.) Meerassat angajoqqaaminnik najuiunnaarsimasumik aliasullutik maqaasisinnaapput annilaanngatigisarlugulu angajoqqaassaminnik asannilerunik ataatavimminnik anaanavimminnillu asannikkunnaarnissartik. Immaqa angajoqqaassat pisariaqartumik perorsaatissiiniartut sakkortuumik ima eqqaasinneqarsinnaasarput: ’Ataataginngilakkit!’ imaluunniit ’Anaanaginngilakkit!’

¹⁹ Ussatit 24:3-mi allassimavoq: „Ilisimassut atorlugu illu sananeqartarpoq, siuneqarneq atorlugu tunngavilerneqartarpoq.“ Aap, ilaqutassariit iluatsitsissappata ilisimassuseq siuneqarnerlu pisariaqarput. Piffissap ingerlanerani meeqqat piviusoq akuerisariaqarpaat, tassa pissutsit allanngorsinnaasut. Aamma angajoqqaassat naammagittartuunissartik misiginneqataanissartillu ilinniartariaqarsinnaasarpaat, tunuartinneqaraangamik ajuallajavallaarnaveersaarlutik. (Ussatit 19:11; Nalunaajaasup oqaasii 7:9) Perorsaatissiisussatut ingerlalinnginninni meerassannut ikinngutitut attaveqalerniarsarigallaat. Attaveqarnerup taama ittup pilersinneqannginnerani angajoqqaaviup perorsaatissiisarnissaa ilaasa pitsaanerutittarpaat. Ajornartorsiuteqaleraangat attaveqatigiinniartaritsi. „Silatuujupput siunnersuutinik ilassinnittut,“ Ussatit 13:10-mi taama allassimavoq.

Inoqutissi annannissaat sulissutigisiuk!

20. Ilaqutariinni kristumiuni ittuusut qanoq iliortuartariaqarpat?

²⁰ Ilaqutariit kristumiut nukittuut imaaliallaannaq nukittuunngorsimanngillat. Ilaqutariinni ittuususi ilissi inoqutissi annannissaat ilungersorlusi sulissutigisariaqarparsi. Eqqumasuusariaqarpusi, ileqqut kusanaatsut silamiutullu ilioriartarnerit maluginiartariaqarpasi. Oqaloriaatsissigut, inooriaatsissigut, asanninnissigut, uppernissigut perorsaanissigullu maligassaalluartuusariaqarpusi. (1 Timûtiuse 4:12) Guutip anersaavata inerititaanik ersersitsisaritsi. (Galâsiamiut 5:22, 23) Naammagittartuunissigut, isumassuisuunissigut, isumakkeerfiginneriaannaanissigut saamasuunissigullu meeqqassinnik Guutip aqqutaasigut ajoqersuinersi kimeqarnerulersissavarsi. — Kulorsamiut 3:12-14.

21. Angerlarsimaffimmi ’silaannaq’ qanoq ililluni asannippalaartunngortillugulu pilluarnartunngortinneqarsinnaava?

²¹ Guuti ikiortigalugu angerlarsimaffissinni anersaaq pilluartoq asannittorlu atatinniarsariniarsiuk. Ilaqutariittut ataatsimooqatigiittaritsi, minnerpaamik ullormut ataasiarlusi nereqatigiittarnissarsi anguniarsiuk. Kristumiut ataatsimiinnerinut najuuttarneq, oqaluussiartortarneq ilaqutariittullu atuaqqissaaqatigiinneq pingaaruteqartorujussuupput. Aammali ’illarfissaqarlunilu . . . qittaserfissaqarpoq’. (Nalunaajaasup oqaasii 3:1, 4) Aap, peqqinnartumik aliikkusersornissamut pilersaarusiortaritsi. Katersugaasiviliarsinnaavusi allamulluunniit ilaqutariittut nuannisaqatigiiffigisinnaasassinnukarsinnaavusi. Imaluunniit tv qameriarlugu taarsiullugu piffissaq erinarsoqatigiinnermut, nipilersukkanik tusarnaarnermut, pinnguaqatigiinnermut oqaloqatigiinnermulluunniit atorsinnaavarsi. Taamaalillusi ilaqutariittut immissinnut qaninnerulersinnaavusi.

22. Inoqutit annannissaat sooq ilungersorluni sulissutigisariaqarpa?

²² Qanortoq ilaqutariit kristumiut ilissi tamakkiisumik Jehovap iluarisaanik iliornissarsi sulissutigiuaannarsiuk ’ajunngitsulianik tamanik kingunissioqqullusi Guutimillu ilisarsiartoqqullusi’. (Kulorsamiut 1:10) Guutip oqaasianut naalannermik aalajaatsumik tunngavilerlugit inoqutitit ineriartortikkit. (Matîuse 7:24-27) Qularutigissanngilarsilu meeqqassinnik ’Jehovami perorsarlugillu inerterisarnersi’ taassuma iluarigaa. — Evfisumiut 6:4. (wD 15/7 94)

[Quppernerup ataani ilanngussaq]

Qanoq akissavit?

□ Qanoq ilillutik uiusut nuliaasullu inoqutigiinnik ineriartortitsiniarlutik suleqatigiissinnaappat?

□ Meeqqat migisissutsikkut sunik pisariaqartitaqarpat, qanorlu ililluni tamakku isumagineqarsinnaappat?

□ Ilaqutariinnut ittuusup qanoq ililluni meeqqatik sukkulluunniit aammalu pilersaarusiukkamik ilinniartissinnaavai?

□ Angajoqqaat qanoq ilillutik naapertuilluartumik perorsaatissiisinnaappat?

□ Ilaqutariit ataasiinnarmik pilersuisullit ilaqutassariillu qanoq iluaquserneqarsinnaappat?

[Qupp. 16-mi assiliartaq]

Ataatap asanninnera iluarinninneralu meeqqap misigissutsikkut ineriartorneranut pingaaruteqartorujussuuvoq