Jiisusimut ajoqersuganngortut

KINA nunarsuarmi Guutimut kiffaalluarnerpaasimava? — Ilumut, tassa Jiisusi Kristusi. Isumaqarpit aamma uagut Jiisusitut iliorsinnaasugut? — Biibilimi allaqqavoq Jiisusi uagutsinnut maligassaalluartoq. Tamannalu isumaqarpoq ilaarniartariaqaripput. Taassumalu kajumissaarpaatigut taassumunnga ajoqersuganngoqqulluta.

Nalunngiliuk Jiisusimut ajoqersugaaneq qanoq paasisariaqarnersoq? — Arlalinnik isumaqarpoq. Siullermik taanna ilinniarfigisariaqarparput. Tamannaannaanngilarli. Aamma uagutsinnut oqaasii upperisariaqarpavut. Oqaasiilu upperigutsigit malikkumassavavut.

Inuppassuit oqartarput Jiisusi upperalugu. Tamarmilli Jiisusimut ajoqersugaviuppat? — Naamik, taakku amerlanerit taassumunnga ajoqersugaanngillat. Imaassinnaavoq naalagiartartut. Amerlanerilli Jiisusip ajoqersuutaasa paasiniarnissaanut piffissartik atorsimanngilaat. Taamaallaat Jiisusimik malinnittut ajoqersugarivippai.

Maanna Jiisusip nunami inuugallarami ajoqersugaasa ilaannik oqaluttuutissavakkit. Angut Filipimik atilik ajoqersuganngortut siulliit ilagaat. Ikinngutini Nathanaeli (Bartholomæusimittaaq taasagaat) aavaa; assimi orpiup sanianiittoq takusinnaavat. Kingusinnerulaartukkut Nathanaeli Jiisusimukarmat Jiisusi ima oqarpoq: “Kiisami aajuna Israelikkuusoq peqquserlunneq ajortoq.” Tamannalu Nathanaelip tupaallaatigaa imalu aperaluni: “Sumit ilisarisimagamma?”

Jiisusi ima akivoq: ‘Suli Filipip qaaqqunngikkaatilli figenequtip sanianiittutit takuakkit’. Nathanaeli tupigusuttorujussuuvoq Jiisusip nalunngimmagu sumerpiamiissimanini imalu oqarpoq: “Illit Guutip erneraatit, Israelikkut kunngigaatsit.” — Johannesi 1:49.

Allat ulloq ataaseq Filipi Nathanaelilu sioqqullugit Jiisusimut ajoqersuganngorsimapput. Taakku tassaapput Andreasi qatanngutaalu Petrusi, Johannesilu immaqalu Johannesip qatanngutaa Jaaku. (Johannesi 1:35-51) Taakkuali sisamat kingusinnerulaartukkut aalisarneq uterfigeqqippaat. Ullulli ilaanni Jiisusip Galilæap Tasersuata sinaatigoortilluni Petrusi Andreasilu qassusernialersut takoqqippai. Jiisusip taakku ima qaaqquai: “Qaallusi malissinga.”

Ingerlaqqilaaramilu Jiisusip Jaaku Johannesilu takuai. Umiatsiamiipput ataatartik ilagalugu qassutitik ilaartorlugit. Jiisusip taakkuttaaq oqarfigai maleqqulluni. Illit qanoq qisuariassagaluarpit Jiisusip qaaqqusimasuuppatit? Ingerlaannaq malissagaluarpiuk? — Angutit taakkua Jiisusi kinaanersoq nalunngilaat. Nalunngilaat Guutip aallartitarigaa. Taamaattumik ingerlaannaq aalisarunnaarlutik Jiisusi malilerpaat. — Matthæusi 4:18-22.

Jiisusimut ajoqersuganngoramik taava imaappa iliuusaat tamarmik eqqortuusut? — Naamik. Eqqaamassagunarpammi kina arlartik annerunersoq assortuussutigileraat. Jiisusili tusarnaarpaat allanngornissaminnullu piumassuseqarlutik. Uaguttaaq allanngornissamut piumassuseqarutta Jiisusimut ajoqersugaasinnaavugut.

Inuit kikkulluunniit Jiisusimut ajoqersuganngornissaannut kajumissaarneqarput. Ilaanni angutip inuusuttup Jiisusi ornippaa. Taanna inuiaqatigiit akornanni siuttuuvoq pisooq, paaserusuppaalu inuuneq naassaanngitsoq qanoq ililluni pisinnaanerlugu. Taassuma nassuiaammani meeraanerminiilli Guutip inatsisai malissimallugit Jiisusip ima oqarfigaa: “Qaallutillu malinnga!” Qanorli pisoqarsoraajuk? —

Aap, angutip inuusuttup paasileramiuk Jiisusimut ajoqersugaanissaq pisuujunermit pingaarnerusoq aliasungaalerpoq. Aningaasaatini Guutimit asaneruai, taamaattumillu Jiisusimut ajoqersuganngunngisaannarpoq. — Lukasi 18:18-25.

Jiisusi ukioq ataaseq affangajallu nalunaajaareerami ajoqersukkani aqqaneq-marluk suliassamut immikkut ittumut toqqarpai. Jiisusimut apustiliussapput. Tamanna ima paasisariaqarpoq immikkut ittumik suliassinneqarlutik aallartinneqassasut. Taakku atii nalunngiligit? — Misileriartigu atii ilikkarsinnaanerlutigit. Assit uaniittut takoriakkit misilillugulu atii taagorlugit. Naggataatigullu misilissinnaavat atii eqqaamasinnaanerlugit.

Apustilit aqqaneq-marluk ilaat ajortunngorpoq. Tassa Judasi Iskarioti. Taannalu taarserlugu alla toqqarneqarpoq. Qanoq ateqarnersoq nalunngiliuk? — Matthiasimik ateqarpoq. Kingusinnerusukkut Paulusi Barnabalu apustilinngorput aqqaneq-marlunnulli ilaanngillat. — Apustilit Suliaat 1:23-26; 14:14.

Eqqaamassagunarpat uani atuakkami kapitali 1-imi eqqaaneqartoq Jiisusip meeqqat soqutigigai. Sooruna soqutigigai? — Nalunnginnamiuk aamma meeqqat imminut ajoqersuganngorsinnaasut. Amerlasuutigut meeqqat inersimasunut ima nassuiaalluartigisinnaasarput allaat inersimasut Ajoqersuisorsuaq pillugu tusarnaarusulersittarlugillu paasisaqarnerorusulersittarlugit.

Arnarpassuittaaq Jiisusimut ajoqersuganngorput. Ilaasa angalaqatigisarpaat oqaluussilluni angalagaangat. Soorlu Maria Magdalene, Johanna Susannalu taamaaliorsimasut. Immaqa aamma Jiisusi nerisassiuuttarpaat errorsissuttarlugulu. — Lukasi 8:1-3.

Aamma illit Jiisusimut ajoqersugaarusuppit? — Taava eqqaamassavat oqaannarluni ajoqersuganngortoqarsinnaanngimmat. Aamma ajoqersukkatut pissusilersortariaqarpoq, naalagaaffilersaarfimmiinnaanngitsoq. Assersuutigalugu sumi Jiisusimut ajoqersukkatut pissusilersornissaq pingaaruteqarpa? —

Angerlarsimaffitsinni. Aamma atuarfimmi meeqqerivimmilu. Puiunngisaannartariaqarparput ilumut Jiisusimut ajoqersugaarusukkutta ajoqersukkatut inuusariaqaratta ulloq naallugu ullullu tamaasa sumiikkaluaraangattaluunniit.