Jesusip inuunera ajoqersuineralu
Jesusip ajoqersugai siulliit
ULLUT 40-t puilasuitsumeereerluni Jesus Johannesimut, kuisisiminut, uterpoq. Aggernerani Johannes torlulavoq oqarluni: „Tassa Guutip savaaraa silamiut ajortaannik ersuttoq! Taannaavoq oqaatigisara: ’Angut kingunikkut pissasoq siuninniittoq, uannimmi siulliuvoq.’“ Johannes illuminit Jesusimit angajulliugaluarluni nalunngilaa Jesus siulliulluni qilammi anersaatut kinaassusiliulluni inuusimasoq.
Aqaguani Johannes ajoqersukkani marluk ilagalugit qeqarpoq. Aasiit Jesus qanilliartortillugu oqarpoq: „Tassa Guutip savaaraa!“ Johannesip Kuisisup ajoqersugaasa ilaasa marluk taakkua tamanna tusaramikku Jesus malippaat. Siulleq tassaavoq Andreas, aappaalu tassaalluni Johannesimissaaq atilik, qularnanngitsumik allakkanik makkuninnga allassimasoq. Johannes taanna Mariap qatanngutaata Salomep ernerisimannguatsiarpaa, taamaattumillu aamma Jesusip illorisimassallugu.
Jesusip tunumut qiviarami Andreasip Johannesillu malikkaanni takugamigit aperai: „Suna ujarpisiuk?“
„Rabbi! (ajoqersuisoq),“ aperaat, „sumi illusimmaveqarpit?“
„Takujartorsiuk!“ Jesusip akivai.
Ualikkut nalunaaqutaq sisamat missaanniippoq, ullullu sinnera Andreasip Johannesillu Jesus najorpaat. Kingunerileraa Andreasip qiimmatsangaarami qatanngunni Peterimik atilik qinerasuarpaa. „Messias naapipparput,“ pilerpaa. Peterilu Jesusimukaappaa. Aammattaaq immaqa Johannesip tassani qatanngunni Jakob nanivaa Jesusimullu ingerlallugu; kisianni Johannesip pisarnermisut tamanna ilaquttaminut qanigisaminut tunngasoq iivangkiiliumini eqqaasimanngilaa.
Aqaguani Jesusip Filip nanivaa oqarfigalugulu: „Malinnga.“ Filippillu Natanael, aammattaaq Bartolomæusimik taaneqartartoq, nanivaa oqarlunilu: ’Naapipparput taanna Mosesip inatsisitigut oqaatigisaa pruffiitillu oqaatigisaat, Jesus Josefip ernera Nazaretimiu.’ Natanaelili nalornisoorpoq. „Suna ajunngitsoq Nazaretimit pissava?“ aperivoq.
„Takujartoruk!“ Filip oqarpoq. Tikimmani Jesusip Natanael oqarfigaa: „Filippip qaaqqunngikkallarmatit fiigequssuup ataaniitillutit takuakkit.“
Natanaelilu tupaallalluni akivoq: „Rabbi! (ajoqersuisoq) illit taannaavutit Guutip Ernera Israelip kunngia.“
Kingunitsianngua Jesusip ajoqersugartaani ilagalugit Jordanip Qoorua qimappaa, Galilæamullu aallarluni. Johannes 1:29-51.
◆ Jesusip ajoqersugai siulliit kikkuuppat?
◆ Peter immaqalu aamma Jakob qanoq ilillutik Jesusimut ilisaritinneqarpat?
◆ Suup Natanael qularunnaarsippaa Jesus Guutip ernerigaa? (wD 15/10 85)