Jiisusi qanoq sernissorneqartoq

JEHOVAP ilaannikkut meeqqat mikisut imminnut ikiorsinnaanngitsut immikkut ittumik iliuuseqarluni ikiortarpai. Asimi narsaammiluunniit pisuttuaruit immaqa tamatumunnga assingusumik takusaqarsinnaavutit. Kisiannili imaassinnaavoq susoqarnersoq ingerlaannaq paasinngikkit.

Siullermik timmiaq nunamut mittoq takuat. Ajoqusersimasutut isikkoqarpoq. Sulumi aappaa nunamut tungatippaa, qanilliartortillutillu ungasilleqqittarpoq. Timmiaq malippat, siuninniittuaannarporlu. Tassanngaannarli tingeriasaarpoq. Sunaaffali sulua ajoquteqanngitsoq! Timmiaq sooq taamaaliortoq nalunngiliuk? —

Tassa timmiap piarai qanittumi ivikkani ineqaramik. Annilaangagaalu nanigukkit ajortumeeqinagakkit. Taamaattumik ajoqusersimasuusaarpoq. Piaqqaminit qimagutsinniarlutit pissittarpoq. Nalunngiliuk kia timmissatut piaralittut sernissorluarsinnaagaatigut? — Tassa Jehovap. Biibilimi nattoralimmut assersuunneqarpoq; tassa timmiaq piaqqaminik sernissuisartoq. — 5 Mosesi 32:11, 12.

Jehovap ernera pingaarnerpaaq tassaavoq Jiisusi. Jiisusi qilammiikkallarami Ataatamisut anersaajuvoq ersinngitsuullunilu pissaanilik. Imminut paarisinnaavoq. Jiisusili nunami naalungiarsuttut inunngorami imminut paarisinnaajunnaarpoq. Sernissorneqarnissani pisariaqartippaa.

Jiisusip nunami Guutip kissaatigisaa naammassissaguniuk angutaasariaqarpoq inersimasoq naammalluinnartoq. Saatanilli Jiisusi inersimasunngunnginnerani toqoriaraluarpaa. Pissanganarpoq tusassallugu Jehovap qanoq Jiisusi sernissoraa taamani meeraasoq toqunniarneqaraluarmat. Qanoq pisoqarsimanersoq tusarusuppiuk? —

Jiisusip inunngornerata kinguninngua tamanna pivoq. Saatanip ullorissatut ittoq qilammi kangiata tungaanut qaammartippaa. Ullorissat najoqqutaralugit siulittuisartut qaamaneq malillugu aallarput. Jerusalemimut ingerlanneqarput, angalaneq kilometerit hundredellit arlallit atorlugit. Tassani inuit aperaat juutit kunngissaat sumi inunngussanersoq. Biibilimik ilisimasaqartut ilaasa akivaat: “Betlehemimi.” — Matthæusi 2:1-6.

Herodesilli, Jerusalemimi kunngip ajortup, tusarpaa illoqarfiup eqqaani Betlehemimi kunngissamik inunngortoqarsimasoq! Ullorissat najoqqutaralugit siulittuisartut ima oqarfigai: ‘Naalungiaq ujariartorsiuk, taavalu nalunaarfigiartussavassinga.’ Sooq Herodesimut Jiisusi nassaarerusussoraajuk? — Allamik kunngitaarnissaa nuannarinnginnamiuk. Toqukkusuppaa!

Guutip ernini qanoq ililluni sernissussavaa? — Ullorissat najoqqutaralugit siulittuisartut Jiisusi nanivaat pajugutitillu tunniullugit. Kingorna Guutip sinnattukkut ullorissat najoqqutaralugit siulittuisartut oqarfigai Herodesi uterfigeqqunagu. Taamaammat Jerusalemimut utinngillat, aqqutikkulli allakkut angerlarput. Herodesip paasileramiuk angerlamut aallarsimasut kamattorsuanngorpoq. Jiisusi toqunniarlugu peqqusivoq illoqarfimmi Betlehemimi nukappiaqqat marluk inorlugit ukiullit tamarmik toqunneqassasut! Jiisusili tassaniikkunnaareersimavoq.

Nalunngiliuk Jiisusi qanoq aniguisoq? — Ullorissat najoqqutaralugit siulittuisartut aallarmata Jehovap Josefi, Mariap uia, oqarfigaa tuaviorlutik Egyptenimut qimaassasut. Tassani Jiisusi Herodesimit ajortumit ajoquserneqarsinnaanngilaq. Ukiualunnguit qaangiuttut Maria Josefilu Jiisusi ilagalugu Egyptenimit utermata Guutip Josefi sinnattorteqqippaa mianersoqqullugu. Josefi oqarfigaa Nazaretimukassasut tassani Jiisusi isumannaatsumiissammat. — Matthæusi 2:7-23.

Takusinnaaviuk Jehovap ernerminik sernissuinera? — Kina timmissat piaraattut ivikkaniittutut anaanaminnit sernissorneqartutut ippa, imaluunniit taamani Jiisusip mikisuulluni sernissorneqarneratut sernissorneqarpa? Illit taakkunatut ipputit, ilaa? — Immaqa aamma ilinnik ajoquseerusuttoqarpoq periarfissaqarunik. Kikkuusinnaappat? —

Biibilimi allassimavoq Saatani uagutsinnik iisassarsiorluni angalasartoq. Soorlu løvip uumasut piaqqat sanngiitsullu piniagarisarai, taamatut Saatanip anersaapiluisalu meeqqat ajoquserniartarpaat. (1 Petrusi 5:8) Jehovali Saatanimit nukittuneruvoq. Jehovap qitornani sernissorsinnaavai, Saatanillu ajortumeerinissaa akueriguniuk iluarseqqissinnaavaa.

Eqqaamaviuk kapitali 10-mi Diaavulup anersaapiluisalu qanoq iliortinniarsarigaatigut? — Atoqateqartinniarsarisarpaatigut Guutip akuerinngisaanik. Kikkut atoqatigiissinnaappat? — Tassa angut arnarlu inersimasut katissimasut.

Ajoraluartumilli inersimasut ilaasa meeqqat atoqatiginiartarpaat. Tamanna eqqunngilluinnartuuvoq. Imaassinnaavortaaq meeqqat ilaat atoqateqartartut inersimasunit ilikkarsimagamikku. Biibilimi eqqartorneqarpoq itsaq illoqarfimmi Sodomami taama pisoqarsimasoq. Allassimavoq illoqarfiup “angutitaasa inuusuttut utoqqaallu” angutit Lotimut pulaartut atoqatiginiaraluaraat. — 1 Mosesi 19:4, 5.

Soorlu Jiisusip sernissorneqarnissani pisariaqartikkaa illittaaq inersimasut ilaannut, immaqalu allaat meeqqat ilaannut ilinnik atoqatiginninniartunut, sernissorneqarnissat pisariaqartippat. Ilimanarpoq ikinngutiginiartuusaassagaatsit. Immaqalu aamma neriorsussavaatsit mamakujuttunik allanilluunniit nuannarisannik tuniumallutit, qanoq iliorfigineraatsit allanut oqaluttuarinngikkukku. Inuilli taakku imminuinnaq eqqarsaatigipput Saatani anersaapiluilu assigalugit. Ikinngutiginngilaatsit, namminneq nuannisaarnissartik kisiat eqqarsaatigaat. Meeqqamik atoqateqarlutik nuannisaarnissamittut isigaat. Eqqunngilluinnartuuvorli!

Imminut nuannisartinniaannarlutik qanoq iliorfigisinnaagamitit? — Immaqa kinguaassiuutitit attuuassavaat, immaqaluunniit kinguaassiuutitik illit kinguaassiuutinnut attuutsissallugit. Illilli usut imaluunniit utsuppit paavisa amersaat kimulluunniit pinnguaritinngisaannassavat. Qatanngutinnulluunnit ataatannulluunniit anaanannulluunniit naamik.

Qanoq imminut sernissorsinnaavit timerpit allanit eqqunngitsumik attuuaneqarnissaanut? — Pingaarnerpaamik kinguaassiuutitit kimulluunniit pinnguaritissanngilatit. Taamaaliorniartoqaraluarpat nipituumik aalajangersimasumillu oqassaatit: “Tassa! Oqassaanga!” Oqarpalli illit nammineq pisuusutit upperissanngilat. Salluvoq. Kialuunniit taamaaliorfigigaluarpatit inersimasumut oqaatigissavat. Oqaatigissavat oqaraluarpalluunniit marluullusi isertugarigissi. Neriorsoraluarpatit kusanartumik tuniniarlutit, imaluunniit sioorasaarpatit oqaraluaruit ajortorujussuarmik pisoqassasoq, taava qimaannassavat allalu qanoq pisoqarsimaneranik oqaluttuullugu.

Annilaangasariaqanngilatit, mianersuinnassaatilli. Angajoqqaatit oqarpata inuit ilaat sumiiffiilluunniit ilaat ilinnut navianarsinnaasut taava naalassavatit. Taamaalioruit inuit ajortut ajortumeernissannut periarfissaqassanngillat. Jehovamit siunnersuutit ajunngitsut pisavut maleruartuaannakkit. Sernissorniarluta tunniuppai.