Nasartaateqartarluniluunniit nasaqartarnissaq — qaqugukkut aamma sooq?

Qaqugukkut aamma sooq arnaq kristumiu guutisiornerminut tunngatillugu nasartaateqartariaqartarluniluunniit nasaqartariaqartarpa? Apustilip Paulusip isumassarsisitaalluni tamatuminnga eqqartuinera sammilaariartigu. Siunnersorpaatigut Guutimut ataqqinaataasunik aalajangiisarsinnaaniassagatta. Korinthimiunut allakkani siullerni 11:3-16-imi Paulusip eqqarsaatigisariaqakkavut marluk eqqaavai: (1) Qaqugukkut arnat nasartaateqartariaqartartut, aamma (2) piumasaqaammik tamatuminnga malinninnissamut pissutaasut.

Qaqugukkut arnat nasartaateqartariaqartut. Paulusi pisunik marlunnik eqqartuivoq: qinuneq pruffiititullu oqalunneq. (Versit 4 aamma 5) Qinuneq Jehovamut saaffiginninneruvoq taassuminnga pallorfiginninnermut ilaasoq. Pruffiititut oqalunnermi pineqarput ullumikkut Biibili tunngavigalugu ilinniartitsinerit tamarmik oqaluussisartunit kristumiunit suliarineqartartut. Paulusip arnat qinugaangamik allanillu Biibili pillugu ilinniartitsigaangamik tamatigut nasartaateqartarnissaat pivaa? Naamik, tamatiguusariaqanngilaq.

Paulusip arnat ilaqutariinni ilagiinnilu qaqugukkut nasartaateqartariaqarnerat eqqaavaa. Ima allappoq: “Arnap angut niaqorimmagu. ... Arnalli kialuunniit qinutilluni pruffiititulluunniit oqalutsilluni niaqqumigut uleqanngitsup niaqquni kanngunarsartarpaa.” (Versit 3 aamma 5) Jehova aalajangerpoq nuliaasup uini niaqorissagaa, ilaqutariinni qullersaassasoq. Jehovap uiusumut akisussaaffigititai nuliaasup suliarippagit tamanna uiusup oqartussaassusianut ataqqinninngitsuliornerullunilu uiusumut kanngunarsaataassaaq. Assersuutigalugu arnaq uini najuutsillugu Biibilimik atuaqqissaaqateqartariaqaruni nasartaateqarnermigut taassuma oqartussaaneranik ataqqinnissaaq. Taamaaliussaaq uini kuisimasuugaluarpat kuisimasuunngikkaluarpalluunniit, uiusormi ilaqutariinni ittuuvoq.a Nuliaasoq erni ukiukitsoq kuisimasoq najuutsillugu nipilimmik qinuguni ilinniartitsiguniluunniit aamma nasartaateqartariaqassaaq. Erni taanna ilaqutariinni ittuunngikkaluartoq angutilli kristumiut ilagiivinnut ilaasortaasup kuisimasup oqartussaassusianik ataqqinninnini pissutigalugu nasartaateqartariaqassaaq.

Ilagiinni pissutsit pillugit Paulusi ima allappoq: “Immaqa ilaasa tamanna saqitsaassutigerusussagaluarpaat; uagulli taama ileqqoqanngilagut, Guutilluunniimmi ilagiissai naami.” (Versi 16) Ilagiinni kristumiuni siulersuisussatut akisussaaffilerneqarsimasut tassaapput angutit kuisimasut. (1 Tim 2:11-14; Hebr 13:17) Angutit kisimik utoqqaanertaasussatut ilagiinnilu kiffartortuusussatut toqqarneqartarput Guutillu savaataanik paarsisutut Guutimit akisussaaffilerneqartarlutik. (1 Petr 5:1, 2) Ilaannikkulli arnaq angummit kuisimasumit piumasaqaatinik eqqortitsisumit isumagineqartartumik isumaginnittariaqalersinnaasarpoq. Assersuutigalugu katersuunnermi angummik kuisimasumik katersuutitsisinnaasumik najuuttoqanngippat arnaq katersuunnermi aqutsisuusariaqalersinnaavoq. Aamma imaassinnaavoq arnaq angutip kuisimasup najuuffigisassaanik Biibilimik atuaqqissaaqateqarnissamik isumaqateqarsimasoq.b Atuaqqissaaqateqarnermini ilagiit sinnerlugit ilinniartitsigami nalunagulu angummit kuisimasumit isumagineqartartumik isumaginnilluni nasartaateqarluniluunniit nasaqarnissaa pissusissamisuussaaq.

Guutisiornermut tunngasorpassuarni allani qatanngutit arnat nasartaateqartariaqanngillat. Assersuutigalugu qatanngut arnaq ataatsimiinnerni akigaangami, uini angulluunniit kuisimasoq alla ilagalugu illumiit illumut oqaluussigaangami, meeqqani kuisimanngitsut atuaqqissaaqatigigaangamigit qinoqatigigaangamigilluunniit nasartaateqartariaqanngilaq. Matumanili eqqaaneqanngitsumik allamik pisoqarpat qatanngullu arnaq nalorniguni misissuisariaqarpoq.c Sulili nalornillunilu nasartaateqartariaqartutut misigiguni nasartaateqarnissaa eqqunngitsuliornerussanngilaq.

Pissutaasut. Versi 10-mi kristumiup arnap nasartaateqarnissamik piumasaqaammik malinnikkumaneranut pissutaasut marluk eqqaaneqarput: “Arnaq inngilit pillugit niaqqumigut uleqassaaq piginnaanermut nalunaaqutaasumik [oqartussaassutsimut ilisarnaataasumik, NW].” Siullermik, maluginiakkit oqaatsit ‘oqartussaassutsimut ilisarnaat’. Arnap nasartaateqarnermigut ersersippaa angutit kuisimasut ilagiinniittut Jehovamit oqartussaassuseqartinneqarnerat akueralugu. Taamaalillunilu Jehovamik asannillunilu ilumoorfiginninnini ersersippaa. Aappassaanik, maluginiarsinnaavarput allassimammat “inngilit pillugit”. Arnap nasartaateqarnera pinngortitanut anersaajusunut pissaanilinnut qanoq sunniuteqarsinnaagami?

Jehovap oqartussaassusiata taassuma peqatigiissortaaniittunit tamanit, qilammiittunit nunarsuarmiittunillu, ataqqineqarnissaa inngilit pingaartippaat. Aamma inngilit inuit naammalluinnanngitsut tamatumunnga tunngatillugu maligassiaat iluaqutigaat. Inngilittaarmi Jehovap aaqqissuussaanut naalatsigitittussaapput. Itsaq inngilerpassuit naalatsigitinnermut tunngatillugu misilinneqaramik nakkaannarput. (Jud 6) Inngilit maluginiarsinnaavaat arnap kristumiup angummit kuisimasumit ilagiinniittumit misilittagaqarnerugaluarluni, ilisimasaqarnerugaluarluni silassorinnerugaluarlunilu taassuma oqartussaassusianut naalatsigitinnera. Aamma imaassinnaavoq arnaq kristumiu alla maluginiagaat tanitaasoq Kristusimut naalakkersueqataalersussat ilaat. Kingusinnerusukkut arnaq taanna Kristusimik naalakkersueqateqalissaaq inngilinillu qaffasinnerusumik inissisimaffeqalissalluni. Inngilinut maligassaalluangaarami! Aap, ilumoorfiginnilluni naalatsigitinnikkut maniguunnermik naalannermillu ersersitsisinnaaneq — inngilit aalajaatsut millionillit isiginnittoralugit — qatanngutinut arnanut tamanut pisinnaatitaaffiuvoq angisooq!