Apeqquteqarfik
◼ Oqaluussisartoq arnaq oqaluussisartumik angummik ingiaqateqartilluni matumi Biibilimik atuaqqissaaqateqarnermini nasartaateqartariaqarpa?
Arnaq oqaluussisartoq aalajangersimasumik Biibilimik atuaqqissaaqateqaruni angummillu oqaluussisartumik najorteqarluni, nasartaateqartariaqarpoq. (1 Kor 11:3-10) Napasuliaq Alapernaarsuiffik 1. septembari 2002-moortoq qupperneq 32-mi nassuiaateqarpoq: “Ilinniartitsineq aaqqissugaasoq, atuaqqissaarnermilu aqutsisoq siulittaasutut oqaatigineqarsinnaavoq. Taamaattoqartillugu ilagiit sinnerlugit ilinniartitsisoqarpoq. Angut kuisimasoq najuutsillugu qatanngutip arnap kuisimasup atuaqqissaarneq taamaattoq aqukkuniuk eqqortuliussaaq nasartaateqaruni.” Tamanna angerlarsimaffimmi, matumi allamiluunniit atuaqqissaaqatigiinnermi atuuppoq.
Kisiannili qatanngut arnaq oqaluussisartumik angummik ilagisaqartilluni, matumi suli aallartilluarsimanngitsumik Biibilimik atuaqqissaaqateqarnermi imaluunniit Biibilimik qanoq atuaqqissaaqateqartoqartarneranik Biibililersaarutinilluunniit allanik pulaartakkamut takutitsinissaq siunertarineqarpat, nasartaateqartariaqanngilaq. Pulaaqqiisarnermi ineriartortitsinikkut matumi Biibilimik atuaqqissaaqateqarneq pilersikkiartuaarneqartarmat pissutsit apeqqutaatillugit aamma ingasaassinianngitsumik qaqugukkut nasartaateqarnissaq pisariaqartinneqassanersoq aalajangiisoqarsinnaavoq.