“Isumalluarit!”

1, 2. Sooq Paulusip Jerusalemmimi malersor­neqarnini tupaallaatiginngilaa?

PAULUSI Romamiut sakkutuuinit tigusarineqaq­qikkami Jerusalemmimi inunnit kamattunit annaanneqarpoq. Malersor­neqarnini tupaallaatiginngilaa. Oqarfigineqarsimavormi Jerusalemmimi ‘parnaarus­saassallunilu annikil­liortitaas­salluni’. (ApS 20:22, 23) Paulusillu qanorpiaq pineqar­nissani nalugaluarlugu nalunngilaa Jiisusip atia pillugu naalliutsitaaq­qikkumaarluni. – ApS 9:16.

² Pruffiitit kristumiut siulittuutigisimavaat Paulusi ‘qilersor­neqassasoq allamiunullu pisinneqassasoq’. (ApS 21:4, 10, 11) Ungasin­ngitsukkut juuterpas­suarnit toqunniar­neqaraluarpoq, kinguninngualu juutit eqqartuus­siviisa qullersaanni eqqartuussisut assortuutingaarmata Paulusi taakkunannga toqunneqas­sasorineqarpoq. Maanna Romamiut sakkutuuinit tigusarineqarpoq unnerluutigin­nitsiminullu arlaleriarluni imminut illersoq­qittariaqalerluni. (ApS 21:31; 23:10) Ilumummi Paulusip qiimmas­sarneqar­nissani pisariaqartippaa!

3. Oqaluus­siuarsin­naaqqulluta qanoq qiimmas­sarneqar­tarpugut?

³ Naggatissap nalaani inuugatta nalunngilarput “Guutimut tunniusimallutik Kristusimillu Jiisusimik ataasioqateqarlutik inuujumasut tamarmik aamma [malersor­neqassasut]”. (Tim 2. 3:12) Ilaannikkut uaguttaaq oqaluus­siuarnias­sagatta qiimmas­sarneqar­tariaqar­tarpugut. Biibililersaarutitsinni ataatsimiin­nernilu, ‘inussiamit aalajaallunilu silatuumit’ aaqqissor­neqartuni, qiimmas­sarneqar­tarnerput qujamasuutigingaarparput! (Mat 24:45) Jehovap neriorsor­nikuuaatigut akerlilersuisut nungutis­sanngik­kaatigut oqaluus­sinerpul­luunniit unitsis­sanngikkaat. (Es 54:17; Jer 1:19) Paulusili qanoq pineqarpa? Akerlilersuisoqaraluartoq oqaluus­siuarsin­naaqqullugu qiimmas­sarneqarpa? Taamaappat qanoq qiimmas­sarneqarpa, qanorlu piva?

“Angutit peqatigiin­niapiluttut” iluatsin­ngillat (ApS 23:11-34)

4, 5. Paulusi piffissaq eqqorlugu qanoq qiimmas­sarneqarpa, sunalu pilersaarutigineqarpa?

⁴ Paulusi juutit eqqartuus­siviisa qullersaannit annaanneqarami unnuaq taanna pisariaqar­tilluin­nakkaminik qiimmas­sarneqarpoq. Ima allassimavoq: “Naalakkap Paulusi saqqummerfigaa oqarfigalugulu: ‘Isumalluarit! Jerusalemmimimi uanga pillunga ilisiman­nittutut nassuiaaq­qissaarsimanittut Romami nassuiaassaatit.’” (ApS 23:11) Taama neriorsor­neqarami Paulusip annaanneqar­nissani qularinngilaa. Paasivaa Romamut apuutis­salluni tassanilu Jiisusi pillugu oqaluus­sissalluni.

⁵ Paulusi piffissaq eqqorlugu qiimmas­sarneqarpoq. Aqaguani angutit juutiusut 40-nit amerlanerusut “isumaqatigiipilupput uppernarsaal­lutillu [imminullu perloqqullutik, q.a.i.] Paulusi aatsaat toqoreerunikku nerillutillu imerniarlutik”. Taamatut uppernarsaanerannit erserpoq Paulusimik toqutsinissartik qanoq aalajangiusimatigigaat, allaat neriorsuinermittut iliunngikkunik perloqquneqas­sasoripput. (ApS 23:12-15) Suliamik misissuititsineruniar­tuusaarlutik palasit nuimasut utoqqaanertallu akuersitillugit pilersaarusiorput Paulusi juutit eqqartuus­siviisa qullersaannut sassarteq­qinneqassasoq. Eqqartuus­sivimmukar­tilluguli toqunniarlugu taassuminnga saassus­sinissaminnut piareersimassapput.

6. Paulusimik toqutsinissamik pilersaarut qanoq paasineqarpa, inuusuttullu Paulusip jorngua qanoq ilaarsin­naavaat?

⁶ Paulusip jornguata pilersaarutipiluk tusarpaa Paulusilu nalunaarfigalugu. Taava Paulusip jornguni inuusuttoq Romamiut sakkutuuisa naalagaannut Claudiusi Lysiasimut tamatuminnga nalunaaruteqartippaa. (ApS 23:16-22) Jehovap inuusuttut Paulusip jorngua ilaarlugu Guutip innuttaasa pisariaqar­titaannik namminneq pisariaqar­titaminnit pingaar­nerutitsisut oqaluus­sinermillu sapinngisaminnik tapersersuisartut asavai.

7, 8. Paulusi ajortumik pineqan­nginniassammat Claudiusi Lysiasi sua?

⁷ Paulusip toqunniar­neqarnera paasigamiuk Claudiusip Lysiasip, sakkutuunut 1.000-nut naalagaasup, peqqussutigaa sakkutuut 470-it – ilaatigut hestersut qalugiusalisartullu – Paulusi unnuk taanna Jerusalemmimiit isumannaatsumik Cesariiamukaatissagaat. Tassanilu kaasarip sinniisuanut Feliximut pisinneqassaaq.a Cesariiami Judiiami Romamiut naalakkersuisoqarfianni juuterpas­suaqaraluartoq juutiun­ngitsut amerlanerupput. Jerusalemmimi inuppassuit uppeqatigin­ngisaminnut siumut isummius­sereerlutillu nakuuserfigin­nittarput, Cesariiamili taamaat­toqannginnami eqqissisimanar­nerungaarpoq. Judiiami Romamiut sakkutuuisa qullersaqarfiat aamma Cesariiamiippoq.

⁸ Lysiasi Romamiut inatsisaat malillugit Feliximut allakkiorluni qanoq pisoqar­neranik nassuiaavoq. Tassani eqqaavaa Paulusip juutinit toqunniar­neqartup Romamiuunera paasigamiuk aniguisis­simallugu. Aamma allappoq “toqumik parnaarus­saanermil­luunniit kinguneqarsin­naasumik” unnerluutigineqan­ngitsoq. Toqunniar­neqarmalli Feliximut aallartippaa taassuma unnerluussutit paasinias­sammagit eqqartuus­sisinnaanias­sammallu. – ApS 23:25-30.

9. (a) Paulusip Romamiutut pisinnaatitaaffii qanoq innarler­neqarpat? (b) Sooq nunagisatsinni innuttaasutut pisinnaatitaaffigut illersuutigisariaqarsin­naasarpagut?

⁹ Lysiasi allakkamini unneqqaril­luinnarpa? Naamik. Ajunngin­nerpaamik isigineqar­niassagami pisimasut allaanerulaartumik allaatigai. Paulusip aniguisin­neranut pissutiginngilaa Romamiuunera. Lysiasillu eqqaanngilaa Paulusi “kalunnernik marlunnik” qilersor­tissimallugu ‘iperartuutigalugulu killisior­neqarnissaanik’ peqqusisimalluni. (ApS 21:30-34; 22:24-29) Lysiasip taamaalior­nermigut Paulusip Romamiutut pisinnaatitaaffii innarlerpai. Nalitsinni Saatanip inuit upperisarsior­nerminnik ingasaassisut Guutip innuttaanik malersuinermut atortarpai. Taamaat­tumillu pisinnaatitaaffigut innarler­neqarsin­naasarput. Paulusili ilaarlugu nunagisatsinni innuttaasutut pisinnaatitaaffigut illersuutigisarsin­naavagut.

“Sioorananga imminut illersor­niarpunga” (ApS 23:35–24:21)

10. Paulusi ingasattumik qanoq unnerluutigineqarpa?

¹⁰ Paulusi Cesariiami ‘Herodasip illorsuani paarineqarpoq’ unnerluussisimi Jerusalemmimiit tikinnissaasa tungaanut. (ApS 23:35) Ullut tallimat qaangiummata taakku – palasiuneq Anania, eqqartuus­sissuserisoq Tertulusimik atilik utoqqaanertallu ilaat – tikipput. Tertulusip Felixi juutinut iliuuserisimasai pillugit nersualaaq­qaarpaa iluareq­qusaarniarluni.b Taava Paulusi pillugu ima oqarpoq: “Angutip uuma juutit nunani tamalaaniittut pikitsitseq­qullugit kamassaar­taramigit nappaas­suartut naalliuutaavoq, aamma immikkoor­niaqatigiit Naazaratsimiut siulersortigaat. Aamma guutisiorfik mingutsin­niarmagu tigusaraarput.” Juutillu allat tamakku “ilumoor­nerarlugit aamma unnerluutigilerpaat”. (ApS 24:5, 6, 9) Pikitsitseq­qusinermik, immikkoor­niaqatigiinnik siulersuinermik guutisiorfimmillu mingutsitsinermik unnerluussutit toqumut pillarneqaataasin­naapput.

11, 12. Paulusi unnerluutigineqar­nerminut qanoq imminut illersorpa?

¹¹ Taava Paulusi oqaaseqaq­quneqarami ima oqarpoq: “Sioorananga imminut illersor­niarpunga.” Unnerluutigineqarnini ilumuun­nginnerarpai. Guutisiorfimmik mingutsitsisimanngilaq pikitsitsinis­samulluunniit kajumis­saarinani. Oqarpoq ‘ukiorpaalunni’ Jerusalem­mimiissimanani, maannalu ‘inuiaqatini piitsut tunissuteqarfiginiarlugit’ tikilluni. Tassa kristumioqatiminut – immaqa kaannersuaqarnera malersor­neqarnertillu pissutigalugit piitsun­ngorsimasunut – tunissutit pajugutigai. Paulusi aamma oqarpoq guutisiorfimmut isinngin­nermini ‘ileqqulersuutit malillugit minguersarsimalluni’ aamma ‘Guutip inuillu saavanni minguitsumik nalunngeqatigin­nissuteqar­nissani sulissutigiuarlugu’. – ApS 24:10-13, 16-18.

¹² Paulusip nassuerutigaa taakkua ‘guutisioriaasertik naapertorlugu immikkoor­niarnermik taasaat malillugu siuaasami Guutiat kiffartorfigalugu’. Aammali oqarpoq “Moorsisip inatsisaani pruffiitinillu allakkani allassimasut tamaasa” upperalugit. Aamma ‘Guutip toqusunik naapertuil­luartunik naapertuil­luanngitsunillu makititsinis­saminik neriorsuutaa’ unnerluus­sisimisulli upperaa. Taava Paulusip imminut unnerluus­sutaannik uppernarsaaqquai ima oqarluni: “Angutit maaniittut juutit eqqartuus­siviisa qullersaannut sassartitaagama qanoq pinerlut­tuliorsimasunga oqaatigilissuk. Akornganni ima suaarnera pillugu taamaallaat unnerluutigisin­naavaannga: ‘Toqusut makititaanis­saannik neriuutiga pillugu ullumi eqqartuus­saavunga!’” – ApS 24:14, 15, 20, 21.

13-15. Oqartus­saasunut sassartin­neqarnermi oqaluus­seriaatsikkut Paulusi qanoq maligas­saalluarpa?

¹³ Guutisiornerput pissutigalugu eqqissiviil­liortitsisutut, pikitsitsisutut immikkoor­niaqatigiin­nulluunniit navianartunut ilaasutut eqqunngitsumik unnerluutigineqarutta Paulusip maligas­siuilluarnera ilaarsin­naavarput. Paulusi Tertulusitut innani Feliximut iluareq­qusaarutinik oqaaseqanngilaq. Kisianni eqqissisimasumik, ataqqin­nittumik, ersarissumik ilumoor­tumillu oqaluppoq. Paulusip eqqaavaa ‘juutit Aasiameersut’ guutisiorfimmik mingutsitsisimaneraasut najuutin­ngitsut unnerluus­siniartullu kiinarsilluni unnerluutigisus­saagaluaraanni. – ApS 24:18, 19.

¹⁴ Paulusip upperisaminik nassuiaanissani tunuarsimaarfiginngilaa. Sapiilluni toqusut makititaanis­saannik neriuummik upperin­ninnerarpoq, tamanna pissutigalugu juutit eqqartuus­siviisa qullersaanni eqqissiviil­liortoqaleraluartoq. (ApS 23:6-10) Sooq Paulusip imminut illersor­niarluni toqusut makititaanis­saannik neriuutini eqqaavaa? Jiisusi taassumalu toqusunit makititaasimanera pillugit ilumoortoq oqaluus­sissutigigamiuk. Akerlilersuisullu upperin­ngilaat Jiisusi makititaasimasoq. (ApS 26:6-8, 22, 23) Aap, Paulusip unnerluutigineqar­neranut pissutaasoq pingaar­nerpaaq tassaavoq toqusunik makititaasoqarsin­naaneranik – ingammik Jiisusip makititaasimaneranik – upperin­ninnera.

¹⁵ Paulusi ilaarlugu sapiilluta oqaluus­sisinnaavugut Jiisusillu oqaasii uku nakussatsis­sutigisin­naallugit: “[Atera] pissutigalugu inunnit tamanit uumissor­neqassaasi. Naggatis­samulli pinertusaartoq annaanneqassaaq.” Qanoq oqassanerluta ernumas­sutigisariaqarparput? Naamik, Jiisusimmi ima neriorsorpaatigut: “[Sassartin­neqaleraangassi] qanoq oqaaseqas­sanerlusi ernumas­sutigisas­sanngilarsi. Tamatumanerpiaq qanoq oqassanerlusi nalussan­ngilarsi, ilissimi oqalunngilasi, anersaarli illernartoq oqaluppoq.” – Mak 13:9-13.

“Felixi annilaangalerpoq” (ApS 24:22-27)

16, 17. (a) Paulusi unnerluun­neqarmat Felixi sua? (b) Felixip annilaangaler­neranut suna pissutaasimasinnaava, aamma sooq Paulusi aggersartarpaa?

¹⁶ Felixi aatsaat kristumiut upperisaannik tusagaqanngilaq. Ima oqaluttuarineqarpoq: ‘Felixip Aqqut pillugu [tassa kristumiut siulliit pillugit] ilisimasaqarluarami ima oqarluni qimagutitippai: “Sakkutuunut 1.000-nut naalagaq Lysiasi maanga ateriarpat ilissinnut tunngasut aalajangiif­figiumaarpakka.” Sakkutuullu 100-t naalagaat peqquaa angut tigummigal­larneqassasoq, kisianni mattutivin­neqassan­ngitsoq ikinngutiminillu isumassor­neqassasoq.’ – ApS 24:22, 23.

¹⁷ Ullualuit qaangiummata Felixi nulianilu Drusilla, juutiusoq, “Paulusi Kristusimut Jiisusimut upperneq pillugu oqaluttuartoq” tusarusuk­kamikku peqqusipput aaneqassasoq. (ApS 24:24) “Paulusilli naapertuil­luarneq, imminut aqussinnaaneq eqqartuun­neqarnissarlu eqqartulermagit Felixi annilaangalerpoq”, immaqa eqqunngitsuliornini pissutigalugit ilerasukkami. Taamaattumik Paulusimut ima oqarpoq: “Qimaguk­kallarniarit, periarfis­saqalerumali aggersarumaarpakkit.” Tamatuma kingorna Felixip Paulusi akulikitsumik aggersartarpaa. Imaanngitsoq ilumoortoq paaserusukkamiuk Paulusimilli aningaasanik tunineqar­nissani neriuutigigamiuk. – ApS 24:25, 26.

18. Sooq Paulusip Feliximut nulianullu “naapertuil­luarneq, imminut aqussinnaaneq eqqartuun­neqarnissarlu” eqqartorpai?

¹⁸ Sooq Paulusip Feliximut nulianullu “naapertuil­luarneq, imminut aqussinnaaneq eqqartuun­neqarnissarlu” eqqartorpai? Eqqaamajuk ‘Kristusimut Jiisusimut uppertunut’ piumasaqaatit paaserusukkaat. Paulusip nalunngilaa Felixi nulialu inuunerluttuusut, naakkit­taatsuusut naapertuil­luanngitsulior­tartullu. Ersaris­sarpaalu Jiisusimut malinnit­tunngorusuttut Guutip qanoq piumasaqarfigigai. Taamaalilluni ersersippaa Felixi nulianilu Guutip najoqqutas­siaanut naapertuutin­ngitsumik inuuneqartut. Paasisus­saagaluarpaat inuit tamarmik eqqarsaatiminnut, oqaatsiminnut iliuutsiminnullu tunngatillugu Guutimut akisussaasuugamik eqqartuun­neqarumaartut. Felixip aamma paasissagaluarpaa Paulusimik eqqartuus­sisinnaagaluarluni nammineq Guutimit eqqartuun­neqassalluni. Tupinnanngilaq ‘Felixi annilaangalermat’!

19, 20. (a) Oqaluus­sinitsinni naapitarput soqutigin­nippasik­kaluarluni allannguerusun­ngitsoq paasigutsigu sussaagut? (b) Qanoq nalunngilarput Felixi Paulusimut ikinngutaan­ngitsoq?

¹⁹ Oqaluus­sinitsinni Felixitut ittunik naapitaqarsin­naavugut. Aallaqqaammut soqutigin­nippasik­kaluarlutik Guuti naalakkusun­ngilaat inuunerminnillu allannguerusunnatik. Taamaattut mianersorfigisarpagut. Paulusili ilaarlugu ataqqin­nilluta Guutip piumasaqaatai oqaluttuarisin­naavagut. Imaassin­naavormi ilumoortoq killitsis­sutigissagaat. Paasigutsiguli Jehovap uumigisaanik iliuuseqarun­naarusun­ngitsut imminiigin­narlugit inuit allat ilumoortumik paasinnik­kusuttut ujarniar­tarpagut.

²⁰ Felixip qamuuna qanoq ittuunera oqaatsinit makkunannga ersersin­neqarpoq: “[Ukiut] marluk qaangiummata Porkiusi Festusip Felixi kingoraarpaa. Felixilu juutinit iluarisaarusukkami Paulusi parnaarus­sivimmiitiinnarpaa.” (ApS 24:27) Felixi Paulusimut ikinngutaanngilaq. Nalunngik­kaluarpaa kristumiut pikitsitsisuun­ngitsut eqqissiviil­liortitsinatillu. Aamma nalunngilaa Paulusi Romamiut inatsisaanik unioqqutitsisiman­ngitsoq. Taamaak­kaluartoq “juutinit iluarisaarusukkami Paulusi parnaarus­sivimmiitiinnarpaa”.

21. Porkiusi Festusi naalakkersuilermat Paulusimut qanoq pisoqarpa, Paulusillu suna nakussatsis­sutigisimassavaa?

²¹ Apustilit Suliaat 24:27-mit paasisin­naasatsitut Porkiusi Festusip Felixi kingoraarmagu Paulusi suli parnaarus­saaqqavoq. Taava oqartus­saassusilinnut assigiin­ngitsunut sassartin­neqaqat­taalerpoq. Aap, Jiisusip siulittuutigisaatut ‘kunnginut naalakkersuisunullu sassartin­neqartarpoq’. (Luk 21:12) Sammisas­satsitullu taamani allaat naalakkersuisumut pissaaneqar­nerpaajusumut oqaluus­siumaarpoq. Tamakkuninnga nalaataqar­nermini uppernikkut sanngiil­linngisaannarpoq. Qularnan­ngitsumik Jiisusip oqaatigisaa una nakussatsis­sutigiuarpaa: “Isumalluarit!”