“Suliaq kaasarimut suliassan­ngortippara!”

1, 2. (a) Paulusi qanoq nalaataqarpa? (b) Paulusip kaasarimut suliassan­ngortitsineranut tunngatillugu suna apeqqutaalerpa?

PAULUSI Cesariiamiitilluni paarsisunit nakkutigineqarpoq. Ukiut marluk tamatuma siorna Judiiamut uterami ullualuit ingerlanerinnaanni juutinit minnerpaamik pingasoriarluni toqunniar­neqaraluarpoq. (ApS 21:27-36; 23:10, 12-15, 27) Iluatsitsin­ngillat, tunniutiin­nanngillalli. Paulusip paasigamiuk akeqqaminut aallartin­neqalerluni Romamiut kaasariata sinniisuanut Festusimut ima oqarpoq: “Suliaq kaasarimut suliassan­ngortippara!” – ApS 25:11.

² Paulusip kaasarimut suliassan­ngortitsinera Jehovap piumasaanut naapertuuppa? Tamatuma paasinissaa uagutsinnut pingaaruteqarpoq. Naggatissammi nalaani Guutip kunngeqarfianik oqaluus­sisartuusugut ‘nutaarsiassanik nuannersunik inatsisitigut illersuinermi’ Paulusi ilaassanerlugu paasisariaqarparput. – Flp 1:7.

‘Kaasarip eqqartuus­sisutut issiaviata saavani nikorfavunga’ (ApS 25:1-12)

3, 4. (a) Sooq juutit Paulusi Jerusalem­mimukar­tikkusuppaat, qanorlu aniguiva? (b) Paulusimik tapersersuinermisut Jehovap qanoq tapersersor­tarpaatigut?

³ Judiiami kaasarimut sinniisun­ngorlaaq Festusi naalakkersuiler­nerminiit ullut pingasut qaangiummata Jerusalem­mimukarpoq.a Tassani palasit nuimasut juutillu siulersortaasa Paulusi pinerlut­tuliornerarlugu unnerluus­sutaannik ilisimatin­neqarpoq. Juutit unnerluutiginnittut taakkua nalunngilaat sinniisun­ngorlaaq pimoorus­silluni juutinik eqqisseqateqar­nissaminik Romamit piumaffigineqarsimasoq. Taamaattumik Festusi ajunngisaarfigeq­qullutik qinnuigaat Paulusi Jerusalem­mimukar­teqqullugu tassanilu eqqartuun­neqaqqullugu. Ajortumilli siunertaqarlutik taamatut qinnuteqarput. Paulusi Cesariiamiit Jerusalemmimut aqqutaani terlinganeerlugu toqunnialersaarpaat. Qinnutaat akuerinagu Festusi ima oqarpoq: “Eqqunngitsumik iliorsimappat siulersortissi unnerluutiginiarlugu [Cesariiamut] ateqatigis­savaannga.” (ApS 25:5) Taamaalilluni Paulusi anigueqqippoq.

⁴ Paulusi misilin­neqaraangami Jehovamit tamatigut Jiisusi Kristusi aqqutigalugu tapersersor­neqartarpoq. Assersuutigalugu Paulusi takorluuisin­neqarluni Jiisusimit ima oqarfigineqarpoq: “Isumalluarit!” (ApS 23:11) Uagut aamma ajornar­torsior­tarlutalu malersor­neqartarpugut. Ajornar­torsioraangatta Jehovap sernissor­tuaannan­ngilaatigut. Pinertusaar­niassagattali ilisimas­suseqar­tittarpaatigut nukissaqar­tillutalu. ‘Pissaanermik nalingin­naanngitsumik’ Guutimit tunineqar­nissarput upperiuaan­narsinnaavarput. – Kor 2. 4:7.

5. Festusip Paulusi qanoq pivaa?

⁵ Ullualuit qaangiummata Festusi Cesariiami ‘eqqartuussisup issiavianut ingippoq’.b Paulusi taassuminngalu unnerluutiginnittut najuupput. Paulusi pinerlut­tuliorsimanerar­neqarami ima oqarpoq: “Juutit inatsisaannut, guutisiorfimmut kaasarimul­luunniit akerliusumik ajortuliun­ngilanga.” Aap, Paulusi pisuussuteqan­nginnami iperagaasus­saagaluarpoq. Festusi qanoq aalajangiissava? Juutinit iluarisaarusukkami Paulusimut aperivoq: “Tamakku pillugit uanga saanni eqqartuun­neqarumallutit Jerusalemmimut majuarusuppit?” (ApS 25:6-9) Siunnersuutipalaajuvoq! Paulusimi Jerusalemmimut utertin­neqassagaluarpat unnerluutiginnittut eqqartuus­sisunngussapput, qularnan­ngitsumillu toqunneqassaaq. Tamatumani Festusip inunnit iluarisaanissani eqqortulior­nissamit pingaar­nerutippaa. Siornatigut naalakkersuisuusimasup, Pontiusi Pilaatusip, Jiisusi assingusumik pisimavaa. (Joh 19:12-16) Aamma nalitsinni eqqartuussisut ilaat inunnit allanit iluarisaarusukkamik eqqunngitsumik aalajangiisarput. Taamaattumik Guutip kiffaanut tunngatillugu eqqartuus­sivinni uppernarsaatinut akerliusumik aalajangiisoqaraangat tupaallaatigisan­ngilarput.

6, 7. Sooq Paulusi kaasarimut suliassan­ngortitsiva, tamannalu qanoq ilinniarfigaarput?

⁶ Festusip juutinut iluareq­qusaarusunnera Paulusip toqutaaneranik kinguneqarsinnaavoq. Taamaattumik Paulusip Romamiutut pisinnaatitaaffini atorpaa. Festusi ima oqarfigaa: “Kaasarip eqqartuus­sisutut issiaviata saavani nikorfagama maani eqqartuun­neqartariaqarpunga. Juutit ajortumik pinngilakka, tamannalu paasilersimassavat. … Suliaq kaasarimut suliassan­ngortippara!” Taamatut suliassan­ngortitsineq amerlanertigut allanngor­tinneqarsin­naanngilaq. Festusip ima oqarluni tamanna ersersippaa: “Kaasarimut suliassan­ngortitsigavit kaasarimukassaatit.” (ApS 25:10-12) Eqqartuus­sivimmut qaffasin­nerusumut suliassan­ngortitsinikkut Paulusi uagutsinnut maligas­siuivoq. Akerlilersuisut inatsisit atorlugit suliagut unitsin­niarsarigaangatigit Jehovamik guutisiorsin­naanerput illersorumallugu eqqartuus­sivinnut suliassan­ngortitsisarpugut.c

⁷ Paulusi pisuussuteqan­ngikkaluarluni ukiuni marlunni parnaarus­saaqqareerluni maanna Romami imminut illersor­nissaminut periarfis­sinneqarpoq. Romaliar­tinnaguli naalakkersuisup allap takorusuppaa.

“Qilammit takorluuisitaanittut iliorpunga” (ApS 25:13–26:23)

8, 9. Sooq kunngi Agrippa Cesariiamut tikeraarpa?

⁸ Paulusip kaasarimut suliassan­ngortitsinerata kingorna ullualuit qaangiummata kunngip Agrippap qatanngutaatalu Beriniikip ‘Festusi pisortatigoortumik tikeraarpaat’.d Taamani naalakkersuisun­ngorlaat atorfilittanit tikeraar­neqartarput. Agrippap nammineq kunngitut iluaqutiginias­sagamiuk Festusi naalakkersuisun­ngorneranik pilluaq­qullugulu ikinngutiginialerpaa. – ApS 25:13.

⁹ Festusip kunngimut Paulusi oqaluttuarimmagu Agrippap Paulusi oqaluuk­kusulerpaa. Aqaguani naalakkersuisut taakku marluk persuarsiorlutik eqqartuus­sivimmi issiavinnut ingikkiartorput. Tamanna tupinnarpasis­sinnaagaluartoq Paulusip oqaasissai maluginiar­narnerungaarput. – ApS 25:22-27.

10, 11. Paulusip qanoq Agrippa ataqqin­ninnermik ersersitsivigaa, inooriaaserisimasanilu pillugu qanoq oqaluttuarpa?

¹⁰ Paulusip kunngi Agrippa ataqqin­nilluni qujaffigivaa taassumunnga imminut illersorsin­naagami oqarluni taassuma juutit ileqqui isumaqatigiin­ngissutaallu tamaasa ilisimalluarai. Taava Paulusip inooriaaserisimasani oqaluttuaraa: ‘Guutisioriaatsitsinni immikkoor­niartut sukanner­nerpaat malillugit farisiiaritut inuusimavunga.’ (ApS 26:5) Paulusip farisiiaritut inuugallarami Missiarsip tikiunnissaa pillugu Guutip neriorsuutaa upperisimavaa. Maannalu kristumiun­ngoreerluni sapiilluni Jiisusi Kristusip Missiarsiunera oqaluus­sissutigaa. Tassa Paulusip Agrippamut nassuiarpaa Guutip neriorsuutaata – nammineq unnerluus­sisimilu upperisaasa – eqquussimaneranik oqaluussinini pissutigalugu eqqartuun­neqarluni. Tamanna tusareerlugu Agrippap Paulusi qanoq oqassanersoq suli soqutiginerulerpaa.e

¹¹ Paulusi kristumiunik sakkortuumik malersuisarsimanini pillugu ima oqaluttuarpoq: ‘Uanga qularisiman­ngikkaluarpara Jiisusip Naazaratsimiup aqqa akerlilersungaarumaarlugu. [Kristusimik malinnittut] kamaatingaarakkit illoqarfiit allat tikivillugit malersor­tarpakka.’ (ApS 26:9-11) Taamatut oqarami ingattarsinngilaq. Inuppassuit nalunngilaat Paulusip kristumiut qanoq sakkortutigisumik pisarsimagai. (Gal 1:13, 23) Immaqa Agrippa ima eqqarsarpoq: ‘Angutip taamaattup sunaana allanngus­sutigisimagaa?’

12, 13. (a) Paulusip kristumiun­ngornini qanoq oqaluttuaraa? (b) Qanoq isumaqarpa Paulusip ‘ajaappiaq suugartalik isimmit­tarsimagaa’?

¹² Paulusip tulliullugit oqaasiinit tamanna akineqarpoq: “Palasinit nuimasunit piginnaatitaallunga akuersis­suteqarlungalu malersor­niarlugit Damaskusiliar­tillunga ullup-qeqqata nalaani, kunngi, aqqutaani qilammit qaamaneq seqerngup qinngor­neranit sakkortunerujussuaq uannut angalaqatinnullu qinngortoq takuara. Tamattalu uppikkatta nipi qilammit hebræerisut uannut oqartoq tusaavara: ‘Saulusi, Saulusi, sooq malersorpinga? Ajaappissap suugartallip isimmit­tarnera ilinnut artornassaaq.’ Aperivungali: ‘Naalagaq, kinaavit?’ Naalagarlu akivoq: ‘Jiisusi, malersukkat.’”f – ApS 26:12-15.

¹³ Taamatut pisoqan­nginnerani Paulusip ‘ajaappiaq suugartalik isimmit­tarsimavaalusooq’. Ajaappissap suugartallip, uumasumik ungoorinermi atorneqartartup, nuuanik nersut isimmit­taaguni imminut ajoqusissaaq. Taamatuttaaq Paulusi Guutip piumasaanut akerliusumik iliorsimagami imminut anersaakkut ajoqusersimavoq. Paulusimut saqqummerami Jiisusip angutip taassuma eqqortuliorusuk­kaluarluni eqqunngitsumik paasinnit­taasillip eqqarsartaasia naqqinniarpaa. – Joh 16:1, 2.

14, 15. Paulusi inuunerminik allannguisimanini pillugu qanoq oqarpa?

¹⁴ Paulusip nassuiarpaa inuunini qanoq allanngor­tilluin­narsimallugu. Agrippamut ima oqarpoq: “Qilammit takorluuisitaanittut iliorpunga, Damaskusimiittulli siulliullugit tamatumalu kingorna Jerusalem­mimiittut, Judiiamiittut inuiaqatigiinnilu allaniittut peqqissimisariaqar­nerannik tamatumunngalu naapertuuttumik iliuuseqarnikkut Guutimut saattariaqar­nerannik tusarlerpakka.” (ApS 26:19, 20) Jiisusip Kristusip suliassiissutaa Paulusip ukiorpassuarni suliarisimavaa. Qanoq kinguneqarsimava? Paulusimut tusarnaartut peqqissimil­lutillu ajortuliorun­naarlutik Jiisusimut malinnit­tunngorput Guutillu piumasaatut iliortalerlutik. Najugaqarfigisaminni inatsisit maleruar­talerpaat eqqisseqatigiin­nissarlu sulissutigisalerlugu.

¹⁵ Paulusip oqaluus­sissutigisaa inuit qanoq iluaqutigisarneraat akerlilersuisut soqutigin­ngilaat. Paulusimi ima oqarpoq: “Tamanna pissutigalugu juutit guutisiorfimmi tigusaraannga toqunniarlungalu. Guutimeersumilli ikiorneqarneq misigigakku minnerusunut annerusunullu ilisiman­nittutut nassuiaajuarpunga.” – ApS 26:21, 22.

16. Eqqartuus­sisunut naalakkersuisunullu upperisagut pillugit oqaluttuaraangatta Paulusi qanoq ilaartarsin­naavarput?

¹⁶ Uppernitta ‘nassuiar­nissaanut piareersimajuar­tariaqarpugut’. (Pet 1. 3:15) Upperisagut pillugit eqqartuus­sisunut naalakkersuisunullu oqaluttuaraangatta Paulusip Agrippamut Festusimullu oqaloriaasia ilaarsin­naavarput. Ataqqin­nilluta oqaluttuarisin­naavagut ilumoortut Biibilimeersut nammineq inuunitsinni qanoq iluaqutigisimanerigut uagutsinnullu tusarnaartut qanoq iluaqutigisimaneraat. Eqqartuussisut naalakkersuisullu tamanna tusaraangamikku imaassinnaavoq ajunngin­nerusumik pisassagaatigut.

“Kristumiun­ngortis­sinnaagaluarparma” (ApS 26:24-32)

17. Festusi Paulusip oqaasiinut qanoq qisuariarpa, nalitsinnilu tamatumunnga assingusumik qanoq qisuariar­toqartarpa?

¹⁷ Paulusip oqaluus­sillaqqinnera naalakkersuisunut marlunnut taakkununnga sunniuteqarpoq. Ima pisoqarpoq: “Paulusi imminut illersorluni taama oqalutsillugu Festusi nipituumik oqarpoq: ‘Paulusi, silaarutileqaatit! Ilisimasaqar­nersuarpit silaarutitippaatit!’” (ApS 26:24) Nalitsinni oqaluus­sinitsinnut Festusitut qisuariar­toqartarpoq. Biibilimi qanorpiaq ilinniar­titsissutigineqartumik ilinniar­titsisaratta ingasaas­siniartutut isigineqar­tarpugut. Qaffasissumik ilinniagaqarsimasut ilaasa toqusunik makititsinissamik Biibilimi ilinniar­titsissut upperiuminaatsit­tarpaat.

18. Paulusi Festusimut qanoq akiva, Agrippalu qanoq oqarpa?

¹⁸ Paulusip Festusi ima akivaa: “Silaarutilin­ngilanga, ataqqinangaartutit Festusi, isumakkulli peqqillunga ilumoortumik oqaluppunga. Kunngimmi sapiillunga oqaluussama tamakku tamaasa nalunngil­luinnarpai. … Kunngi Agrippa, pruffiitit upperivigit? Nalunngilara upperigitit.” Agrippa ima oqarpoq: “Piffissap sivikitsup iluani kristumiun­ngortis­sinnaagaluarparma.” (ApS 26:25-28) Agrippap oqaatsini nammineq upperin­ngikkaluarunigil­luunniit Paulusip oqaasii eqqarsaatigeq­qissaarsimassavai.

19. Festusip Agrippallu Paulusi pillugu suna paasisimavaat?

¹⁹ Agrippa Festusilu nikuipput, tamatumalu ersersippaa tusarniaaneq naammassisoq. “Aniartor­tillutilli imminnut oqarfigipput: ‘Angut taanna toqumik parnaarus­saanermil­luunniit kinguneqarsin­naasumik iliuuseqanngilaq.’ Taava Agrippa Festusimut oqarpoq: ‘Kaasarimut suliassan­ngortitsisiman­ngikkaluaruni iperagaasin­naagaluarpoq.’” (ApS 26:31, 32) Paasisimavaat Paulusi pisuussuteqan­ngitsuusoq. Immaqalu tamanna pissutigalugu maannamiit kristumiut ajunngin­nerusumik pisalissavaat.

20. Paulusip naalakkersuisunut oqaluussinera iluaqutaava? Nassuiaruk.

²⁰ Festusi Agrippalu Paulusimit oqaluus­siffigineqareerlutik kristumiun­ngorunan­ngillat. Paulusip taakkununnga sassarnera iluaqutaava? Aap. ‘Kunngit naalakkersuisullu’ Judiiamiittut Paulusip oqaluus­siffigisai ilimananngilaq allanit oqaluus­siffigineqartut. (Luk 21:12, 13) Paulusillu misigisimasai misilin­neqartillunilu aalajaat­tuarnera uppeqataanut qiimmas­saataapput. – Flp 1:12-14.

21. Ajornar­torsioraluarluta oqaluus­siuarnerput qanoq kinguneqarluartarpa?

²¹ Nalitsinni aamma taamaappoq. Akerlilersor­neqaraluarluta ajornar­torsiuteqaraluarlutalu oqaluus­siuarutta kinguneqarluassaaq. Inunnut oqartus­saassusilinnut allatigut oqaluus­siffigineqarsin­naanngitsunut immaqa oqaluus­sisinnaavugut. Pinertusaar­tuarnerpullu uppeqatitsinnut qiimmas­saataasinnaavoq. Immaqalu tamanna kajumis­sissutigalugu Guutip kunngeqarfianik oqaluus­siuarnerminni sapiinnerulissapput.