Jehovap piumasaatut iliorput

Paulus nakimaalluni nuimasunut oqaluussisoq

ANGUTIT marluk assigiinngissutaata angigaluassusia! Aappaa niaqoruteqarpoq, aappaa kalunnernik qilersorsimalluni. Aappaa kunngiuvoq, aappaa parnaarussaq. Apustili Paulus ukiuni marlunni parnaarussaaqqareerluni juutit kunngiannut, Herodes Agrippa II-mut, sassartinneqarpoq. Kunngi qatanngutaalu arnaq Berenike (inooqatigisaa) ’assukkersorsimangaarlutik’ tikiussimapput inersuarmullu killisiorneqartarfimmut iserlutik ’sakkutuut naalagaaneri angutillu illorpassuaqarfimmi pingaarnerusut ilagalugit’. (ap. sul. 25:23) Atuakkat qinerlerfissiat ilaanni ima allassimasoqarpoq: „Qularnanngitsumik inuit arlalinnik hundredellit najuupput.“

Nunap naalagaata toqqarneqaqqammersup, Festusip, ataatsimiinnissaq tamanna aaqqissuussimavaa. Nunap naalagarisimasaata, Felixip, kissaatigisimagaluarpaa Paulus parnaarussivimmi susinnaajunnaassasoq. Festusilli juutit Paulusimut unnerluussutaat ilumoornersut apeqqusersimavaa. Paulusimmi pinngitsuunini qularinngingaaramiuk piumasarisimavaa unnerluutigineqarnini kaasarimut saqqummiunneqassasoq. Suliassaq Paulusimut tunngasoq kunngi Agrippap alapernaalersimavaa. ’Uangattaaq inuk taanna tusarumagaluaqaara,’ oqarsimavoq. Taava Festus aaqqissuussiniapallassimavoq, qularnanngitsumik isumaliutigalugu kunngip parnaarussaq immikkukajaaq ittoq taanna qanoq isumaqarfigissaneraa. — apustilit suliait 24:27–25:22.

Aqaguani Paulus inuppassuit nuimasut saavanni qeqarpoq. ’Imminik pilluartuutippunga saanni ullumi imminik illersorniassagama,’ Paulus Agrippamut oqarpoq, ’pingaartumik juutit ileqqui saqitsaatigisartagaallu tamaasa ilisimagakkit. Taamaattumik qinnuigaakkit kamajuillutit tusarnaaqqullunga.’ — apustilit suliait 26:2, 3.

Paulusip nakimaalluni imminut illersornera

Siullermik Paulusip kristumiunik qinuginnittuusimanini Agrippamut oqaluttuaraa. ’Pinngitsaalisarpakka mitalleqqullugit; silaarsorfigingaarakkillu qinugisaraakka illoqarfinnut asimiittunut allaat malersortarlugit,’ oqaluttuarpoq. Taava oqaluttuuppaa alutornangaartumik takorruuisitaasimalluni Jesusip toqusunit makititaasimasup ima oqarfigigaani: ’Sooq qinugaanga? Inngimmut tukkartuineq sapissaatit.’a — apustilit suliait 26:4-14.

Taava Jesusip Saulus peqqusimavaa ’takusaminik sulilu taassumunnga takutitassaminik’ inuit inuiannit tamaneersut oqaluussiffigeqqullugit. Paulusip oqaatigaa imminut suliassiissutigineqartoq tamanna ilungersorluni naammassiniarsimallugu. Kisianni ’tamakku pissutigalugit’, Agrippamut oqarpoq, ’juutit naalaffimmi tiguaannga toqunniarlungalu.’ Agrippap juutiussutsimik soqutigisaqarnera iluatsillugu Paulusip erseqqissarpaa allamik oqaluussissuteqarsimanani taamaallaat Messiasip toquneranut makititaaneranullu atatillugu ’pruffiitit Mosesillu oqaluutigisaat’ oqaluussissutigisimallugit. — apustilit suliait 26:15-23.

Maanna Festus akuliuppoq. ’Silaarupputit, Paulusiaa, ilisimangaarsutsivit silaarutippaatit!’ nillerpoq. Paulusip akivaa: ’Silaarutinngilanga, Festusiaa pissaaneqangaartutit, kisianni oqaatsit ilumoortut isumaliutigineqarluartullu oqaaseraakka.’ Taava Paulus kunngi Agrippa pillugu oqarpoq: ’Kunngimmi tamakku nalorninngilai, taamaattumik taanna ersisuillunga oqaluffigaara; nakimassutiginngilarami tamakkua arlaannilluunniit arajutsisaqanngitsoq, isertortumi tamakku pisimanngimmata.’ — apustilit suliait 26:24-26.

Taava Paulusip Agrippa oqaluffigilerpaa. ’Pruffiitit upperaagit, kunngi Agrippa?’ Qularnanngitsumik taamatut aperineqarnini Agrippap iluarivallaanngilaa. Inuttummi ataqqinassutsi sernissugassaraa; Paulusilu isumaqatigineraruniuk assigiinnassavaa Festusip ’silaqanngitsutut’ taasai iluaralugit. Immaqa Agrippa akunnattoortoq malugeriaramiuk Paulusip apeqqutini nammineq akivaa: ’Ilisimavakkit upperigitit.’ Agrippap nikassaarpaluttunik oqaaseqarnani Paulus oqarfigaa: ’Kajumissaarinikkut kristumiunngorteqqajaqaarma.’ — apustilit suliait 26:27, 28.

Agrippap allamut saasaariniaraluarluni oqaasii Paulusip pillaqqilluni atorpai: ’Taamaaqqajarnersutilluunniit taamaaqqajannginnersutilluunniit Guutimut kissarpunga, illiinnaanngitsutit tamaasali ullumi uannik tusarnaartut uattut ileqqullugit, qilerutit makku kisiisa pinnagit.’ — apustilit suliait 26:29.

Paulusip toqutaasariaqarneranut parnaarussaasariaqarneranulluunniit pissutaasinnaasumik Agrippa Festusilu nassaanngillat. Unnerluutigineqarnermili kaasarimut saqqummiunneqarnissaanik qinnutaa taamaatiinnarneqarsinnaanngilaq. Taamaattumik Agrippa Festusimut oqarpoq: ’Inuk taanna kaasarimut eqqartuuteqqeqqunngikkuni iperarneqarsinnaassaagaluarpoq.’ — apustilit suliait 26:30-32.

Ilinniarfissarput

Paulusip inunnut nuimasunut oqaluusseriaatsimigut pitsaalluinnartumik maligassiuuppaatigut. Kunngimut Agrippamut oqalunnermini silatusaassuseqarpoq. Agrippakkut Berenikellu qatanngutigiillutik aappariinnerata iluarineqannginnera qularnanngitsumik nalunngilaa. Taamaakkaluartorli ileqqussanut tunngasut pisumi tamatumani Paulusip eqqaanaveersaarpai, tamatumunngali taarsiullugu Agrippalu isumaqatigiissutigisinnaasatik pingaarnerutillugit. Naak Paulus farisiiarimit ilisimasumit Gamalielimit ilinniartitaasimagaluarluni miserratiginngilaa Agrippa juutit ileqquinik ilisimasaqarluartuusoq. (apustilit suliait 22:3) Agrippa kanngunartumik inooriaaseqaraluartoq atorfia pillugu Paulusip ataqqinnittumik oqaluffigaa. — Rûmamiut 13:7.

Nakimaalluta inuit upperisatsinnik oqaluttuukkusuppavut, tusarnaartittali inooriaasiisa minguttuut qulaarnissaat avoqqaarinissaalluunniit anguniagarinngilarput. Nutaarsiassalli nuannersup ajunngitsortaasa tikkuartornerisigut isumaqatigiissutigisinnaasattalu pingaartinnerisigut sallusuissut taakkununnga akueriuminarsartariaqarparput. Utoqqaanerusunillu, imaluunniit oqartussaassusilinnik, oqaloqateqaraangatta inissisimaffii atorfiilu pillugit ataqqisariaqarpavut. (3 Moses 19:32) Taamaaliornitsigut Paulus ima oqartoq ilaarsinnaavarput: ’Tamanut tamalaasutut ippunga ilaat annaakkumagaluarlugit.’ — 1 Korintumiut 9:22. (wE 1/9 98)

[Quppernerup ataani ilanngussaq]