IMMIKKOORTOQ 5
Guutip Aaperaat taassumalu ilaqutai pilluaqquai
Aaperaap kinguaavi ingerlalluarput. Guutip Josefi Egyptenimi sernissorpaa
JEHOVAP nalunngilaa asanerpaasani naalliulluni toqujumaartoq. Ilumoortoq tamanna 1 Mosesi 3:15-imi siulittuummi eqqaamisaarneqarpoq. Guutip inuiannut paasitissinnaavaa pilliut taanna imminut qanoq akisutigissanersoq? Tamanna Biibilimi assersuusiorluni takorlooruminarsarneqarpoq. Guutip Aaperaat peqquaa ernini asasani Iisaaq pilliutigissagaa.
Aaperaat upperluartuuvoq. Eqqaamajuk Guutip neriorsorsimagaa aniguisitsisussaq, imaluunniit kinguaassaq, siulittuutigisaq Iisaap kinguaarissagaa. Aaperaap naalalluni nammineq ernini pilliutigiumavaa qularutiginagu pisariaqassappat Guutip Iisaaq makitikkumaaraa. Guutilli inngiliata Aaperaat unitseqqarpaa. Guutip ataataanerpaaq aalajaatsoq Aaperaat erliginerpaasaminik pilliutiginneriaannaanera pillugu nersualaarpaa taassumunngalu neriorsuutini oqaatigeqqillugit.
Kingusinnerusukkut Iisaaq marlunnik, Esauimik Jaakumillu, ernertaarpoq. Jaakup Esauitut innani anersaakkut ittut pingaartippai, akissarsisinneqarporlu. Guutip Jaaku Israelimik ateqalersippaa, Israelillu erneri aqqaneq-marluk Israelikkut naggueqatigiissortaannut qullersanngorput. Qanorli ilillutik ilaqutariit taakku inuiassuanngorpat?
Ernerit taakkua amerlanersaasa nukkaminnik Josefimik sinngaginnilernerata kingunerisaanik pisorpassuaqarpoq. Taakkua taanna inussiatut tunivaat, Egyptenimullu aallarunneqarpoq. Guutilli angut inuusuttoq aalajaatsoq sapiitsorlu taanna pilluaqquaa. Josefi atugarliungaarsimagaluarluni naggataatigut Faraomit, Egyptenimi naalakkersuisumit, qaffatsinneqarpoq angisuumillu oqartussaassusilerneqarluni. Tamanna piffissaalluartukkut pivoq, kaannersuaqarnerami pissutigalugu Jaakup ernermi ilaat Egyptenimut karrisiniariartortippai — paasinarsivorlu maanna Josefi inuussutissanut tamanut akisussaasuusoq! Josefip qatanngutini peqqissimisut killisimaarnartumik naapeqqinnerisa kingorna isumakkeerfigai ilaqutariillu tamarmiusut Egyptenimut nuunnissaat isumagalugu. Nunaatit pitsaanersaasa ilaannik nunaatissinneqarput, tassanilu amerliartortuarsinnaapput ingerlalluartuarsinnaallutillu. Josefip paasivaa Guuti pisunut akuliussimasoq neriorsuutini naammassisinnaaqqullugit.
Jaaku utoqqalisoq inuunermi sinnera Egyptenimi, ilaquttaminit amerliartortunit najorneqarluni, inuuvoq. Toqulerluni nallavimmini siulittuivoq kinguaassaq, imaluunniit aniguisitsisussaq, neriorsuutigisaq naalakkersuisunngorumaartoq pissarsuaq, taannalu Judap kinguaariumaaraa. Ukiut arlallit tamatuma kingorna Josefip toqutinnani siulittuutigaa Guutip Jaakup ilaqutai Egyptenimit anineranni siulersorumaarai.
— Tunngavigineqartut: 1 Mosesi kapitalit 20-50; Hebræerit 11:17-22.