Guutip Israelikkut aniguisippai

UKIORPASSUARNI Israelikkut Egyptenimi ingerlalluarlutik amerliartorlutillu inuupput. Allamilli Faraoqalerpoq. Taassuma Josefi naluaa. Farao naakkittaatsumik naalakkersuisuuvoq, Israelikkullu amerliartuinnarmata siooragai. Taamaattumik inussianngortippai peqqusillunilu taakkua qitornartaavi nukappiaqqat tamarmik Nilenimi ipitinneqartassasut. Anaanaasulli sapiitsup ernini naalungiarsuk sernigaa koorimut ikillugu ivissuit akornannut toqqorlugu. Faraop paniata naalungiarsuk nassaaraa, Mosesimik aterlugu Egyptenimiullu kunngikkormiuini perorsarlugu.

Mosesi 40-nik ukioqarluni ajornartorsiulerpoq inussiaq Israelikkuusoq illersoramiuk sulisitsisuanit Egyptenimiumit ajortumik pineqaqqunagu. Mosesi nunamut ungasissumut qimaavoq tassanilu nunassilluni. Jehovap Mosesi 80-inik ukioqartoq Egyptenimut utertippaa Faraomut sassaqqullugu Guutillu innuttaasa inussiaataajunnaarnissaannik piumasaqaqqullugu.

Farao ingerlaannaq itigartitsivoq. Taamaattumik Guutip Egyptenimiut perlunnik qulinik perlussiortippai. Mosesi Faraomut sassaraangat perluup tulliata pinngitsoortinnissaanut periarfissillugu Farao tamatigut manngertittarpoq Mosesilu taassumalu Guutia, Jehova, asissortarlugit. Naggataatigut perluit qulingat pissutigalugu nunami angajulliliat tamarmik toqupput — ilaqutariit Jehova naalallugu matserfimminnik savaaqqap pilliutigineqarsimasup aavanik tarnussisut angajulliliaat pinnatik. Inngilip Guutip angajullilianik toqoraajartortitaata inoqutigiit taakku qaangiinnartarpai. Taamanimiilli Israelikkut tupinnartuliornikkut aniguisitaaneq tamanna nalliuttorsiornermi qaangiiffimmik, imaluunniit poorskimik, taaneqartartumi ukiumoortumik eqqaaniartarpaat.

Ernini angajulleq annaareerlugu Farao peqqusivoq Mosesip Israelikkullu tamarmik Egypteni qimassagaat. Egyptenimit aninissartik ingerlaannaq piareersalerpaat. Faraolli isummani allanngortippaa. Sorsuttartorpassuit sorsuutinik qamuteqartut ilagalugit malersulerpai. Israelikkut Immap Aappalaartup sineriaani ungusaasorinarput. Jehovalli Imaq Aappalaartoq avissaartippaa taakku immap naqqatigut panertukkut, iigarsuillusooq akornatigut, ikaarsinnaaniassammata! Egyptenimiut malersuersuataalermata Guutip erngit utertippai Farao sakkutuuilu ipitillugit.

Kingusinnerusukkut Israelikkut Qaqqami Sinajimi tammaartillugit Jehovap angerfigeqatigai. Guutip Mosesi akunnermiliuttoralugu Israelikkut inatsisinik tunivai inuunermi sutigut tamatigut malissinnaasaannik illersuutigisinnaasaannillu. Israelikkut aalajaallutik Jehovap siulersuineranut naalatsigitittuartillugit taassuma najortuassavai inuiaallu taakku inunnut allanut pilluaqqussutaatillugit.

Israelikkulli amerlanersaat pakatsinartumik Jehovamut uppernikipput. Taamaattumik Jehovap kinguaariit taakku ukiuni 40-ni inoqajuitsumi angalaartippai. Taava Mosesip angut assuarnaatsoq Josva imminut kingoraarsisussanngortippaa. Kiisami Israelikkut nunamut Guutip Aaperaamut neriorsuutigisaanut isernissaminnut piareerput.

— Tunngavigineqartut: 2 Mosesi; 3 Mosesi; 4 Mosesi; 5 Mosesi; Tussiaat 136:10-15; Apustilit Suliaat 7:17-36.