Moorsisi aalajangerpoq Jehova kiffartorfiginiarlugu

Egyptenimi Jaakup ilaqutai Israalikkutut ilisimaneqalerput. Jaakup Juuserfillu toqunerata kingorna Faaruu alla aqutsilerpoq. Taassuma Israalikkut Egyptenimiuniit pissaaneqar­nerulis­sasoralugit annilaangagivaa. Taamaattumik Israalikkut inussian­ngortippai. Pinngitsaalillugit qarmasis­sialiortippai erloqisil­lugillu narsaatini sulisillugit. Egyptenimiut Israalikkunnut naalliutsitsinerat sakkortusiar­tuinnaraluartoq Israalikkut amerliar­tuinnarput. Faaruullu tamanna nuannarin­nginnamiuk nukappiaqqat Israalikkuusut inoorlaat tamaasa toqorar­neqarnissaat peqqussutigaa. Israalikkut qanoq annilaangatigisimanersut takorloorsin­naaviuk?

Arnaq Israalikkuusoq Jokebedimik atilik inequnar­torujus­suarmik ernertaarpoq. Illersor­niarlugu koorimut ikivaa Nilenillu sinaani ivissuit akornannut toqqorlugu. Nukappiarannguup aleqaata Mirjamip qanoq pisoqas­sanersoq ungasin­ngisaaniit malinnaaffigaa.

Faaruup pania kuussuarmut uffariar­tortilluni koori takuaa. Koorillu iluaniittoq nukappiarannguaq qiasoq nassaarigamiuk nalligilerpaa. Mirjami aperivoq: ‘Paarsisussannik milutsitsisin­naasumik ujarlissaanga?’ Faaruup pania angermat Mirjamip anaanani, Jokebedi, aavaa. Faaruup paniata oqarfigaa: ‘Nukappiaran­nguamik paarsis­sutinnga, akilissaq­qaarpakkit.’

Nukappiaraq allimmat Jokebedip Faaruup panianut tunniuppaa. Taassumalu Moorsisimik atserpaa ernersiar­taaralugulu. Moorsisi kunngip erneratut peroriartorpoq piumasanilu tamaasa pisinnaallugit. Moorsisilli Jehova puiunngisaannarpaa. Nalunngil­luinnarpaa Egyptenimiuunani kisianni Israalik­kuulluni. Aalajangerporlu Jehova kiffartorfiginiarlugu.

Moorsisi 40-nik ukioqarluni aalajangerpoq innuttani ikiorniarlugit. Ullut ilaanni Moorsisip Egyptenimioq Israalik­kuusumik inussiamik unataasoq takuaa. Egyptenimiorlu unatarujus­suarlugu toquppaa timaalu sioqqanut toqqorlugu. Faaruup Moorsisi qanoq iliorsimanersoq paasigamiuk toqunniaraluarpaa. Moorsisili Midjanimut qimaavoq taakanilu Jehovamit isumagineqarluni.