Israelikkut Kana’animut pipput

ISRAELIKKUT Kana’animut pinerat ukiunik hundredelikkuutaanik sioqqullugu Jehovap nuna taanna Aaperaap kinguaavinut neriorsuutigaa. Maanna Israelikkut Josvamit siulersorneqarlutik nunap neriorsuutigisap tiguarnissaanut piareerput.

Guutip Kana’anikkut piuneerussaasussatut eqqartuussimavai. Taakkua nuna tamaviat kinguaassiuutitigut atoqatigiinnermik pissusissamisuunngilluinnartumik naakkittaatsumillu aammik kuisinermik ulikkaarpaat. Taamaattumik Kana’animi illoqarfiit Israelikkunnit tiguarneqartut suujunnaarsilluinnarneqartussaapput.

Nunamulli tamatumunnga pitinnatik Josvap alapernaarsuiartortussat marluk aallartippai, taakkulu illoqarfimmi Jerikomi arnamit Rahabimik atilimmit illusisinneqarput. Taassuma taakku illersorpai nalunngikkaluarlugu Israelikkuusut. Rahabi Israelikkut Guutiannut uppertuuvoq, tusarsimavaami Jehovap innuttani qanoq annaassimagai. Taassuma alapernaarsuiartortitat uppernarsaasippai nammineq inoqutinilu asattuunneqassasut.

Kingusinnerusukkut Israelikkut Kana’animut pimmata Jerikolu tigualermassuk Jehovap tupinnartuliornikkut Jerikop qarmarsui uppitippai. Josvap sakkutuui pitoraapput illoqarfillu suujunnaarsillugu, Rahabili ilaqutaalu asattuunneqarput. Ukiuni arfinilinni saassusseqattaarnermi Josvap nunap neriorsuutigisap ilarujussua tiguarpaa. Tamatuma kingorna nuna Israelikkut naggueqatigiissortaannut agguaanneqarpoq.

Josvap ukiorpassuarni Guutimut kiffartornermi naalernerani inuit katersortippai. Israelikkut eqqaasippai Jehova taakkua siuaasaannut qanoq iliortarsimasoq taassumunngalu kiffartornissaannut kajumissaarlugit. Josvalli kiffartoqataasalu utoqqaat toqunerisa kingorna Israelikkut Jehova sumiginnarlugu guutipilussiulerput. Ukiut 300-t missaanni inuiaat taakku Jehovap inatsisaanut naalattuaannanngillat. Tamatuma nalaani Jehovap akueraa Israelikkut akeqqaminnit, ilaatigut filisterinit, naqisimaneqarnissaat. Israelikkulli Jehovamut ikioqqullutik qinugaangata eqqartuussisunik toqqaasarpoq akeraannit aniguisitsisussanik, taakkulu katillugit aqqaneq-marluupput.

Eqqartuussisut nalaat, Eqqartuussisunik allakkani allaatigineqartoq, aallartippoq Otnieli toqqarneqarmat, Samsonilu — inuit inuusimasut timikkut nukittunerpaartaat — eqqartuussisut kingullersaraat. Oqaluttuami pissanganartumi Biibilimi Eqqartuussisunik allakkaniittumi sallusuissut tunngaviusoq erseqqissarneqaqattaartoq unaavoq: Jehovamut naalatsigitinneq pilluaqqusaanermik kinguneqartarpoq naalannginnerlu ajunaarnermik.

— Tunngavigineqartut: Josvamik allakkat; Eqqartuussisunik allakkat; 3 Mosesi 18:24, 25.