Upperneq, ileqqut asanninnerlu pillugit siunnersuutit

JAAKU Judasilu Jiisusip affarmik qatanngutigai. Petrusi Johannesilu Jiisusip apustiliisa aqqaneq-marluk ilagaat. Angutit sisamat taakku katillugit arfineq-marlunnik Kristumiut Allagaataanni Grækerisuuniittunik allagaqarput. Allakkat taakku tamarmik immikkut taakkuninnga allattoq taaguuteqaatigaat. Oqaaqqissaarutit isumassarsiarititaasut allakkani taakkunaniittut kristumiut Jehovamut taassumalu naalagaaffianut ilumoorfiginnittuarnissamut iluaqutissaattut naatsorsuussaapput.

Uppernermik ersersitsineq. Uppernerarnerinnaq naammanngilaq. Upperneq ilumoortoq iliuuseqartitsisarpoq. Jaaku ima allappoq: “Upperneq sulianik ilaqanngitsoq toqungavoq.” (Jaaku 2:26) Misilinneqartilluni upperluni iliuuseqarneq pinertusaarnermik ineriartortitsisarpoq. Kristumiup ingerlalluarumalluni Guuti ilisimassusermik qinnuigisariaqarpaa, tamatuminnga tuniumaaraani qularutiginagu. Pinertusaarneq Guutimit akuerisaanermik kinguneqartarpoq. (Jaaku 1:2-6, 12) Pallorfiginnittoq upperluni assuarnaattuarpat Jehova taanna akillugu iliuuseqassaaq. Jaaku ima allappoq: “Guuti qaninniarsiuk, taava taanna ilissinnut qanillissaaq.” — Jaaku 4:8.

Kristumiu ima upperluartigisariaqarpoq uppernini ussernartunik inuunerlunnissamullu sunniisinnaasunik akiuinissamut iluaqutigisinnaallugu. Avatangiisit ileqqorluffiungaartut pissutigalugit Judasi misigivoq uppeqatini ilungersorluni kajumissaartariaqarlugit ‘upperisamik sorsuutiginneqqullugit’. — Judasi 3.

Minguitsumik ileqqoqartuarneq. Jehovap piumasaraa pallorfiginnitsimi illernartuunissaat, tassa sutigut tamatigut minguitsuunissaat. Petrusi ima allappoq: “Inuunissigut tamatigut illernartuussaasi, allassimavormi: ‘Illernartuussaasi uanga [Jehova] illernartuugama.’” (1 Petrusi 1:15, 16) Kristumiut maligassiuulluarneqarput. Petrusi ima allappoq: ‘Kristusi anniartitaavoq ilissi pillusi maligassamillu qimatsivigalusi, tumini atuarlugit malinnaaqqullusi.’ (1 Petrusi 2:21) Kristumiut Guutip najoqqutassiai malillugit inuunertik pissutigalugu atugarliorsinnaagaluarlutik ‘ilerasuuteqanngittuarput’. (1 Petrusi 3:16, 17) Petrusip kristumiut kajumissaarpai tamatigut illernartumik ileqqoqaqqullugit Guutimullu tunniusimanermik ersersitsisumik iliortaqqullugit, ulloq Guutip eqqartuussiffissaa silarsuarlu neriorsuutigisaq ‘iluassutsip najugarisassaa’ utaqqitillugit. — 2 Petrusi 3:11-13.

Asanninnermik ersersitsineq. Johannesi ima allappoq: ‘Guuti tassaavoq asanninneq.’ Apustilip erseqqissarpaa Guutip asanninnersuani ersersissimagaa Jiisusip “ajortivut pillugit pilliutitut” aallartinneratigut. Tamanna kristumiunut qanoq sunniuteqartariaqarpa? Johannesi ima allappoq: “Asasakka, Guutip taama asammatigut uaguttaaq asaqatigiittariaqarpugut.” (1 Johannesi 4:8-11) Asannittuliortoqarsinnaavoq ilaatigut uppeqatinik inoroorsaarfiginninnikkut. — 3 Johannesi 5-8.

Jehovamilli pallorfiginnittut taassumunnga asanninnertik qanoq ersersissinnaavaat? Johannesi ima akivoq: ‘Guutimut asanninneq tassaavoq inassutai maleruaratsigit, inassutaalu artornartuunngillat.’ (1 Johannesi 5:3; 2 Johannesi 6) Inuit taamaaliornermikkut Guutimut naalattut neriorsoqqissaarneqarput Guutimit asaneqartuassasut ‘inuunermik naassaanngitsumik’ kingunilimmik. — Judasi 21.

— Tunngavigineqartut: Jaaku; 1 Petrusi; 2 Petrusi; 1 Johannesi; 2 Johannesi; 3 Johannesi; Judasi.