OQALUTTUAQ 11
Jiisusi pillugu allapput
Angutit assilissamiittut takusinnaavigit? — Tassaapput Matthæusi, Markusi, Lukasi, Johannesi, Petrusi, Jaaku, Judasi aamma Paulusi. Angutit taakku tamarmik Jiisusip nalaani inuullutillu Jiisusi pillugu allapput. Taakku pillugit paasisaqariarta.
Angutit uku pillugit oqaluttuarsinnaavit?
Taakkua ilaat pingasut tassaapput apustilit Jiisusi ilagalugu oqaluussisartut. Taakku pingasut kikkuunersut nalunngiliuk? — Tassaapput Matthæusi, Johannesi Petrusilu. Apustilit Matthæusip Johannesillu Jiisusi ilisarisimalluarpaat, immikkullu atuakkamik Jiisusip inuunera pillugu allapput. Apustilip Johannesip aamma atuagaq Saqqummersitanik taaneqartoq allakkallu pingasut allappai. Apustilip Petrusip allakkat marluk Biibilimut ilanngunneqartut allappai. Tassaapput Petrusip allagai siulliit aamma Petrusip allagaasa aappaat. Petrusip allakkami aappaanni allaatigaa Jehova qilammit Jiisusi pillugu ima oqarsimasoq: ‘Tassa ernera asasara, tulluusimaarutigisara.’
Aamma angutit allat assilissamiittut atuakkiaminni Jiisusi pillugu ilinniartippaatigut. Taakkua ilagaat Markusi. Taanna Jiisusi tigusarineqarmat isiginnittuugunarpoq. Assilissamiittoq alla tassaavoq nakorsaq Lukasi. Ilimanarporlu taanna aatsaat Jiisusi toqoreersoq kristumiunngortoq.
Assilissami Biibilimik allattut allat marluk takusinnaasatit tassaapput Jiisusip nukai. Qanoq ateqarnersut nalunngiliuk? — Jaakumik aamma Judasimik ateqarput. Jiisusimut uppertuunngikkaluarput. Allaat taanna sianiilaartuusoraat. Kingusinnerusukkulli Jiisusi upperilerpaat kristumiunngorlutillu.
Biibilimik allattoq assilissami takusinnaasat kingulleq Paulusimik ateqarpoq. Taanna kristumiunngunngikkallarami Saulusimik ateqarpoq, kristumiullu uumigigamigit ajortorujussuarmik pisarpai. Sooq Paulusi kristumiunngorusulersoq nalunngiliuk? — Ullut ilaanni Paulusi angalatilluni qilammit oqaluunneqariataarpoq. Oqaluttoq tassaavoq Jiisusi! Jiisusillu Paulusi ima aperaa: ‘Sooq uannik uppertut ajortorujussuarmik pisarpigit?’ Tamatuma kingorna Paulusi allanngorpoq kristumiunngorlunilu. Paulusip Biibilimi atuakkat 14-it allappai, Romamiunut allakkaniit Hebræerinut allakkanut.
Ullut tamaasa Biibili atuartarparput, ilaa? — Biibili atuartaratsigu Jiisusi pillugu ilikkagarpassuaqartarpugut. Jiisusi pillugu suli allanik ilikkagaqarusuppit? —