Rebekkap Jehova nuannaartikkusuppaa

Rebekka arnaavoq Jehovamik asannittoq. Uia Iisaamik ateqarpoq. Taanna aamma Jehovamik asannittuuvoq. Rebekka Iisaarlu qanoq naapippat? Rebekkap qanoq takutippaa Jehova nuannaartikkusullugu? Iisaaq Rebekkalu pillugit paasisaqariarta.

Iisaap angajoqqaavi tassaapput Aaperaat Saralu. Kana’animi najugaqarput. Nunami tassani inuit Jehova upperinngilaat. Aaperaalli kissaatigaa Iisaaq arnamik Jehovamik upperinnittumik katissasoq. Taamaattumik Aaperaap kiffani, immaqa Eliezeri, ernermi nuliassaanik tulluartumik ujaaseqqullugu nunamut Karanimut ilaquttami ilaasa najugaqarfigisaannut aallartippaa.

Eliezerip kiffaqatini angalaqatigai. Ungasisso­rujus­suarmut angalapput. Taakkua nerisassaat tunissutillu qatigattuunut qulinut nammatsippaat. Eliezerip qanoq nalunngilaa arnaq inuusuttoq sorleq Iisaamut toqqassanerlugu? Eliezeri kiffaqatinilu Karanimut apuukkamik puilasuliap eqqaani unipput. Eliezerimmi nalunngilaa ullup taamaalinerani arnat tassani imermik aallertartut. Jehovamut ima qinuvoq: ‘Arnaq inuusuttoq aperigukku imermik tuneqqullunga, taannalu uannut aamma qatigattuunut imermik aallerpat taava paasissavara arnaq taanna tassaasoq toqqakkat.’

Taava arnaq inuusuttoq Rebekkamik atilik puilasuliamut takkuppoq. Biibilimi allassimavoq taanna assut pinnersuusoq. Eliezeri Rebekkamut immiseqqugami taanna ima akivoq: ‘Ilaana, tunissavakkit. Aamma qatigattuunut imermik aallissaanga.’ Qatigattuut qilalersut imertorujus­suusarput. Takorlooriaruk Rebekka puilasuliamut imermik aallerniarluni uteqattaartoq. Assilissami qanoq sulilluartigisoq takusinnaaviuk? — Eliezerip qinnutini Jehovamit akineqarmat nuannaarpoq.

Eliezerip Rebekka tunissuter­passuarnik kusanartunik tunivaa. Rebekkap Eliezeri kiffaqataalu ilaquttaminut qaaqquai. Eliezeri oqaluttuarpoq sooq Aaperaamit aallartinneqarluni. Aamma oqaluttuaraa qinnutini Jehovamit qanoq akineqarsimanersoq. Rebekkap ilaqutaasa nuannaarlutik akueraat taanna Iisaamut katissasoq.

Rebekkali Iisaamut katikkusuppa? Qanoq isumaqarpit? — Rebekkap nalunngilaa Eliezeri Jehovamit aallartitaasoq. Taamaattumik Rebekka ilaquttaminit aperineqarami Kana’animukaru­sunnerluni Iisaaq katinniarlugu ima akivoq: ‘Aap, aallarusuppunga.’ Ingerlaannaq Eliezerilu aallarput. Kana’animullu apuukkamik Iisaaq katippaa.

Rebekka Jehovap iluarisaatut iliormat Jehovap pilluaqquaa. Ukiorpassuit qaangiuttut Rebekka ilaqutaralugu Jiisusi inunngorpoq. Rebekkatut Jehova nuannaartikkukku illittaaq Jehovamit pilluaqquneqarumaarputit!