Jehovap piumasaatut iliorput

Isakimut nuliassarsiorneq

ANGUT utoqqaq puilasuliami issiasoq qasorpaseqaaq. Angalaqatini ilagalugit qatigattuut qulit atorlugit Be’er-Shebap eqqaanit ungasissumiittumit maanga Mesopotamiap avannaanut — 800 kilometerit sinnerlugit — angalasimavoq.a Maanna ornigassaminnut apuukkamik angalasoq qasusoq suliassani eqqarsaatiginiarlugu ingippoq. Taanna kinaava sunalu pillugu angalaneq ilungersunartoq tamanna naammassisimavaa?

Angut Abrahamip kiffaraa, ’inussiaataasa illuaniittut utoqqaanersaat’. (1 Moses 24:2) Naak oqaluttuami eqqaaneqanngikkaluartoq qularnanngitsumik tassaavoq Eliezer, Abrahamip ’inussiaataa kingornussisigisaa’. (1 Moses 15:2, 3) Tassa Abraham Saralu qitornaqanngikkallarmata kingornussisussaasimasoq. Maannali ernerat Isak 40-nik ukioqarpoq, naallu Eliezer Abrahamip kingornussisigiunnaaraluarlugu suli kiffaraa. Taamaattumik Abrahamip suliassiissutaa imaannaanngitsoq akueraa. Suliassiissutaa suna?

Suliassiissut imaannaanngitsoq

Abrahamip nalaani aappariinneq ilaqutariinnuinnaanngitsoq aammali naggueqatigiinnut tamanut, tassa ataataanerpaat ataanni innuttaaqatigiinnut tamanut, sunniuteqartarpoq. Taamaattumik angajoqqaat meeqqamik aappassaat qinertarpaat. Ernermili Isakip aappassaa qinissagamiuk Abraham ajornartorsiuteqarpoq. Tamaanimiut Kana’anikkut guutiitsutut inooriaasiat pissutigalugu taakkunani nuliassarsiorsinnaanngilaa. (5 Moses 18:9-12) Taamanilu angutip naggueqatigisami akornanni nuliassarsiortarnera ileqqorineqarpoq, kisianni Abrahamip naggueqatigisai kilometerinik hundredelippassuarnik ungasissusilimmi Mesopotamiap avannaani inuupput. Isak taakkununnga aallartiinnarsinnaanngilaa, Jehovap neriorsorsimammani ’nuna manna, tassa Kana’anikkut nunaat, kinguaassaminut tunniukkumallugu’. (1 Moses 24:7) Taamaattumik Abrahamip Eliezer ima oqarfigaa: „Uangali nunannut eqqarlinnullu aallarlutit tassannga ernera [Isak] nuliassarsiussavat.“ — 1 Moses 24:4.

Sivisuumik angalareersimalluni Eliezer puilasuliami qasuersaarallarpoq. Nalunngilaa erniinnaq arnat puilasuliamut aggiassasut unnussamut imertarniarlutik. Taamaattumik Jehova ima qinnuigaa: „Imertartut ilaannut oqaruma: ’Imertaatinnit immisilaannga’, oqarpallu: ’Imerniarit, aamma qatigattuutitit immisissavakka’ — taannaagili kiffannut [Isakimut] qinikkat. Tamatumuuna ilisimassavara naalagara ajunngitsuliorfigigit.“ — 1 Moses 24:14.

Suli qinutillugu arnaq inuusuttoq pinnersoq Rebekkamik atilik aggerpoq. „Imertaatinnit immisilaannga,“ Eliezerip oqarfigaa. Rebekka taamaaliorpoq oqarlunilu: „Aamma qatigattuutitit imertaateriarlugit immisissavakka imerusuersillugit.“ Neqeroorut tamanna annertuvoq, qatigattoormi imerusuttoq minuttit qulit ingerlaneranni 95 literit angullugit imersinnaavoq! Eliezerip qatigattuutai taama imerusutsigigaluarpata taamaanngikkaluarpalluunniit, Rebekkap nalussanngilaa suliassaq neqeroorutigisani annertoorujussuusoq. Aap, „imertaammi imaa nersutinik immitsivimmut kueriarlugu puilasuliamut imertaqqipallappoq qatigattuut tamaasa imissillugit“. — 1 Moses 24:15-20.

Nalunnginnamiuk Jehovap pisut siulersorai Eliezerip Rebekka pinnersaammik kuultiusumik tajanillu marlunnik kuultiusunik, katillugit 8000 koruunit missaannik nalilinnik, tunivaa. Rebekkap oqaluttuummani Nakor, Abrahamip qatanngutaa, aatagalugu, Eliezerip Guuti qinnuvigalugu qutsavigaa. „[Jehovap] tupinnartumik naalakkama qatanngutaata illuanut ingerlatissimavaanga.“ (1 Moses 24:22-27) Eliezer Rebekkap ilaqutaanukaanneqarpoq. Kingorna Rebekka Isakimut katippoq, immikkullu pisinnaatitaalluni Messiasimut, Jesusimut, siuaasanngorluni.

Uatsinnut ilinniutissat

Eliezerip qinulluni Isak nuliassarsiorniarlugu ilungersorneri Jehovap pilluaqquai. Eqqaamajulli Isakip katinnera Guutip Abraham aqqutigalugu kinguaassamik pilersitsinissamik siunertaanut attuumassuteqarmat. Taamaattumik oqaluttuaq tamanna tunngavigalugu isummersinnaanngilagut aappassamik qinusut tamarmik tupinnartuliornikkut tunineqassasut. Kisianni Jehovap najoqqutassiai maleruarutsigik nakussatsissavaatigut inuunermi atortariaqakkatsinnik tamanik nammassinnaanissatsinnut — aappaqarluta kisimiillutaluunniit. — 1 Korintumiut 7:8, 9, 28; Naleqqiuguk Filípimiunut agdlagkat 4:11-13.

Eliezer ilungersortariaqarsimavoq Jehovap piumasaa malillugu iliorniarluni. Uaguttaaq misigisinnaavugut Jehovap najoqqutassiaanik atuiniarneq imaannaanngitsuusinnaasoq. Assersuutigalugu teokratiimut tunngatillugu suliassanut akornutaanngitsumik suliffissarsiorneq, Guutimik mianerinnittumik aappassarsiorneq, ineriartornartunik ikinngutissarsiorneq imaluunniit ajunngitsunik aliikkutassarsiorneq artornarsinnaavoq. (Matîuse 6:33; 1 Korintumiut 7:39; 15:33; Evfisumiut 4:17-19) Biibililli najoqqutassiaanut akerliusumik iliuuseqarumanngitsut Jehovap ikiorsinnaavai. Biibilimi ima neriorsuuteqarpoq: „Jehova tunaariuk uummatikkut iluunngarlutit, namminerlu silaqassutsit tatigeqinagu! Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ — Ussatit 3:5, 6. (wE 1/1 97)

[Quppernerup ataani ilanngussaq]