Rahabip Jehova upperaa

Takorlooriaruk itsaq illoqarfimmi Jerikomiittugut. Illoqarfik taanna nunami Kana’animiippoq, nunamilu tassani inuit Jehova upperinngilaat. Arnaq Rahabimik atilik Jerikomi najugaqarpoq.

Rahabip Imaq Aappalaartoq Mosesip qanoq avissaartikkaa aamma Israelikkunnik Egyptenimiit aniguisitsinera pillugu oqaluttuat meeraalluni tusarnaartarpai. Aamma Jehovap qanoq Israelikkunnik akeqqaminnut sorsunnerni ajugaatitsisarsimanera pillugu oqaluttuat tusarnaartarpai. Massakkullu tusarpaa Israelikkut Jerikop eqqaani tammaartut!

Unnuit ilaanni Israelikkuusut marluk illoqarfik Jeriko isertorlutik misissoriartorpaat. Taakku alapernaarsuisuupput. Rahabip illua tikippaat, Rahabillu iseqquai. Jerikop kunngiata unnuakkut paasivaa illoqarfimmi alapernaarsuisoqartoq taakkulu Rahabikkunniittut. Taava kunngip angutit taakku aatippai. Rahabip alapernaarsuisut marluk illup qaavanut toqqoqquai kunngillu aallartitai ima oqarfigalugit: ‘Angutinik tikiuttoqaraluarpoq, kisianni illoqarfik qimareerpaat. Tuaviorussi suli tigusarisinnaassavasi!’ Sooq Rahabip alapernaarsuisut ikiorai nalunngiliuk? — Jehovamut uppertuugami aamma nalunnginnamiuk Jehovap nuna Kana’ani Israelikkunnut tunniukkumaaraa.

Rahabip illuata qimannginnerani alapernaarsuisut neriorsuipput Jeriko aserorneqarpat Rahabi ilaqutaalu paarineqassasut. Nalunngiliuk alapernaarsuisut Rahabi qanoq ilioqqugaat? — Ima oqarput: ‘Allunaasaq aappalaartoq una igalaakkut nivinngassavat. Taamaalioruit illunniittut tamarmik paarineqassapput.’ Rahabip alapernaarsuisut naalappai. Taava qanoq pisoqarnersoq nalunngiliuk? —

Ullualuit qaangiuttut Israelikkut nipaarsaarlutik illoqarfik kaajallappaat. Ulluni arfinilinni ullormut ataasiarlutik illoqarfik kaajallallugu ingerlaartarput. Ullulli arfineq-aappaanni illoqarfik arfineq-marloriarlutik kaajallappaat. Taava tamarmik nipituumik suaarput. Tassanngaannarlu Jehovap qarmat illoqarfimmik ungaluusut uppitippai. Kisianni illu igalaakkut allunaasamik aappalaartumik nivinngasulik aserorneqanngilaq! Tamanna assilissami takusinnaaviuk? — Rahabi ilaqutaalu annaanneqarput!

Rahabi qanoq ilinniarfigisinnaaviuk? — Rahabip Jehova pillugu ilikkakkani nuannersorpassuit pissutigalugit Jehova upperaa. Illittaaq Jehova pillugu nuannersorpassuarnik ilinniarputit. Rahabitut Jehova upperaajuk? — Ila, pikkorittutit!