IMMIKKOORTOQ 2
Immissinnut ilumoorfigeqatigiigitsi
‘Guutip ataqatigiilersitai inuup avissaartissanngilai.’ — Markusi 10:9
Jehovap ‘ilumuunngitsulioqqunngilaatigut’. (Malaki 2:16) Ingammik aappariinnermi tamanna pingaaruteqarpoq, ilumoorfigeqatigiinngikkaannimi aamma tatigeqatigiittoqarsinnaanngilaq. Asanninnerlu ineriartortinneqassappat tatigeqatigiinnissaq pisariaqarluinnarpoq.
Aappariinni ilumoorfigeqatigiinneq ullutsinni navianartorsiortinneqarpoq. Aappariinnersi illersorniarlugu marlunnik iliuuseqartariaqarpusi.
1 AAPPARIINNERSI SALLIUTITTUARUK
BIIBILIMI QANOQ ALLASSIMASOQARTOQ: ‘Suna pingaartittariaqartoq paasiniarsiuk.’ (Filippimiut 1:10) Aappariinnersi inuuninni pingaarnerpaat ilagaat. Salliutinneqartariaqarpoq.
Jehovap kissaatigaa aappat eqqarsaatigissagit ‘peqatigiillusilu inuulluassasusi’. (Oqaluussisartup oqaasii 9:9) Aamma erseqqissarpaa aappat sumiginnanngisaannassagit aappannulli ‘pitsaanerusoq noqqaassutigissagit’. (1 Korinthimiut 10:24) Aappat pisariaqartinneqartutut pingaartinneqartutullu misigitittaruk.
SIUNNERSUUTIT:
Marluinnaanissassinnut piffissaqartaritsi
Ima eqqarsarnak: “Uanga”, imali eqqarsartarit: “Uagut”
2 UUMMATIT PAARIUK
BIIBILIMI QANOQ ALLASSIMASOQARTOQ: “Kialuunniit allap nulia pilerigalugu isigiguniuk taanna uummatimigut allasiorfigereerpaa.” (Matthæusi 5:28) Alla pilerigalugu eqqarsaatiginnittuarnerup assigiinnarpaa aapparisamut ilumuunngitsuliorneq.
Jehova oqarpoq: “Uummatit paariuk.” (Ussatit 4:23; Jeremia 17:9) Taamaaliorumallutit isigisatit eqqumaffigisariaqarpatit. (Matthæusi 5:29, 30) Ataataanerpaaq Jobi ilaaruk, taassuma isini isumaqatigiissuteqarfigisimavai arnaq alla pileritsaallugu isiginiarnagu. (Jobi 31:1) Pornografiimik isiginnaanngisaannarniarlutit aalajangiusimajuk. Aapparinngisannut naleqqutinngitsumik misigissuseqalinngisaannarniarlutit aalajangersimagit.
SIUNNERSUUTIT:
Aappannut ilumoorfiginnilluinnarnerit inunnut allanut ersarilli
Ilisarisimasannik attaveqateqarnerit aappavit toqqissisimanartinngippagu kipitiguk