Ajornartorsiutinik aaqqiineq

Katerlaatut assigiinngitsunik tunuliaqutaqarlusilu, eqqarsartariaaseqarlusilu misigissuseqarassi ajornartorsiuteqartarsinnaavusi. Aamma pisuussutiginngisassinnik imaluunniit naatsorsuutigisimanngisassinnik pisoqarsinnaavoq.

Ajornartorsiutit puiuinnarnissaat ajornannginnerorpasikkaluartoq aaqqinnissaannut Biibilimi kajumissaarneqarpugut. (Matthæusi 5:23, 24) Biibilimi najoqqutassiat maleruarnerisigut ajornartorsiutissinnik pitsaanerpaamik aaqqiissuteqarsinnaavusi.

1 AJORNARTORSIUT OQALOQATIGIISSUTIGISIUK

BIIBILIMI QANOQ ALLASSIMASOQARTOQ: ‘Oqaluffissaqarpoq.’ (Oqaluussisartup oqaasii 3:1, 7) Ajornartorsiutip oqaloqatigiissutiginissaanut piffissaqarluartaritsi. Qanoq misigininnik qanorlu isumaqarninnik aappat unneqqarissumik oqaluttuuttaruk. Aappat ‘ilumoortumik oqaluffigisaruk’. (Efesosimiut 4:25) Kamaammeraluaruit nunugit. Sallaatsumimmi akisarnikkut assortuunneq pinngitsoorneqarsinnaavoq. — Ussatit 15:4; 26:20.

Isumaqatigiinngikkaluarussiluunniit aappat asannittumik ataqqinnittumillu pissusilersorfigiuaruk. (Kolossemiut 4:6) Oqalukkumajunnaaginnarnasi ajornartorsiut aaqqinniapallassiuk. — Efesosimiut 4:26.

SIUNNERSUUTIT:

• Ajornartorsiut piffissaalluartukkut oqaloqatigiissutigisiuk

• Aappat oqalutsillugu akuliunnaveersaarlutit tusarnaaqqissaarit. Oqalulissaqqaarputit

2 TUSARNAARIT PAASINNITTUULLUTILLU

BIIBILIMI QANOQ ALLASSIMASOQARTOQ: “Asaqatigiillusi ungageqatigiigitsi, ataqqeqatigiigitsilu immissinnut akimorniullusi.” (Romamiut 12:10) Qanoq tusarnaartarnerit pingaaruteqangaarpoq. ‘Qanilaarlutit’ aappavit isiginnittaasia paasiniarsariuk. (1 Petrusi 3:8; Jaaku 1:19) Tusarnaartuusaaqinak. Ajornanngippat suliatit unitseriarlugit aappat tusarnaaqqissaaruk, kingusinnerusukkulluunniit oqaloqatigiissutigisinnaanerlugu aperiuk. Aappat unammillertitut isiginagu suleqatitulli isigigukku ‘kamaammiasuussanngilatit’. — Oqaluussisartup oqaasii 7:9.

SIUNNERSUUTIT:

• Tusakkatit nuannarinngikkaluarukkilluunniit tusarnaartuarit

• Oqariartuutaa paasiniaruk. Aappavit pissusilersornera nipaalu maluginiakkit

3 AALAJANGIUSSARSI PIVIUSUNNGORTISSIUK

BIIBILIMI QANOQ ALLASSIMASOQARTOQ: “Suleruloornerit tamatigut pissarsisitsisarput, oqaasiinnaalli ajorsaateqalersitsisarput.” (Ussatit 14:23) Ajornartorsiummut pitsaasumik aaqqiissutissarsineq naammanngilaq. Aalajangiussarsi naammassiniartariaqarparsi. Imaassinnaavoq iliuuseqarniarlusi ilungersortariaqartusi, tamannali kinguneqarluassaaq. (Ussatit 10:4) Suleqatigiikkussi ‘suleruloornissinni akissarsilluassaasi’. — Oqaluussisartup oqaasii 4:9.

SIUNNERSUUTIT:

• Ajornartorsiutersi aaqqinniarlugu immikkut suna sulissutiginiarnerlugu isumaqatigiigitsi

• Siuariarsimanerlusi ilaannikkooriarlusi nalilersortarsiuk