Meerartaarnerup aappariinnermik allannguisitsinera

Meerartaarneq aappariinnut alutornarlunilu ilungersunarsinnaavoq. Imaassinnaavoq angajoqqaanngorlaajuneq qanoq piffissamik nukinillu atuinartigisoq tupaallaatigigissi. Sinnakittarneq misigissutsillu allanngorarnerat aappariinnissinnut sunniuteqarnerlussinnaapput. Aappariinnissi ingerlalluaannarnissaanut naleqqussartariaqarpusi. Meerartaqalernissinni unamminiarnartut anigorniarnissaannut Biibilimi siunnersuutit qanoq iluaqutigisinnaavisigit?

1 MEERARTAARNEQ INUUNISSINNIK QANOQ ALLANNGUISITSISOQ

BIIBILIMI QANOQ ALLASSIMASOQARTOQ: ‘Asanninneq kamagittartuullunilu saamasuuvoq, namminissarsiornanilu puffassartarinngilaq’. (1 Korinthimiut 13:4, 5) Illit anaananngorlaatut naalungiarsummut piffissangaatsiamik atuinissat pissusissamisoormat uiit sumiginnarneqartutut misigisimalersinnaavoq. Taammaattumik eqqaamajuk taassuma aamma pisariaqartimmatit. Uiit meeqqassinnik paarsinermi pingaartinneqartutut atorfissaqartinneqartutullu asannillutit erinitsajuillutillu misigitinniarsinnaavat.

“Ilissi uiususi ilisimasaqarnermut naapertuuttumik nuliasi inooqatigissavasi.” (1 Petrusi 3:7, NW) Nuliavit naalungiarsummut nukimi annersaanik atuisariaqalernera paasiuk. Nutaamik akisussaaffeqalernermini uippakajaalerlunilu qasorujussualersinnaavoq allaallu nikallungalersinnaalluni. Immaqa ilaatigut kamaatilersinnaavaatit, taamaalippalli eqqissisimaniaannarit ‘kamajaatsuunermi pitsaaneruvoq pissarsuulluni sorsuttartuunermit’. (Ussatit 16:32) Paasinnittuugit pisariaqartitaanillu tapersersorlugu. — Ussatit 14:29.

SIUNNERSUUTIT:

• Ataataaguit: Naalungiarsuup paarinissaanut nuliat unnuaagaluarpalluunniit ikiortaruk. Nuliat qitornallu ilaginerusarniarlugit sunngiffimmi sammisartakkatit ikilisikkit

• Anaanaaguit: Uivit naalungiarsummik ikiorusuppatit, ikiuiniarnera akueriuk. Illit iliuuserisartakkattut iliunngippat avoqqaarinagu qanoq iliornissaanik asannittumik ajoqersuuguk

2 AAPPARIITTUT ATTAVEQARLUARTUARITSI

BIIBILIMI QANOQ ALLASSIMASOQARTOQ: ‘Uiniulissapput ataaseq.’ (1 Mosesi 2:24) Meerartaareeraluarlusi eqqaamassavat aappallu suli ‘uiniugassi ataaseq’. Aappariittut attaveqarluartuaannarumallusi tamaviaaritsi.

Nuliaasutit, uivit ikiuinera tapersersuineralu qujarutikkit. Qujamasunnermik ersersitsinerit ‘katsorsaatitut’ issinnaavoq. (Ussatit 12:18) Uiusutit, nuliat qanoq asatigalugu pingaartitsigalugulu oqaluttuuttaruk. Ilaquttani isumaginiarlugit iliuuserisai pillugit nersualaartaruk. — Ussatit 31:10, 28.

“Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk.” (1 Korinthimiut 10:24) Aappannut pitsaanerpaasoq iliuuserisaruk. Oqaloqatigiinnissamut, nersualaarinissamut tusarnaarnissamullu periarfissarsiortuaritsi. Aappariittut atoqatigiinnerup tungaatigut imminuinnaq eqqarsaatiginaveersaarlutit aappavit pisariaqartitai salliutittakkit. Biibilimi ima allassimavoq: “Aappariittut atoqatigiinnissamut immissinnut itigartinniaqinasi isumaqatigiissutigisimanngikkussiuk.” (1 Korinthimiut 7:3-5) Erinitsajuittuugussi paasinnittuugussilu aappariinnersi qajannaannerulissaaq.

SIUNNERSUUTIT:

• Marluinnaanissassinnut piffissaqartaritsi

• Annikitsualutsigut asanninnerit aappannut ersersittaruk, soorlu allaffigilaartarneratigut tunissuteqalaartarnikkulluunniit

3 MEERARSI ILINNIARTISSIUK

BIIBILIMI QANOQ ALLASSIMASOQARTOQ: ‘Meeraaninniit ilisimavatit Allakkat Illernartut ilinnik ilisimassuseqalersitsisinnaasut annannissamik.’ (2 Timotheusi 3:15) Meeqqap ilinniartinnissaanut pilersaarusioritsi. Naalungiarsuk tupinnaannartumik ilikkajasuararsuuvoq. Sulili inunngornani nipisi ilisarisinnaavai misigissutissinnillu malussarissuulluni. Naalungiarsuuneraniilli atuffattaruk. Naalungiarsuk atuakkannik paasinnissinnaanngikkaluarluni peroruni atuarnermik nuannarisaqalersinnaavoq.

Guuti oqaluuserigit tusaassallutit meeraq mikivallaarsinnaanngilaq. Tusaatillugu Jehovamut qinusarit. (5 Mosesi 11:19) Pinnguaqatigitilluguluunniit Guutip pinngortitai pillugit oqaluttuuttaruk. (Tussiaat 78:3, 4) Peroriartortilluni meeqqap Jehovamut asanninnerit malugisinnaassavaa namminerlu Jehovamik asanninnerujartussalluni.

SIUNNERSUUTIT:

• Naalungiarsuup ilinniartinnissaanut ilisimassuseq qinnutigisaruk

• Naalungiarsuuneraniit paasitikkusutatit qitornannut uteqqittakkit