Uummammit anersaamineq

Iteritsi!-mi oktobari-decembari 1996-imoortumi qitornarsiartaarneq pillugu ilanngutassiaqarpoq. Atuartunit nunanit assigiinngitsuneersunit allagarsigatta nuannaarutigeqaarput. Ingammik allakkat uku killitinnartorujussuupput.

„Erseqqissarusuppara amerlaqisugut qitornatsinnik allanut tunniussisimasugut ilumut tigummiinnarusussimagaluaratsigik. Inuusuttuaraannaavunga katisimanngitsoq sulilu atuartuusoq. Angajoqqaama paasigamikku naartusunga oqaluttuuppaannga meerassama atugarissaarnissaa nammineq atugarissaanissannit pingaarnerutissagiga taamaattumillu tunniuttariaqariga. Paasitinneqarpunga ’naalungiarsuk ataatamik anaanamillu pisariaqartitsisoq’, uangalu pisariaqartitsineq tamanna matusinnaanngikkiga. Angajoqqaama kissaatiginngilaat meerassaq tigummiinnassagiga — meeraq tigummiinnassagukku taakkunani najugaqarsinnaanngilanga. Qanoq iliorsinnaavunga? Ima oqarfigaannga: ’Meerataaravit peqqissimissutigissavat kiffaanngissuseerutimmatit.’

Naartusunga takuneqarsinnaalermat atuarfik qimattariaqarpara eqqarlinnilu najugaqalerlunga. Angerlarsimaffiga qimakkakku nalunngilara aatsaat utersinnaallunga ernereeruma meerassarlu tunniutereerukku.

Anaanat katisimanngitsut angerlarsimaffiannut aallartinneqarpunga. Tassani atorfillit ilaata aperimmanga qitornassara ilumut qitornarsianngortikkumaneriga nalunngilara taassuma paasisimanngikkaa allamik periarfissaqanngitsunga. QITORNASSARA TIGUMMIINNARUSOQAARA! Qungujunnera pilluarneralu takorusoqaara. Atuartartusi ilisimassavassi anaanaviusut amerlasuut uattut misigimmata.

Uanga qinigassaqarsimanngilanga. Taamaattumik oqaluttuunneqarama qitornannut suna ’pitsaanerpaanersoq’ taamaaliorpunga. Kingornalu anniaatigiuarsimavara. Isumakuluutigaara ernera isumaqassasoq soqutiginngikkinni kissaatiginngikkinnilu.

Maannakkut kristumiutut Guutip oqaasianik maleruanngitsoornitsinni ajortorsiutigisinnaasat pillugit Biibilimi unnersuussutigineqartut pingaartittarpakka. Takutippaat silamiutut eqqarsarnerup annernartumik annertuumillu kinguneri. Inuilli qitornarsiartaarineqarsimasut ilisimasariaqarpaat qitornarsianngortinneqaramik imaanngitsoq kissaatigineqanngitsut. Tamatuminnga paasitissigik!“ (gE 8/3 97)