KAPITALI 7
Babelimi napasuliarujussuaq
Ulersuup kingorna Nooap qitornai amerlasuunik meerartaarput. Amerliartorput nunarsuarmilu sumiiffinnut assigiinngitsunut siammartalerlutik, Jehovap oqarneratorluinnaq.
Ilaqutaasali ilaat Jehovamut naalanngillat. Oqarput: ‘Qaa, illoqarfiliorta tassanilu najugaqalerluta allamukaqqinnata. Napasuliarsualiussaagut portusoorujussuarmik qilak tikillugu. Taava tusaamasanngussaagut.’
Jehovap taamaaliornerat nuannarinnginnamiuk aalajangerpoq unitsinniarlugit. Nalunngiliuk qanoq iliornersoq? Tassanngaannaq assigiinngitsunik oqaaseqalersippai. Taava paaseqatigiissinnaajunnaaramik suleqatigiissinnaajunnaarput. Illoqarfiliaat Babelimik atserneqarpoq, ‘paatsiveerunnermik’ isumaqartumik. Inuit allamut noorrapput nunarsuarmilu sumi tamaani najugaqalerlutik. Najugaqalerfigisaminnili suli ajortuliortuarput. Jehovamik asannittoqarunnaarpa? Tamanna kapitalip tulliani paasissavarput.
“Kinaluunniimmi imminut pingaartittoq nikanarsisitaassaaq, kinaluunniillu maniguuttoq pingaartinneqassaaq.” – Lukkarsi 18:14