Lotsip nulia eqqaamajuk

Lotsip akkani Aaperaat Kaanaanimi najugaqatigaa. Taava Aaperaap Lotsillu nunaataanni nersutaataat amerlaval­laaleramik inissaarupput. Aaperaap Lotsi oqarfigaa: ‘Nunaqqatigiis­sinnaajun­naarpugut. Illit sumukar­niarnerlutit aalajangeq­qaarsinnaavat, taava uanga illuatungaanukarumaarpunga.’ Aaperaat namminis­sarsiun­ngingaarami, ilaa?

Lotsip nuna kusanartoq illoqarfiup Soodomap eqqaaniittoq takuaa. Imeqarluarfiullunilu ivigaris­saarpoq. Taava ilaquttanilu tassunga nuupput.

Inuit Soodomamiittut illoqarfiullu eqqaani Gomooramiittut ajortorujus­suupput. Ajungaarmata Jehova aalajangerpoq illoqarfiit taakku suujunnaarsin­niarlugit. Kisianni Jehovap Lotsi ilaqutaalu annakkusuk­kamigit mianersoq­quniarlugit inngilit marluk aallartippai. Imalu oqarput: ‘Qimaapal­lanniaritsi! Jehovap illoqarfik aserornialermagu.’

Lotsi ingerlaannaq qimaanngilaq. Kinguar­teqattaarpaa. Taava inngilit Lotsi, nulia paniilu marluk tasiorlugit illoqarfimmit anisippaat, oqarlutillu: ‘Tamaviat qimaaniaritsi! Tunumullu qiviarnasi, taamaalioraluarussimi toqussagassi!’

Illoqarfimmut Soarimut apuummata Jehova Soodomamut Gomooramullu ikuallas­saammik innermillu qilammiit nakkaatitsivoq. Illoqarfiillu piuneerul­luinnarput. Taava Lotsip nulia Jehovamut naalanngilluni tunumut qiviarami napasun­ngorpoq tarajoq! Kisianni Lotsi paniilu Jehovamut naalakkamik annapput. Lotsip nulia naalanngimmat aliasuutigisimassaqaat. Namminnerli Jehovap ilitsersuussutai naalakkamikkit nuannaarutigaat.