Jaakup kingornussassaq pivaa

Iisaap 40-nik ukioqarluni Rebekka katippaa. Asangaarpaa, marlunnillu ernertaarput – marlulissanik.

Angajulleq Esauimik atserpaat nukarlerlu Jaakumik atserlugu. Esauip silamiin­nissani nuannarisorujussuuaa pinerraris­sunngorlunilu. Jaakuli angerlarsimaan­narusun­nerusarpoq.

Taamanikkut angut toqugaangat ernerisa nunaminertaa aningaasaataalu pisarpaat, angajullerlu annertunerusumik pisarluni. Tamanna kingornus­sinermik taaneqartarpoq. Iisaap ilaqutaani Jehovap Aaperaamut neriorsuutai aamma kingornus­sassaapput. Esauip neriorsuutit taakku soqutigival­laanngilai, Jaakulli pingaar­tittorujussuuai.

Ullut ilaanni Jaaku nerisas­siortillugu Esaui ulloq naallugu piniareer­nikuulluni qasutaavilluni angerlarpoq. Jaakup nerisassiai tipigingaarmata Esauip Jaaku oqarfigaa: ‘Perliliivippunga! Nerisassanik aappaluttunik massakkorpiaq tuninnga!’ Jaaku oqarpoq: ‘Taamaaliussaanga, kingornussassat uannut tunniutereerukku.’ Esaui oqarpoq: ‘Kingornus­sassara piniaruk, uanga soqutigin­ngilara! Nererusuin­nartungaana.’ Isumaqarpit Esaui taamaaliorami silatusaartoq? Ilaa naamik. Esauip nerisassat piinnarlugit pingaarutilerujussuaq tunniuppaa.

Iisaaq utoqqarsuan­ngorami ernermi angajulliup pilluaq­qunissaanut piffissan­ngorpoq. Rebekkalli ernertik nukarleq, Jaaku, pilluaq­quneqar­niassammat ikiorpaa. Esauip tamanna paasigamiuk kamattorujussuuvoq nukkamilu toqunneqarnissaa pilersaarusiulerlugu. Iisaap Rebekkallu Jaaku illersorusuk­kamikku ima oqarfigaat: ‘Angannukarit Labanimut tassaniik­kallarlutillu Esauip kamakkun­naarnissaata tungaanut.’ Jaaku angajoq­qaaminut naalappoq annakkusukkamilu qimaalluni.