Perluit pingasut siulliit

Israalikkut pinngitsaalisaallutik inussiatut sulerulutsitaapput. Jehovap Moorsisi Aaronnilu Faaruumut ima nalunaariar­tortippai: ‘Innuttama inoqajuitsumi guutisiorfigisin­naanias­sammannga aallarnissaat akueriuk.’ Faaruu makitalluni akivoq: ‘Uanga Jehovap oqaasii soqutigin­ngilakka, taamaammat Israalikkut aallartin­navianngilakka.’ Taava Faaruup Israalikkut sulerulun­nerulersippai. Jehova aalajangerpoq Faaruu anusinngorsar­niarlugu. Qanoq taamaaliornersoq nalunngiliuk? Perlunnik qulinik Egypteni eqqugaatippaa. Jehovap Moorsisi oqarfigaa: ‘Faaruup tusaarusun­ngilaanga. Aqagu ullaakkut kuussuarmut Nilenimukarumaarpoq. Tassani oqarfigissavat innuttakka aallaqqun­ngimmagit Nilenimi imeq tamarmi aanngorumaartoq.’ Moorsisip naalappaa Faaruumukarlunilu. Faaruu isigisoq Aaronnip ajaappis­saminik Nileni anaavaa, taava imeq aanngorpoq. Kuussuaq tipittorsuan­ngorpoq, aalisakkallu toqorarput kuussuarlu imerfigineqarsin­naajunnaarluni. Faaruulli Israalikkut aallarnissaat suli akueriumanngilaa.

Ullut arfineq-marluk qaangiummata Jehovap Moorsisi Faaruumut ima oqariar­tortippaa: ‘Innuttakka aallartin­ngikkukkit Egypteni naratsinik ulikkaassaaq.’ Faaruup aallaqqun­ngimmagit Aaronnip ajaappissani qummut kivippaa, nunalu naratsinik ulikkaalerpoq. Inuit illuminni, siniffimminni igaffim­minnilu naratsinik nassaar­talerput. Aap, naratsit sumi tamaani aalaalupput! Faaruu neriorsuivoq Moorsisip Jehovamut perluk unitseq­quppagu Israalikkut aallartik­kumaarlugit. Taava Jehovap perluk unitsippaa. Egyptenimiut naratsit toqungasut amerlasoorpassuit katersorpaat, nunalu tipittorsuan­ngorpoq. Kisianni aammaarluni Faaruup Israalikkut aallartik­kumanngilai.

Taava Jehova Moorsisimut oqarpoq: ‘Aaronnip ajaappis­saminik nuna anaassavaa, nunallu pujoralai ippernan­ngussapput.’ Ingerlaannarlu sumi tamaani ippernaqalerpoq. Faaruup kiffaasa ilaat oqarput: ‘Una perluk Guutimin­ngaanneersuuvoq.’ Kisianni uteriingaarami Faaruup Israalikkut suli aallaqqunngilai.