Perluit tullii arfinillit

Moorsisi Aaronnilu Guutip oqaasiinik Faaruumut apuussiartorput: ‘Innuttakka aallartin­ngikkukkit niviugas­suarnik nunamut aallartitsissaanga.’ Egyptenimiuni tamani, pisuut piitsullu illuini, amerlasoorujus­suarnik niviugas­suaqalerpoq. Nuna tamarmi niviugas­suarnik ulikkaarpoq. Israalikkulli najugarisaanni, Goshenimi, niviugas­suaqanngilaq. Perluit sisamaat tamanna aallarnerfigalugu Egyptenimiut kisimik perlunnik eqqugaasassapput. Faaruu Moorsisimut oqarpoq: ‘Jehovamut niviugassuit peeqquniakkit. Taava innuttatit aallartis­savakka.’ Jehovalli niviugassuit peermagit Faaruup isummani allanngortippaa. Faaruu silattus­sanerluni?

Jehova oqarpoq: ‘Faaruup innuttakka aallartin­ngippagit Egyptenimiut uumasuutaat napparsimalissapput toqullutillu.’ Aqaguani uumasuutaat toqoralerput, Israalikkulli uumasuutaat ajunngillat. Kisianni Faaruu uteriilluni tunniutiin­narusunngilaq.

Taava Jehovap Moorsisi Faaruumut uteqquaa arsakullu silaannarmut naloriuteq­qullugit. Arsakut pujoralan­ngorput silaannarlu tamakkuninnga ulikkaarmat Egyptenimiunut tamanut torarput. Pujoralak timaannut uumasuutaannullu torarmat annernar­torujus­suarnik ajuaqalerput. Taamaattorli Faaruup suli Israalikkut aallaqqunngilai.

Jehovap Moorsisi Faaruumukar­teqqippaa ima nalunaariar­tortillugu: ‘Suli innuttakka aallartin­nianngiligit? Aqagu nuna tamakkerlugu nataqqor­nassaaq.’ Aqaguani Jehova nataqqor­nartitsivoq, kallertitsivoq nunamullu innaallatsitsilluni. Egyptenimi aatsaat taama silarlutsigaaq. Orpiit naasullu tamarmik aseruatiterput, Goshenimili taamaat­toqanngilaq. Faaruu oqarpoq: ‘Jehova qinnuigiuk unitseq­qullugit! Taava aallarsin­naanngussaasi.’ Silarluk­kunnaarmalli Faaruup isummani allanngor­teqqippaa.

Taava Moorsisi oqarpoq: ‘Pillertaqalissaaq, naasullu nataqqornat aserunngisaat nerissavaat.’ Pillertarpassuit millionillit takkussuukkamik inerititat sinneruttut tamaasa nungullugit nerivaat. Faaruu oqarpoq: ‘Jehovamut pillertat peeqquniakkit.’ Jehovalli tamaasa peereeraluarai Faaruu suli uteriippoq.

Jehova Moorsisimut oqarpoq: ‘Assat qummut isaaguk.’ Taava ingerlaannaq qilak taartuin­nanngorpoq. Ullunilu pingasuni Egyptenimiut sumilluunniit takusaqarsin­naanngivipput. Israalikkulli najugaqarfigisaanni taartuin­nanngornani qaamaneqarpoq.

Faaruup Moorsisi oqarfigaa: ‘Illit innuttatillu aallarsin­naavusi. Uumasuutisili maaniigin­naassapput.’ Moorsisi oqarpoq: ‘Uumasuutigut Guutitsinnut pilliutiginias­sagatsigit nassartariaqarpagut.’ Taava Faaruu kamattorsuan­ngorpoq nilliallunilu: ‘Peerit! Takoqqikkukkit toqussavakkit!’