Alapernaarsuiar­tortitat aqqaneq-marluk

Israalikkut qaqqaq Siinaaji qimallugu Karanip inoqajuitsuatigut Kadeshimukarput. Tassani Jehovap Moorsisi oqarfigaa: ‘Angutinik aqqaneq-marlunnik naggueqatigiinnit tamaneersunit aallartitsigit Kaanaanimut nunamut Israalikkunnut tunniun­niakkannut alapernaarsuiar­tortillugit.’ Taava Moorsisip angutit aqqaneq-marluk toqqarpai oqarfigalugillu: ‘Kaanaanimukaritsi nuna naatitsif­figiuminarnersoq paasiniarlugu. Aamma takusigit taakani najugallit sanngiitsuunersut nukittuujunersul­luunniit aamma tuperni illoqarfin­niluunniit najugaqarnersut.’ Taava alapernaarsuiar­tortitat aqqaneq-marluk Kaanaanimut aallarput, taakkualu ilagaat Josva Kalebilu.

Ullut 40-t qaangiummata alapernaarsuiar­tortitat uterput figeninik, granatæblinik vindruuanillu nassarlutik. Oqarput: ‘Nuna naatitsif­figiuminarpoq, kisianni tassani najugallit nukittoorujus­suupput illoqarfiillu portusuunik qarmarsuaqarlutik.’ Taava Kalebi oqarpoq: ‘Ajugaaf­figisaq­qaarpagut. Qaa, aallariarta!’ Nalunngiliuk sooq Kalebi taama oqarnersoq? Josvalu marluullutik Jehova tatigigamikku. Taava kisianni alapernaarsuiar­tortitat allat qulit oqarput: ‘Naamik! Inuit tassaniittut angisoorujus­suupput! Uagut allaanngilagut pillertat.’

Israalikkut annilaangalerput. Naammagit­taalliulerput oqarlutik: ‘Siulersuisus­satsinnik allamik qinerseriarluta Egyptenimut utiinnarta! Sooq Kaanaaniliassaagut taakanilu toqutaalluta?’ Josva Kalebilu oqarput: ‘Jehova akerlilersor­niaqinasiuk! Annilaangaqinasi. Jehovap illersus­saqqaarpaatigut.’ Kisianni Israalikkut tusaajuman­ngillat. Allaat Josva Kalebilu toqukkusulerpaat!

Jehova qanoq iliorpa? Moorsisimut oqarpoq: ‘Israalikkut aali taamarsuaq ikiornikuutigalugit suli naalakkuman­ngilaannga. Taamaattumik ukiuni 40-ni inoqajuitsumiigin­nassapput taakanilu toqussallutik. Taakkua meeraat taavalu Josva Kalebilu kisimik nunami neriorsuutigisimasanni najugaqalissapput.’