Alapernaarsuisut 12-it

PAARNAT angutit ukua akiagaat takoriakkit. Viinnissat eqimattat angingaaramik! Angingaarmata angutit marluk ersuummik akiartariaqarpaat. Fiigillu kimmernarsuillu takoriakkit. Paarnat kusanartut tamakku suminngaanneersunuku? Kana’anip nunaaniit. Eqqaamajuk Abraham, Isak Jakobilu Kana’animi najugaqarsimasut. Tamaanili kaannersuaqarnera pissutigalugu Jakob ilaquttani ilagalugit Egyptenimut nuussimavoq. Maanna, ukiut 216-it missiliorlugit qaangiunneranni, Mosesip Israelikkut Kana’anip nunaanut utertippai. Inoqajuitsup ilaa Kadesj tikissimavaat.

Inuit ajortut Kana’anip nunaani najugaqarput. Taava Mosesip alapernaarsuisut aqqaneq-marluk aallartippai oqarfigalugit: ’Nunap inuisa amerlassusiat qanorlu pissaaneqartigissusiat paasiniariartorsiuk. Nuna naggorinnersoq paasiniarsiuk. Inerititaanillu uatsinnut nassarisi.’

Alapernaarsuisut Kadesjimut uteramik Moses oqarfigaat: ’Nunaavoq pitsaalluinnartoq.’ Uppernarsaatitullu paarnaat Mosesimut nittarpaat. Alapernaarsuisulli ilaat qulit oqarput: ’Nunap inui angeqalutillu nukittoorsuupput. Nuna tiguarniaraluarutsigu toqutaassaagut.’

Tamanna tusaramikku Israelikkut ersilerput. ’Pitsaanerusimassagaluarpoq Egyptenimi maaniluunniit inoqajuitsumi toqugutta,’ oqarput. ’Sorsunnermi toqunneqassaagut, nuliavullu qitornavullu tigusarineqassapput. Moses taarserlugu siulersortissatsinnik toqqaasa, Egyptenimullu uterluta!’

Alapernaarsuisulli ilaasa marluk Jehova tatigaat, inuillu eqqissisarniarlugit. Tassaapput Josua Kalebilu. Oqarput: ’Erseqinasi. Jehovap najorpaatigut. Nuna tiguaruminassaaq.’ Inuilli tusarumanngilaat. Josua Kalebilu allaat toqukkumavaat.

Jehovap tamanna kamaatigingaarpaa, Mosesilu oqarfigalugu: ’Inuit 20-t qaangerlugit ukiullit kikkulluunniit Kana’anip nunaanut isissanngillat. Egyptenimi inoqajuitsumilu tupinnartuliakka takusimavaat, taamaattorli tatiginngilaannga. Inoqajuitsumi ukiut 40-t angalaassapput tamarmik toqutserlutik. Josua Kalebilu kisimik Kana’anip nunaanut iserumaarput.’