Jehovamut pikitsitsipput

Kingusin­nerusukkut Israalikkut suli inoqajuitsumiittut Kora, Datani, Abirami angutillu 250-it allat Moorsisimut Aaronnimullu pikitsitsipput. Moorsisi oqarfigaat: ‘Naammaleqaasi! Sooq siuttoris­savatsigit? Aamma sooq Aaronni palasiunerussava? Jehovap tamatta ilagaatigut, ilissiin­naanngitsoq.’ Jehovap tamanna nuannarinngilaa imminerminummi pikitsitsinertut isigigamiuk.

Moorsisip Kora iliilu oqarfigai: ‘Aqagu tupermut guutisiorfim­mukassaasi aamaasivisi nassarlugit tipigis­saatinillu ilisiffigalugit. Taava Jehovap takutissavaa kina toqqarsimanerlugu.’

Aqaguani Korap angutit 250-it ilagalugit Moorsisi tupermut guutisiorfimmut ornippai. Palasiun­ngikkaluarlutik tassani tipigis­saatinik ikumatitsipput. Jehovap Moorsisi Aaronnilu oqarfigai: ‘Korakkunnit avissaaritsi.’

Korap Moorsisi tupermut guutisiorfimmut ornimmagu Datani, Abirami taakkualu ilaqutaat ilaajuman­ngillat. Jehovap Israalikkut oqarfigai Korap, Datanip, Abiramillu toqqisa eqqaanniik­kunnaassasut. Israalikkullu qimagutipallapput. Datani, Abirami ilaqutaalu toqqit silataaniitillugit tassanngaannaq nuna nikorfaf­figisaat qupivoq nakkarlutillu. Kora angutillu 250-it toqqup guutisiorfiup eqqaaniitillugit qilammiit innermik eqqorneqarput ikuallal­lutillu toqullutik.

Taava Jehovap Moorsisi oqarfigaa: ‘Naggueqatigiis­sortani siuttut tamarmik ajaappissamik ilinnut aggiussissapput. Tunisisullu atia ajaappissamut allassavat. Levikkulli ajaappiaanni Aaronnip atia allassavat. Ajaappissat tupermut guutisiorfimmut ilissavatit, ajaappiarlu qinigara sikkertik­kumaarpara.’

Aqaguani Moorsisip ajaappissat tamaasa aavai siuttunullu takutillugit. Aaronnip ajaappiaa sikkersimavoq qaqqortaris­sanillu inerittoqalersimalluni. Taamaalilluni Jehovap takutippaa Aaronni palasiunerusussatut qinersimallugu.