Guutip oqartussaaneranut ilumoorfiginnilluta naalatsigitittariaqarpugut
„[Jehova] eqqartuussisigaarput, [Jehova] naalakkersortigaarput, [Jehova] kunngigaarput.“ — ESAJA 33:22.
1. Inuiaat Israelikkut inuiannit allanit qanoq immikkooruteqarpat?
UKIUMI 1513-mi u.n.s. inuiaat Israelikkut pilersinneqarput. Taamanikkut illoqarfeqarfiit pingaarnersaannik illoqarfeqanngillat, namminerisaminnik nunaqanngillat takussaasumilluunniit kunngeqaratik. Inuiaat taakku pineqartut inussiaataasimapput. Inuiaalli taakku allatiguttaaq immikkuullarissuupput. Jehova Guutimi Eqqartuussisigaat, Naalakkersuisoraat Kunngigalugulu takussaanngitsoq. (2 Mosesi 19:5, 6; Esaja 33:22) Inuiannut allanut tunngatillugu taamaanngilaq.
2. Israelikkut siulersorneqarnerannut tunngatillugu suna apeqqutaalerpa, aamma sooq akissutaata ilisimanissaa uagutsinnut pingaaruteqarpa?
2 Jehova aaqqissuugaanerup eqqissinerullu Guutigimmassuk inuiaat siulersugaasa aaqqissuugaanissaat naatsorsuutigissavarput. (1 Korinthimiut 14:33) Inuiaat Israelikkut taamaattuupput. Qanorli ililluni nunami peqatigiiffik takussaasoq Guutimit takussaanngitsumit siulersorneqarsinnaava? Iluaqutigissavarput misissornerugutsigu Jehovap itsaq inuiaat taakku qanoq siulersorsimanerai. Ingammik maluginiaruk inuiannut qanoq periaasiata takutikkaa oqartussaaneranut ilumoorluta naalatsigitittariaqartugut.
Itsaq Israeli qanoq siulersorneqartoq
3. Jehovap innuttani qanoq siulersorpai?
3 Jehova Israelikkut Kunngigaat takussaanngitsoq, angutinilli aalajaatsunik takussaasunik sinniisussaminik toqqaasarpoq. Israelikkut naggueqatigiissortaasa qullersaat naalakkanik taaneqartarput, taakkulu inuiaallu utoqqaanertaat ataatsimut siunnersuisuupput eqqartuussisuullutillu. (2 Mosesi 18:25, 26; 5 Mosesi 1:15) Isumaqassanngilagulli angutit akisussaasut taakku Guutimit siulersorneqaratik tamakkiisumik siuneqassuseqarsinnaasut paasinnissinnaasullu. Kukkujuitsuunngillat inuillu uummataat atuarsinnaanagit. Eqqartuussisulli Guutimik mianerinnittut uppeqatiminnik siunnersuisarnerat Jehovap inatsisaanik tunngaveqarmat iluaqutaangaartarpoq. — 5 Mosesi 19:15; Tussiaat 119:97-100
4. Israelikkut eqqartuussisuisa suut sanngiiffiginaveersaartariaqarpaat, aamma sooq?
4 Eqqartuussisut Inatsisinik ilisimanninnerat naammanngilaq. Utoqqaanertat naammalluinnartuunnginnamik sanngiiffigisinnaasatik, soorlu namminissarsiorneq, nakerisarsiorneq piumatuujunerlu, eqqumaffigisariaqarpaat. Mosesip oqarfigai: „Eqqartuussisaraangassi nakerisarsiortassanngilasi. Pisuut piitsullu assigiimmik killisiortassavasi. Inummilluunniit ersigisaqassanngilasi eqqartuussineq Guutip pigimmagu.“ Aap, Israelikkut eqqartuussisui Guuti sinnerlugu eqqartuussisarput. Immikkut pisinnaatitaaffik mianernangaartoq! — 5 Mosesi 1:16, 17.
5. Jehova eqqartuussisoqartitsinermi saniatigut innuttani qanoq isumagai?
5 Israelikkut anersaakkut pisariaqatitaat Jehovap allatiguttaaq matussuserpai. Nunamut neriorsuutigisamut suli isinngitsulli Illernartuummik, pallorfiginninnerup ilumoortup qiterisassaanik, sanaqquai. Aammattaaq palaseqatigiinnik pilersitsivoq Inatsisinik ilinniartitsisussanik, uumasunik pilliisussanik ullaallu unnuillu tamaasa tipigissaatilliisussanik. Guutip Mosesip angajua, Aroni, Israelikkunnut palasiuninngortippaa siulleq, Aronillu erneri ikiortissaatut toqqarlugit. — 2 Mosesi 28:1; 4 Mosesi 3:10; 2 Nalunaarsuutit 13:10, 11.
6, 7. (a) Palasit Levikkullu palasiunngitsut eqqarleriinnerat qanoq ippa? (b) Levikkut assigiinngitsunik suliaqarnerat sumik ilinniarfigisinnaavarput? (Kolossemiut 3:23)
6 Inuit millionillit anersaakkut pisariaqatitaannik isumassuineq suliarujussuuvoq, palasillu amerlagisassaanatik. Taamaattumik naggueqatigiit Levikkut ilaannik ikiortaasussanik toqqaasoqarpoq. Jehova Mosesimut oqarpoq: „Levikkut Aronimut ernerinullu tunniutikkit, taakkuupput Israelikkunnit taassumunnga tunniussaalluinnartussat.“ — 4 Mosesi 3:9, 39.
7 Levikkut aaqqissuussaalluartuupput. Eqqarleriit pingasunngorlugit — Gershonikkunnut, Kehatikkunnut Merarikkunnullu — immikkoortinneqarsimasut tamarmik immikkut suliassaqarput. (4 Mosesi 3:14-17, 23-37) Suliassat ilaat allanit pingaarnerorpasissinnaapput, tamarmilli pingaaruteqarput. Kehatikkut illernartorpassuarnut, soorlu angerutsip illerfianut toqqullu pisataanut, tunngasunik suliaqarput. Levikkulli tamarmik, Kehatikkuugaluarunik allaagaluarunilluunniit, immikkut pisinnaatitaafferujussuarmik tunineqarput. (4 Mosesi 1:51, 53) Ajoraluartumik ilaasa immikkut pisinnaatitaaffeqarnertik pingaartinngilaat. Guutip oqartussaaneranut ilumoorfiginnillutik naalatsigitinnatik ilaat naammagittaalliulerput pingaarniartunngorlutik, ataqqineqarumatuunngorlutik sinngatuunngorlutillu. Levikkuusoq Koramik atilik aamma taamaappoq.
„Maanna allaat palasiujumallerpusi“
8. (a) Kora kinaava? (b) Suna pillugu Korap inuit isiginnittaasiattuinnaq palasit isigilersimagunarpai?
8 Kora levikkut siuaasaqaqatigiissortaanni Kehatikkulluunniit eqqarliini qullersaanngilaq. (4 Mosesi 3:30, 32) Israeilikkunili naalagaavoq ataqqisaasoq. Immaqa pisussaaffimminut tunngatillugu Korap Aroni ernerilu qanimut suleqatigai. (4 Mosesi 4:18, 19) Angutit taakku kukkussutaannik takunnittuugami immaqa ima eqqarsalerpoq: ’Kikkut tamarmik takusinnaavaat palasit taakku naammalluinnanngitsuusut, taamaattoq tassunga naalaqquaannga! Ungasissorsuunngitsukkut Aroni nersuteeraasaliorpoq kuultimik angutivissamik. Inuit taanna pallorfigaat guutipilussiortunngorlutillu. Maannalu Aroni, Mosesip angajua, palasiuneruvoq! Mosesip ilaquttani allanit pingaartinnerugai nalunnanngivippoq! Aronimmi erneri Nadabi Abihulu? Suliaminnik ataqqinninngingaarmata Jehovap toqutaatippai!’a (2 Mosesi 32:1-5; 3 Mosesi 10:1, 2) Kora qanorluunniit eqqarsarsimagaluarpat erseqqippoq inuit isiginnittaasiattut palasit isigilersimagai. Mosesimut Aronimullu, pingaarnerpaamillu, Jehovamut pikitsitsinermik kinguneqarpoq. — 1 Samueli 15:23; Jaaku 1:14, 15.
9, 10. Korap pikitsitsisullu allat Mosesi qanoq unnerluutigaat, aamma sooq taamaaliortariaqarnatik nalunngittariaqaraluarpaat?
9 Kora Israelikkunni mikinngitsumik oqaasissaqartuugami isumaqatissaaleqinngilaq. Datani Abiramilu peqatigalugit 250-inik — tamarmik ilagiinni qullersaasunik — isumaqatissarsipput. Ataatsimoorlutik Mosesimut Aronimullu saaffiginnipput: „Ilagiinnut ilaasut pinngitsoqarnatik illernartuupput, [Jehovalu] akornanniippoq. Sooq [Jehovap] ilagiissaanit pingaarnerutinniarpisi?“ — 4 Mosesi 16:1-3.
10 Pikitsitsisut nalunngikkaluarpaat Mosesip oqartussaassusia apeqqusertariaqarnagu. Tamannami sioqqutilaarlugu Aroni Mirjamilu taamatorluinnaq iliorput. Korap tunngavilersuutaata asserluinnaa tunngavilersuutigaat! Mosesimik allakkat sisamaat 12:1, 2 naapertorlugu ima aperipput: „[Jehovap] Mosesi kisiat oqaluussimanerpaa? Aamma uatsinnut oqalussimannginnerpa?“ Jehovap taama oqarnerat tusaavaa. Taamaattumik Mosesi, Aroni Mirjamilu toqqup naapeqatigiittarfiup isaariaanukaqquai takutinniassagamiuk kina siulersuisutut toqqarsimanerlugu. Tassani Jehovap paatsuugassaangitsumik oqarfigai: „Akornassinni Jehovamut pruffiiteqaraangat, takorruuisillugu tassunga takutittarumaarpunga. Sinnattukkut oqaluffigiumaarpara. Kiffannut Mosesimut atatillugu taamaanngilaq! Illunnut tamarmut paarsisuutitaavoq.“ Taava Jehovap Mirjami pupissunngortikkallarpaa. — 4 Mosesi 12:4-7, 10, NV.
11. Koramut tunngatillugu Mosesi qanoq qisuariarpa?
11 Korap tapersersortaasalu pisimasoq tamanna nalusimanavianngilaat. Pikitsitsinerminnut utoqqatsissutissaqanngillat. Taamaattoq Mosesip kamagittarluni eqqarsalersinniarsarai. Kajumissarpai suliassiissutigineqartunik pingaartitsineroqqullugit, ima oqarfigalugit: „Naammaginngilisiuk Israelikkut Guutiata Israelip ilagiissaani immikkoortissimammasi sassarsinnaatillusi?“ Naammaginangaarpoq. Levikkut immikkut pisinnaatitaafferujussuarmik tunineqareerput. Sumik allamik kissaateqarsinnaagamik? Mosesip nangilluni oqaasiisa suna anguniarneraat takutippaat: „Maanna allaat palasiujumallerpusi.“b (4 Mosesi 12:3; 16:9, 10) Jehovalli oqartussaanerminut pikitsitsineq tamanna qanoq qisuariarfigaa?
Israelikkut Eqqartuussisuat akuliuppoq
12. Israelikkut Guutimut ajunngitsumik attaveqartuaannarnissaannut suna aalajangiisuua?
12 Jehovap Israelikkut Inatsiseqartileramigit oqarfigai naalakkunik ’inuiaqatigiinngussasut illernartut’, inuiaallu illernartuujuassasut Jehovap aaqqissuussineranut akuersaartillutik. (2 Mosesi 19:5, 6) Maanna saqqumisumik pikitsitsisoqarmat piffissanngorpoq Israelikkut Eqqartuussisuata Naalakkersuisuatalu akuliunnissaa! Taamaattumik Mosesip Kora oqarfigaa: „Aqagu peqatigisatillu tamassi Aroni ilagalugu [Jehovap] kiinaata saanut sassassaasi. Tamassi immikkut aamaasivisi nassassavasi tipigissaatinillu ilisiffigalugit. Tamassi immikkut aamaasivisi — katillutik 250-iusut — [Jehovap] kiinaata saanut sassaatissavasi. Illit Aronilu aamma tamassi immikkut aamaasivilisassaasi!“ — 4 Mosesi 16:16, 17.
13. (a) Pikitsitsisut Jehovamut tipigissaatilliinerat sooq anneruniarnerua? (b) Pikitsitsisut Jehovap qanoq pillarpai?
13 Guutip inatsisai naapertorlugit palasit kisimik tipigissaatilliisinnaapput. Levikkut palasiunngitsut Jehovamut tipigissaatilliinissaat eqqaaginnarlugu pikitsitsiniat eqqarsariaallassimasariaqaraluarput. (2 Mosesi 30:7; 4 Mosesi 4:16) Kora malittaalu silattuaqinngillat! Aqaguani „Korap Mosesi Aronilu akerliunerminnik takutinniarlugit peqatini tamaasa Toqqup Naapeqatigiittarfiup killinganut katersortissimavai“. Oqaluttuaq imaappoq: „[Jehova] Mosesimut Aronimullu ima oqarpoq: ’Katersorsimasunit avissaaritsi taakku tassuuguinnaq nungutissagakkit!’“ Mosesilli Aronillu inuiaat qinnuppaat. Jehovap qinnutaat tusarpaa Israelikkullu inuunerat asattuullugu. Korali peqatigisaalu pillugit Jehovamit ’inneq pisoq anillappoq angutillu 250-it tipigissaatilliisut nungullugit ikuallallugit’. — 4 Mosesi 16:19-22, 35.c
14. Sooq Jehovap ilagiit Israelikkut akuliuffigai?
14 Israelikkut Jehovap pikitsitsisunik qanoq iliorfiginninneranik takunnittut tamanna ilinniarfiginngimmassuk tupaallannarpoq. „Aqaguani Israelikkut ilagiit tamarmik Mosesimut Aronimullu naammagittaalliulerput oqarlutik: ’Ilissiuna [Jehovap] innuttai toqukkisi!’“ Israelikkut pikitsitsisunik tapersersuipput! Maanna Jehova kamagittarunnaarpoq. Kialuunniit — allaat Mosesip Aronilluunniit — inuiaat qinnussinnaajunnaarpai. Jehovap naalasseriitsut perlussiortippai „inuillu 14.700-t perlummik toqupput Kora pisuulluni toqoreersut saniatigut“. — 4 Mosesi 17:6-14.
15. (a) Sooq Israelikkut nangaanngivillutik Mosesip Aronillu siulersuinerat akuerisimasariaqaraluarpaat? (b) Oqaluttuami tassani Jehova pillugu sumik ilikkagaqarpit?
15 Inuppassuit taakku toqusariaqanngikkaluarput. Eqqarsarsimassagaluaramik! Imminut ima aperisinnaagaluarput: ’Kina Faraomut sassarluni inuunerminik navianartorsiortitsitsiva? Kia Israelikkut iperagaanissaat piumasaraa? Israelikkut aniguisitaareermata kina kisimi majuaqquneqarpa qaqqamut Horebimut Guutip inngilianik oqaloqateqassalluni?’ Mosesip Aronillu Jehovamut ilumoorfiginnittuunertik inuiannullu asanninnertik uppernarsareerpaat. (2 Mosesi 10:28; 19:24; 24:12-15) Pikitsitsisut toqunerat Jehovap iluarinngilaa. Paasinarsilluarmalli Israelikkut pikitsitsiumatuujunertik allanngortikkusunngikkaat Jehova nakimaalluni akuliuppoq. (Ezekieli 33:11) Tamakku tamarmik ullumikkut uagutsinnut pingaaruteqarluinnarput. Sooq?
Aqqut Jehovap ullumikkut atugaa
16. (a) Jiisusip Jehovamit aallartitaanera pillugu ukiuni hundredelinni siullerni juutit suup qularunnaarsittariaqaraluarpai? (b) Jehovap palaseqatigiit Levikkuusut sunik taarserpai, aamma sooq?
16 Ullumikkut ’inuiannut’ allanut Jehova Eqqartuussisuuvoq, Naalakkersuisuuvoq Kunngiullunilu takussaanngitsoq. (Matthæusi 21:43) ’Inuiaat’ taakku ukiuni hundredelinni siullerni pilersinneqarput. Illernartuut Mosesip nalaaneersoq Jerusalemimi naalaffimmik kusanartumik, Levikkut taamani suli kiffartorfigisaanni, taarserneqarsimavoq. (Lukasi 1:5, 8, 9) Ukiumili 29-mi naalaffik anersaakkut ittoq, Jiisusi Kristusip palasiuneruffia, pilersinneqarpoq. (Hebræerit 9:9, 11) Guutip oqartuussaanera apeqquserneqaqqippoq. Jehovap ’inuiannut’ nutaanut taakkununnga kina siulersuisunngortissavaa? Jiisusip Guutimut ilumoorfiginnittuulluinnarnini takutissimavaa. Inuit asavai tupinnartuliarpassuaqarlunilu. Levikkulli amerlanersaasa, siuaasamittulli naalasseriitsigisut, Jiisusi ilassiumanngilaat. (Matthæusi 26:63-68; Apustilit Suliaat 4:5, 6, 18; 5:17) Naggataatigut Jehovap palaseqatigiit Levikkuusut allarluinnarnik — palaseqatigiinnik kunngikkormiuusunik — taarserpai. Palaseqatigiit kunngikkormiuusut taakku ullumikkut piupput.
17. (a) Eqimattat kikkut ullumikkut palaseqatigiiuppat kungikkormiuusut? (b) Jehovap palaseqatigiit kunngikkormiuusut taakku qanoq atorpai?
17 Ullumikkut kikkut palaseqatigiiuppat kunngikkormiut? Tamanna apustili Petrusip allakkamini siullerni akivaa. Kristusip timaanut ilaasortanut tanitanut Petrusi isumassarsisitaalluni ima allappoq: „Ilissi tassaavusi eqqarleriit qinikkat, palaseqatigiit kunngikkormiuusut, inuit illernartut, innuttassarsiat, Guutip ilissinnik taartumit qaamasuminut tupinnaqisumut nooqqullusi qaaqqusisup pissaaneranik nalunaajaasussat.“ (1 Petrusi 2:9) Oqaatsinit taakkunannga paasinarluarpoq tanitat Jiisusip tumaanik atuaasut ataatsimut isigalugit ’palaseqatigiiusut kunngikkormiut’ Petrusip ’inunnik illernartunik’ taasai. Taakku aqqutigalugit Jehovap innuttani siulersortarpai anersaakkullu siunnersortarlugit. — Matthæusi 24:45-47.
18. Utoqqaanertat toqqakkat palaseqatigiillu kunngikkormiuusut imminnut qanoq attuumassuteqarpat?
18 Utoqqaanertat toqqakkat palaseqatigiinnut kunngikkormiuusunut sinniisuupput, nunarsuarmi tamarmi Jehovap innuttaasa ilagiivini akisussaaffeqarlutik kiffartortut. Angutit taakku, katersanut tanitanut ilaagaluarpata ilaanngikkaluarpataluunniit, ataqqisariaqarpavut tapersersorluinnarlugillu. Sooq? Jehovap, anersaani illernartoq aqqutigalugu utoqqaanertanik toqqaasarmat. (Hebræerit 13:7, 17) Qanoq?
19. Utoqqaanertat anersaaq illernartumit toqqarneqarnerat qanoq paasisariaqarpa?
19 Utoqqaanertat Biibilimi, Guutip anersaavanit isumassarsiarititaasumi, piumasaqaatit eqqortippaat. (1 Timotheusi 3:1-7; Titusi 1:5-9) Taamaattumik oqartoqarsinnaavoq anersaaq illernartumit toqqagaasut. (Apustilit Suliaat 20:28) Utoqqaanertat Guutip oqaasia ilisimalluartariaqarpaat. Eqqartuussigaangamillu, toqqaasimittulli Eqqartuussisuunertut, nakerisarsiornermut eqqaanarsinnaasut tamaasa uumigisariaqarpaat. — 5 Mosesi 10:17, 18.
20. Sooq utoqqaanertat pingaartippigit?
20 Utoqqaanertat oqartussaanerat apeqqusernagu eqiasuillutik suliaat pingaartikkusuppavut. Aalajaallutik, amerlasuullu ukiuni qulikkuutaani, kiffartormata tatigilluinnarsinnaavavut. Sapaatip-akunneri tamaasa ataatsimiinnerit siulersukkatik piareersarfigisarpaat, „naalagaaffimmillu nutaarsiassaq nuannersoq“ pillugu oqaluussinitsinni qanimut suleqatigaluta pisariaqaraangallu Biibilimeersunik siunnersortarluta. (Matthæusi 24:14, NV; Hebræerit 10:23, 25; 1 Petrusi 5:2) Aamma napparsimasut pulaartarpaat aliasuttullu tuppallersartarlugit. Ilumoorfiginnillutik namminissarsiornatillu Guutip Naalagaaffiata soqutigisai tapersersortarpaat. Jehovap anersaavanit siulersorneqarnerat taassumingalu iluarisaanerat erseqqippoq. — Galatiamiut 5:22, 23.
21. Utoqqaanertat suut eqqumaffigiuartariaqarpaat, aamma sooq?
21 Soorunami utoqqaanertat naammalluinnartuunngillat. Killeqarnertik nalunngilaat savaatillu, ’Guutip kingornussaanik’ taasat, naalagaaffiginiarnagit. Akerlianik qatanngutimik ’nuannaartuarnissaannut suleqataasutut’ imminnut isigipput. (1 Petrusi 5:3, NV; 2 Korinthimiut 1:24) Utoqqaanertat maniguuttut eqiasuitsullu Jehova asavaat, nalunngilaallu Jehova ilaarnerujartortillugu ilagiinni angusaqarnerusinnaallutik. Taamaattumik noqqaassutigiuarpaat ajunngitsumik pissuseqarnissartik, asannittuunissartik, misiginneqataasuunissartik kamajasuunngitsuunissartillu.
22. Koramik oqaluttuap Jehovap peqatigiiffianut takussaasumut qanoq tatiginninnerulersippaatit?
22 Nuannarutigaarput Jehova Naalakkersortigigatsigu takussaanngitsoq Jiisusi Kristusilu palasiunerigatsigu. Aamma nuanneqaaq palaseqatigiinnik kunngikkormiunik ilinniartinneqartarluni utoqqaanertanillu kristumiunit aalajaatsunit siunnersorneqartarluni. Peqatigiiffik sunaluunniit inunnit siulersorneqartoq naammalluinnartuusinnaanngilaq. Nuannaarutigeqaarpulli uppeqativut ilumoorfiginnittut nuannaarlutik Jehovap oqartussaaneranut naalatsigitittut kiffartoqatigisinnaagatsigit! (wE 08/01 02)
[Quppernerup ataani ilanngussat]
a Aronip erneri allat, Eleazari Itamarilu, Jehovamut kiffartornerminni maligassiuilluartuupput. — 3 Mosebog 10:6.
b Korap pilersaapiloqatai, Datani Abiramilu, Rubenikkuupput, taamaattumillu palasinngorusussimanissaat ilimanangilaq. Mosesilli siulersuinera nuannarinngilaat nunamullu neriorsuutigisamut isernissamut tunngatillugu qilanaarisamik suli eqquutinnginnerat pakatsissutigalugu. — 4 Mosesi 16:12-14.
c Ataataanerpaat nalaanni ilaqutariinni qullersaasoq ilaquttaminut Guutimit oqaaseqartitaavoq sinnerlugillu pilliisarluni. (1 Mosesi 8:20; 46:1; Jobi 1:5) Inatsisilli tunngavigalugit angeruseq atulersinneqarmat Jehovap Aronip eqqarliini angutitaasut palasitut pilliisartussatut toqqarpai. Pikitsitsisut 250-it aaqqissuussinermik allanngortitamik tamatuminnga akuersiumasimagunanngillat.
Suut ilikkarpigit?
• Jehova Israelikkunnut asannittumik qanoq isumassuiva?
• Sooq Kora Mosesimut Aronimullu pikitsitsigami utoqqatsissutissaqanngila?
• Jehovap pikitsitsisunut akuliunnera sumik ilinniarfigisinnaavarput?
• Ullumikkut Jehovap ilagiinnik aaqqissuussineranik pingaartitsinerput qanoq takutissinnaavarput?
[Qupp. 9-mi assiliartaq]
Jehovap peqatigiiffiani suliassaq sunaluunniit immikkut pisinnaatitaaffittut isigaajuk?
[Qupp. 10-mi assiliartaq]
„Sooq [Jehovap] ilagiissaanit pingaarnerutinniarpisi?“
[Qupp. 13-mi assiliartaq]
Utoqqaanertat toqqakkat palaseqatigiinnut kunngikkormiuusunut sinniisuupput