Jehovap Josva toqqarpaa

Ukiorpassuarni Moorsisip Israalikkut siulersoreerlugit toqussi nalleriartorpaa. Jehovap oqarfigaa: ‘Illit Israalikkut nunamut neriorsuutigisamukaan­navianngilatit. Nunali ilinnut takutik­kumaarpara.’ Taava Moorsisip Jehova qinnuigaa siuttussamik nutaamik toqqaassasoq Israalikkunnik paarsisussamik. Jehovap oqarfigaa: ‘Josvamukarit oqarfigalugu taanna toqqarneqarsimasoq.’

Moorsisip Israalikkut oqaluttuuppai toqungajalerluni Jehovallu nunamut neriorsuutigisamut siulersor­tissatut Josva toqqarsimagaa. Taava Moorsisi Josvamut oqarpoq: ‘Annilaangas­sanngilatit. Jehovap ikiorumaarpaatit.’ Sivitsun­ngitsoq Moorsisi qaqqamut Nebomut majuarpoq. Tassani Jehovap nuna Aaperaamut, Iisaamut Jaakumullu neriorsuutigisimasani takutippaa. Moorsisi 120-nik ukioqarluni toquvoq.

Jehovap Josva oqarfigaa: ‘Kuussuaq Jordani ikaarlugu Kaanaanimukassaatit. Moorsisip ikiorneratulli ikiussavakkit. Ullut tamaasa inatsisikka atuartas­savatit. Ersissan­ngilatit. Sapiillisaassaatit. Aallarit uangalu oqarnittut iliorlutit.’

Josvap alapernaarsuiartortut marluk illoqarfimmut Jeerikomukartippai. Oqaluttuap tulliani susoqarsimaneranik paasisaqar­nerussaagut. Uteramik oqarput: ‘Kaanaanimukarniarta, taakanimi najugaqartut ersisorujus­suupput.’ Taava aqaguani Josvap Israalikkut aallarnis­saannut piareersaqquai. Taava palasit isumaqatigiissummut illerfiusamik tigummiartut siulliutillugit kuussuarmut Jordanimukartippai. Kuussuaq kuuttorujussuuvoq. Palasilli isigaasa kuuk attuinnaraat kuussuaq kuukkun­naarpoq paqqerluni! Palasit kuup qeqqanukarput Israalikkullu tamarmik ikaarneranni tassani nikorfaan­narlutik. Ilimagaajuk tupinnartuliap tamatuma Immami Aappalaartumi Jehovap qanoq iliorsimaneranik eqqaasis­simassagaat?

Kiisami, ukiorpassuit qaangiutereersut, Israalikkut nunamut neriorsuutigisamut apuupput. Illuliorlutillu illoqarfinnik pilersitsisin­naanngorput. Narsaateqarsin­naalerput viinnequteqarsin­naalerlutik naatitsiveqarsin­naalerlutillu. Nuna naggorillunilu imeqarluarami naatitsif­figiuminarpoq, taamaat­tumillu taaneqartarpoq nuna immummik tungusun­nitsuummillu kuuttoq.