Josua siulersuisunngortoq

MOSES Kana’anip nunaanut iserusuppoq Israelikkut ilagalugit. Qinuvoq: ’Jehova-aa, Jordanip kuussua ikaartiguk nunalu alianaatsoq takutiguk.’ Jehovali oqarpoq: ’Tassa! Tamanna eqqartoqqissanngilat!’ Suna pillugu Jehova taama oqartoq nalunngiliuk?

Mosesip qaarsumik anaasinerani pisimasoq pissutaavoq. Eqqaamajuk taassuma Aronillu Jehova ataqqinartinngikkaat. Inuit nassuiaatinngilaat Jehova imermik qaarsumit anisitsisuusoq. Tamanna pissutigalugu Jehova oqarpoq Kana’anip nunaanut isissanngitsut.

Taava Aronip toqunerata kingornagut qaammatit arlaqanngitsut qaangiuttut Jehovap Moses oqarfigaa: ’Josua palasimut Eleazarimut inunnullu sassartiguk. Tamarmillu isigitillugit nalunaarfigikkit Josua siulersuisunngortoq.’ Moses Jehovap oqarneratut iliorpoq, soorlu assilissami takusinnaagit.

Taava Jehovap Josua oqarfigaa: ’Nukittugit siooranallu. Illit Israelikkut Kana’anip nunaanut taakkununnga neriorsuutigisannut siulersussavatit, uangalu najorumaarpakkit.’

Kingornagut Jehovap Moses oqarfigaa Nebop qaqqaata qaavanut Moabikkut nunaanniittumut majuaqqullugu. Tappavanngaanniit Moses Jordanip kuussuata akianut isigisinnaavoq Kana’anillu nunaa alianaatsoq qimerloorsinnaallugu. Jehova oqarpoq: ’Tamassa nuna Abrahamip, Isakip Jakobillu kinguaavinut tunniukkumaarlugu neriorsuutigisara. Maanna ilinnut takutippara, tassungali isernissannut akuerissanngilakkit.’

Nebop qaqqaata qaavani Moses toquvoq. 120-nik ukioqarpoq. Toqussi tikillugu peqqittuarsimavoq tappissuujuarsimallunilu. Inuit aliasoqaat Mosesilu toqummat qiallugu. Josuali siulersuisortaarigamikku qujassutigaat.