Annikilliornartumi angisuumi annaanneqartut
’Tassa-uku annikilliornartumit angisuumit pisut, atisatillu takisuut Savaaqqap aavanik errorpaat qaqorsarlugillu.’ — SARKÚMERSITAT 7:14.
1. Nunami toqumit makititaasut kikkunnit tikilluaqquneqassappat?
INUIT millionilikkuutaat kisissaanngitsut ’iluartunik iluaatsunillu makititsinissami’ makititaagunik nunarsuarmut inoqanngitsumut makititaassanngillat. (apustilit suliait 24:15) Avatangiisinut kusanaqisunut makititaassapput, inissartik, atisassatik nerisassarpassuillu imminnut piareersimatinneqartut. Kikkut taamatut piareersaasimassagamik? Erseqqippoq nunarsuarmi makititsinissaq sioqqullugu silarsuassami nutaami inoqarsimassasoq. Kikkunnik? Biibilimi ersersinneqarpoq annikilliornartumi angisuumi aniguisunik inoqarumaartoq. Tamanna Biibilip ajoqersuutigisaani tamani pissanganarnerpaanut ilaannguatsiarpoq — tassa aalajaatsut annikilliornartumi angisuumi aniguiumaartut toqunngisaannarumaartullu. Tamanna Allakkani Illernartuni uppernarsaatissarpassuaqarpoq.
Noap ulluinisut
2, 3. (a) Noap nalaa uagullu nalerput sukkut assigiissuteqarpat? (b) Noap ilaqutaasalu ulersuarmi annaanneqarsimanerat sumut tikkuussisuua?
2 Matîuse 24:37-39-mi Jesus Kristusip Noap nalaa ullullu kingulliit uagut inuuffigisavut imminnut assersuuppai. Oqarpoq: ’Soorlu Noa inuutillugu ittoq, taamattaaq ikkumaarpoq inuup Ernerata tikiuffissaani. Soorlumi ulluni taakkunani ulersuup siornagut iliortut nerillutillu imerlutillu nuliarlutillu uinillutillu ulloq taanna Noap umiarsuarmut iserfia tikillugu paasinagulu, aatsaalli ulersuaq nalliummat tamaasa nungutillugit, taamattaaq ikkumaarpoq inuup Ernerata tikiuffissaani.’
3 Nunarsuaq tamakkerlugu ulersuarnerani inuit Guutip mianersoqqussutaanut tusaajumanngitsut tamarmik ajunaarput. Noali ilaqutaalu ajunaanngillat. Taakku ’umiarsuarmut isersimapput’, soorlu Jesus oqartoq. Guutimut tunniusimanerat pissutigalugu Jehovap aniguiffissarsitippai. Pîtrusip agdlagaisa áipait 2:5, 9-mi Noap ilaqutaasalu annassimanerat ima eqqaaneqarpoq: ’Noa iluarnermik oqaluussisoq arfineq-pingatsiullugu [Guutip] aniguisikkamiuk, ulersuaq silamiunut iluaatsunut nalliutikkamiuk. Taava Jehovap mianerinnitsini ussernartumit annaanneq nalussanngilai.’ Noap nalaa ullullu kingulliit Jesusip imminnut assersuuppai ersersinniarlugu inuit amerlanerit Guutip mianersoqqussutaanut tusarnaarnavianngitsut. Aammali taamaaliornermigut erseqqissarniarpaa Noap ilaqutaasalu Jehova Guuti naalassimagaat, umiarsuarmut ikillutik ulersuarmilu annallutik. Noamik ilaqutaanillu annaassineq silarsuarmi matumani Guutip kiffaasa aalajaatsut annaanneqarnissaannut tikkuussivoq.
Ukiuni hundredelinni siullerni pisimasoq assingusoq
4. Jesusip oqaasii eqquutillugit pisut suut Jerusalemip ukiumi 70-imi u.n.k. suujunnaarsinneqarneranik malitseqarpat?
4 Jesusip aamma silarsuup matuma ulluini kingullerni pisussat eqqartorpai. Matîuse 24:21, 22-mi allassimavoq: ’Taamaannerani naalliunnartoqangaassavoq silarsuaqaleqqaarneranit mannalu tikillugu naleqanngisaannartumik kingornaluunniit naleqassanngitsumik. Ullullu taakku ikilisinneqanngippata inummik ataatsimilluunniit annattoqanngeqqajaqaaq; qinikkalli pillugit ullut taakku ikilisinneqassapput.’ Oqaatsit taakku ukiuni hundredelinni siullerni ukiunik naatsorsuisalerfitta kingorna utaqqiisaannaasumik eqquussimapput. Ukiumi 66-imi u.n.k. illoqarfik Jerusalem Romamiut sakkutuuinit Cestius Gallusimit siulersorneqartunit unguneqarpoq. Romamiut sakkutuuisa allaat naalaffiup qarmarsui assaallutik piialerpaat, juuterpassuillu tunniutiinnarnissaminnut piareersimaannalerput. Ilimagineqanngilluinnartumilli, pissuteqarsorinanngitsumillu, Cestius Gallusip sakkutuuni utertippai. Romamiut tunuartut takullugit kristumiut Jesusip ukiorpassuit tamatuma siorna oqaaserisimasaatut iliorput: ’Jerusalem sorsuttorpassuit ilugaat takulerussiuk, taava ilisimassavarsi nungutitaaffissaa qanillisoq. Taava Judeamiittut qaqqanut qimaalit, Jerusalemillu iluaniittut tassannga anilit, nunaannarmiittullu tassunga isernaveerlit.’ (Lúkarse 21:20, 21) Juutit kristumiunngornikut, qinikkat, illoqarfik Jerusalem aarlerinartorsiortoq qimakkasuarpaat taamaalillutillu kinguniatsianngua aserugaarujussuarneranit amiilaarnartumit aniguillutik. Ukiumi 70-imi u.n.k. Romamiut sakkutoorpassui sakkutuut naalagaannit Titusimit siulersorneqartut uterput. Jerusalem ungulluinnarlugu tammaarput, illoqarfik saassullugu aserorlugulu.
5. Ukiumi 70-imi Jerusalemimut naalliunnartup ulluisa ’ikilisinneqarsimaneri’ qanoq paasisariaqarpat?
5 Oqaluttuarisaanermik allattartoq juutiusoq Josefus oqaluttuarpoq juutit 1.100.000-it taamani toqutaasimasut, 97.000-it annassimasut tigusarineqarlutillu. Juutit kristumiuunngitsut annattut tassaaqqajanngillat ’qinikkat’ Jesusip siulittuutigisimasai. Inuiaat juutit pikitsitsiumatuut oqaluullugit Jesus ima oqarsimavoq: ’Ata, illorsi ilissinnut qimagaassavoq inueruttoq. Oqarfigaassimi: Matuma kingornagut takussanngilassinga ima oqartinnasi: „Pilluarli Jehovap aqqani tikiuttoq.“’ (Matîuse 23:38, 39) Oqaluttuarineqanngilaq juutit taakku, Jerusalemimi soriarsinnaajunnaaqqatitaasut, piffissaq kingulleq atorlugu Jesus Messiasitut akuerisimagaat Jehovamillu iluarisaalerlutik. Annikilliornerli ukiumi 70-imi u.n.k. Jerusalemimi pisoq qaangiukkasuarpoq. Romamiut sakkutuuisa ungusinerat sivisunngilaq. Tamanna iluatsillugu juutit ilaat toqutaanngillat, Romamiulli naalagaaffissuata immikkoortuinut assigiinngitsunut aallartitaaginnassallutik inussianngoriartorlutik.
Annattut amerlangaartut
6, 7. (a) Upperisarsiornikkut illoqarfissuaq suna suli aserorneqanngila, tamannalu annikilliornartup asseqanngitsup suup ilarissavaa? (b) Silarsuarmut matumunnga annikilliornartussaq angisooq pillugu Johannes qanoq siulittuiva?
6 Jerusalemip ukiumi 70-imi u.n.k. aserorneqarnera illoqarfimmut upperisarsiorfioqisumut tamatumunnga tassaagaluartoq ’annikilliornartoq angisooq’ taamaattoq Jesusip oqaasiisa pingaarnerusumik eqquunnissaat suli pinngilaq. Illoqarfik upperisarsiorfioqisoq suli anneq, Babylon Angisooq, silarsuarmi eqqunngitsumik upperisarsiornerit naalagaaffissuat, annikilliornartumik angisuumik suujunnaassutigisaminik, annikilliornartumik asseqanngitsumik Satanip pissutsinik aaqqissuussaanerata sinneranut tuttussamik malitsilimmik, eqqorneqartussaavoq. (Matîuse 24:29, 30; sarĸúmersitat 18:21) Jerusalemip aserorneqarnera ukiunik 26-nik kingoqqullugu apustilip Johannesip silarsuaq tamakkerlugu annikilliornartussarsuaq tamanna sarĸúmersitat 7:9-14-imi allaatigaa. Ersersippaa inuit ’amerlangaartut’ taamanikussamut aniguissasut.
7 Annattussat taakku ’amerlangaartut’ iliuutsimikkut aalajangersimasutigut kinaassusersineqarsinnaapput. sarĸúmersitat 7:14-imi allassimasutut utoqqaanertat 24-t qilammiittut ilaata Johannes ima oqarfigisimavaa: ’Tassa-uku annikilliornartumit angisuumit pisut, atisatillu takisuut Savaaqqap aavanik errorpaat qaqorsarlugillu.’ Aap, amerlangaartut Jehova annatsitsisimittut unnersiutigaat. Jesusip aavanut kuisamut uppernermik ersersitsipput Pinngortitsisimillu kunngillu qinigaasup, Jesus Kristusip, saavanni iluartumik inissisimaffeqarlutik.
8. ’Amerlangaartut’ Jesusillu qatanngutai tanitaasut sinneruttut qanoq ajunngitsumik attaveqatigiippat?
8 Ullumikkut amerlangaartunut ilaasut 5 millioningajaat kunngip qilammiup Jesus Kristusip naalakkersuinerata ataani inuupput. Kristusimut naalatsigitipput taassumalu qatanngutaanut tanitaasunut suli nunamiittunut qanimut attaveqarlutik. Amerlangaartut tanitanik taakkuninnga iliorfiginninnerat pillugu Jesus ima oqarsimavoq: ’Ukua qatanngutima minninnguit ilaat sumik pigissi tamatuminnga uanga pivassinga.’ (Matîuse 25:40) Namminissarsioratik Kristusip qatanngutaanut tanitaasunut ikiuukkamik amerlangaartut taakku Jesusimut namminermut ajunngitsuliortutut isigineqarput. Tamanna iluaqutigalugu Jesus Kristusimut Jehova Guutimullu isumannaatsumik attaveqarsinnaapput. Guutimut nalunaajaasunngornermikkut aqqanillu taaguuteqarnermikkut tanitanut sinneruttunut suleqataasinnaanertik immikkut pisinnaatitaaffigaat. — Jesaja 43:10, 11; Joel 2:31, 32.
Eqqumaniartuartut
9, 10. (a) Inuup Ernerata saani iluartumik inissisimaffipput atatiinnarniarlugu qanoq iliortariaqarpugut? (b) ’Eqqumaniarluta’ qanoq iliortariaqarpugut?
9 Amerlangaartut inuup Ernerata saavani iluartumik inissisimaffeqarnertik unissanatik atatinniartuartariaqarpaat, tamatumanilu pisariaqarpoq naggatissaq tikivillugu eqqumaniartuarnissaat. Jesusip tamanna erseqqissumik eqqaavaa ima oqarluni: ’Mianersoritsi uummatisi putumanermut imerajunnermullu inuunerullu matuma piinik isumakulunnermut nanertorteqqunagit; ullup taassuma tassanngaannaq tikeqinavaasi; nigatummi nunap tamarmi qaanut ineqartunut tamanut nalliukkumaarpoq. Eqqumattuinnaritsilu qinullusi tamakkuninnga piumaartussanik tamanik qimarratiginnissinnaaqqullusi inuullu Ernerata saani atasinnaaqqullusi.’ — Lúkarse 21:34-36.
10 Inuup Ernerata saani atasinnaassagutta taassumannga iluarisaasariaqarpugut, iluarisaasinnaanngilagullu silarsuup matuma eqqarsartaasianit sunnerneqarnissarput akueriinnarutsigu. Silamiutut eqqarsartaaseq napititsiniartuuvoq inummillu sunniisinnaavoq timikkut nuannaarniutinik ingasaassititsilerluni imaluunniit inuunermi isumakuluutinik artorsiilluni taamaalillunilu Naalagaaffiup soqutigisaanik inuunermi salliutitsiunnaarsitsilluni. (Matîuse 6:33) Taamatut inooriaaseqalerneq inuup anersaakkut sanngiillissutigisarpaa aammalu Guutimut allanullu akisussaaffimminik suusupaginnittunnguutigisarlugu. Suliniuteqarunnaarsinnaavoq imaluunniit annertuumik ajortuliornermigut, immaqa allaat peqqissiminngitsutut pissusilersornermigut, ilagiinni inissisimaffimmini navianartorsiulersinnaalluni. Amerlangaartunut ilaasut tamarmik immikkut imminnut eqqumaffigisariaqarput. Silarsuarmit guutiitsumit iliuusiinillu nigorsimasariaqarput. — Juánase 17:16.
11. Biibilimi najoqqutassat suut atorutsigik Harmagedonimi annannissatsinnut iluaqutigissavavut?
11 Tamanna eqqarsaatigalugu Jehovap oqaatsini, anersaani illernartoq peqatigiissortanilu takussaasut ikiortigalugit pisariaqartitatsinnik pilersorpaatigut. Tamakku tamakkiisumik iluaqutiginiartariaqarpavut. Aammalu Guutimit iluarisaanissarput kissaatigigutsigu Guutimut qinorpasissumik naalattumillu pissuseqartariaqarpugut. Pingaarnerpaamillu, ajortumut uumiginninnermik sakkortuumik ineriartortitsisariaqarpugut. Tussiaasiortoq ima oqarsimavoq: „Sallutuut peqatigisarinngilakka, peqquserluttut ilagineq ajorpakka. Ajortut katisimasarneri uumigaakka, guutiitsullu issiaqatigineq ajorpakka. Peernaveeruk tarniga ajortuliortunut tapullugu, inuunera nunguteqinagu ilaliullugu toqutsisunut.“ (Tussiaat 26:4, 5, 9) Ilagiinni kristumiuni inuusuttut utoqqaallu assigiimmik Jehovamut tunniulluinnarsimanngitsunik ilaqartarnertik killilersimaartariaqarpaat. Guutimut iluarisaajumagutta silarsuarmut isornaatsuusariaqarpugut. (Tussiaat 26:1-5; Jâko 1:27; 4:4) Taamaappat qularutiginngissinnaavarput Jehovap Harmagedonimi guutiitsunut ilanngulluta nungutaatissanngikkaatigut.
Ilaat toqunngisaannassapput
12, 13. (a) Lazarusip toqumit makitinnginnerani Martap paasilluanngisaanik Jesus qanoq oqarpa? (b) Inuit ’toqunaviassanngitsut’ eqqartoramigit Jesusip suna pinngilaa?
12 Pissutsit aaqqissuussaanerata matuma naggatissaani aniguinissamik toqunngisaannarnissamillu eqqarsaat pissanganartuuvoq. Tamannarpiarli siunissatsitut Jesusip uagutsinnut saqqummiussimavaa. Ikinngutini toqungasoq Lazarus makitinngitsiarlugu Jesus Lazarusip qatanngutaanut Martamut ima oqarsimavoq: ’Uanga makissutaallungalu inuussutaavunga; uannut uppertoq naak toqugaluaruni inuussavoq; inuusorlu uannut uppertoq kinaluunniit toqunaviassanngilaq, tamanna upperaajuk?’ Martap makinnissaq upperaa, Jesusilli oqaasii tamakkerlugit paasinngilai. — Juánase 11:25, 26.
13 Jesus taamatut oqarnermigut isumaqanngilaq apustilini aalajaatsut timikkut inuujuaannassasut toqunngisaannassallutillu. Akerlianilli kingusinnerusukkut ersersippaa ajoqersukkani toqujumaartut. (Juánase 21:16-23) Anersaamimmi illernartumik taninneqarnerat ukiumi 33-mi piinsip ulluani pisimasoq isumaqarpoq qilammi kunngisut palasisullu akissarsiassartik pissagunikku toqoqqaartariaqartut. (sarĸúmersitat 20:4, 6) Piffissallu ingerlanerani ukiuni hundredelinni siullerni kristumiut tamarmik toqupput. Jesusilli oqaatsini ilumooruppai. Toqunngisaannarluni inuuneq pillugu oqaasii eqquutissapput.
14, 15. (a) Jesusip toqunngisaannartoqarnissaanik oqaasii qanoq ilillutik piviusunngortinneqassappat? (b) Ullumikkut silarsuaq qanoq aarlerinartorsiorpa, iluartulli sumik neriugisaqarpat?
14 Kristumiut tanitat aalajaatsut naassaanngitsumik toqu misiginngisaannassavaat. (sarĸúmersitat 20:6) Aamma Jesusip oqaatsimini tikkuarpaa piffissaq immikkut ittoq Guutip inunnut akuliuffissaa Noallu nalaanisut iliorsimanermisut nunarsuarmi ajussutsimik piiaaffissaa. Piffissami tamatumani Guutip piumasaanik iliortut Guutip eqqartuussineragut toqusariaqassanngillat. Noatulli ilaqutaatullu silarsuarmik aseruinermi aniguinissaminnut periarfissaqassapput. Neriuut taama ittoq qularnaatsuuvoq, Biibilip ajoqersuutaanik tunngaveqarluni assersuusiatigullu paasiuminarsarneqarluni. (Naleqqiuguk Eprîarit 6:19; 2 Pîtruse 2:4-9.) Biibilimi siulittuutit eqquussornerisa ersersippaat silarsuaq inuiannik naapertuilluanngitsunik inoqartoq suujunnaarsinneqangajalersoq. Tamanna pinngitsoorani pisussaavoq, silarsuarmi ajussuseq iluarsivissaqanngitsoq atuummat. Noap nalaani silarsuaq pillugu Guutip oqaaserisimasai aamma ullumikkut silarsuarmut naleqqupput, tassa ’inuit ajussusiat annertusiartuinnartoq, piumasaallu pilersaarutaallu ajortuinnaasut’. — 1 Moses 6:5.
15 Jehovap inuit ukiuni hundredelikkuutaani nammineq akuliuffiginngisaminik nunarsuarmik aqutsinerat akuerisimavaa, tamannali naangajalerpoq. Erniinnaq Jehovap nunarsuarmi ajortut suujunnaarsissavai, Biibilimi allassimasutorluinnaq. (Tussiaat 145:20; Ussatit 2:21, 22) Iluartulli ajortunut ilanngullugit nungutinnavianngilai. Guuti taamaaliorsimanngisaannarpoq! (Naleqqiguk 1 Moses 18:22, 23, 26.) Soormi aalajaallutik imminut kiffartorlutik ilungersortut Guutimillu mianerinnittut aserorumassavai? Jehovap tungaanit naapertuilluartumik iliorneruinnassaaq kiffani aalajaatsut annikilliornartoq angisooq aallartippat inuusut iluarinninnerminik ersersitsivigippagit suujunnaarsinnagillu, soorlu Noa ilaqutaalu taamani silarsuaq ajortoq ajunaarnersuarmik naggaserneqarmat suujunnaarsitaasimanngitsut. (1 Moses 7:23) Guutip kiffani sernissussavai silarsuullu matuma naggaserneqarnerani annaallugit.
16. Silarsuassami nutaami nuannersunik sunik pisoqassava, annattunullu qanoq isumaqassava?
16 Taava qanoq pisoqassava? Silarsuassami nutaami Jesusip pilliutaa utertitsissutaasoq tamakkiisumik atorneqalerpat pilluaqqusaanerit ajorunnaarutaasut inuiannut kuerarneqassapput. Tamanna Biibilimi ima assersuutikkut oqaatigineqarpoq: ’Kuussuaq inuunartumik imilik, aligortut qaammarissigisoq, Guutip Savaaqqallu issiavissaarsuannit puilasoq. Illuisa akornata qeqqani kuussuullu sinaani illugiinni ippoq orpik inuunartoq aqqaneq-marlunnik inerititsisartoq, qaammatit nungullugit inerititaqartartoq; orpiullu taassuma pilutai inuiaqatigiinnut katsorsaataapput.’ (sarĸúmersitat 22:1, 2) Nuanneqaaq oqarsinnaalluni ’katsorsaanermut’ ilaasoq toqumik Adamimit aallaaveqartumik ajugaaffiginninneq! „[Jehovap] toqu nungutissavaa piujunnaarsivillugu. Guutillu Naalagaasup isit tamaasa qullingiarumaarpai.“ (Jesaja 25:8) Taamaalilluni annikilliornartumi angisuumi aniguisut silarsuassamilu nutaami inuulersut toqunngisaannarsinnaassapput!
Neriuut qularnaatsoq
17. Inuit ilaasa Harmagedonimi aniguinissaannik toqunngisaannarnissaannillu neriuut qanoq qularnaatsigaa?
17 Neriuutip tupinnartup tamatuma piviusunngornissaa tatigilluinnarsinnaavarput? Ilaanarujussuaq! Jesusip Martamut ersersissimavaa piffissaq inuit toqunngisaannarlutik inuulerfissaat nalliukkumaartoq. (Juánase 11:26) Aammalu sarĸúmersitat kapitaliisa arfineq-aappaanni Jesusip Johannesimut saqqummersitaani qulaarneqarpoq amerlangaartut annikilliornartumit angisuumit aniguisut. Jesus Kristus Noallu nalaani ulersuarsimaneranik oqaluttuaq upperisinnaavavut? Soorunami! Aammami piffissani eqqartuutiffiusuni inuiaallu suujunnaarsitaanerini Guutip kiffaminik sernissuisarsimanerinik oqaluttuanik allanik Biibilimi nassaassaqarpoq. Naggatissap nalaani matumani annikinnerusumik iliuuseqarnissaa ilimagisariaqarnerpa? Pinngortitsisumut ajornartoqarnerpa? — Naleqqiuguk Matîuse 19:26.
18. Jehovap silarsuassaani nutaami naapertuilluartumi inuulernissarput sooq qularinngissinnaavarput?
18 Ullumikkut Jehovamut aalajaalluta kiffartorutta qularinngissinnaavarput silarsuassaani nutaami naassaanngitsumik inuulersinnaassalluta. Allat millionilikkuutaat makititaaneq ikiortigalugu silarsuassami nutaami inuulersinnaassapput. Ullumikkut Jehovap innuttai millionilikkuutaat — aap, amerlangaartut inuup kialuunniit amerlassusilersinnaanngisai imaluunniit killilersinnaanngisai — asseqanngitsumik immikkut pisinnaatitaaffeqassapput annikilliornartumi angisuumi aniguisitaassallutik. Toqunngisaannassappullu. (wD 15/2 95)
Nassuialaaruk
□ Harmagedonimi annannissaq Noap nalaani qanoq siumut tikkuarneqarpa?
□ Jehovap eqqartuussutaa naammassiartorlugu Jesus takkuppat ataannarumagutta qanoq iliortariaqarpugut?
□ Sooq oqarsinnaavugut Harmagedonimi aniguisut ’toqunaviassanngitsut’?
[Qupp. 17-mi assiliartaq]
Jerusalemip aserorneqarnerani kristumiut annapput